救爸行動1986(穿越)(愛情)(親情): 5

~「...有咩事呀?」家良問我。

 「...er...冇野...。」我答。

 「...坐窗口果個靚仔呢，係阿文...高才生離架...讀緊港大...。」
姑姐用好仰慕嘅眼神望住佢介紹。

個男仔呢...比較大隻小小，著住件灰色poly恤，啡色西褲波鞋，
仲帶住耳機好似聽緊歌咁，對比起其餘兩個的確係比較sharp嘅。





 「…嗯...。」男仔好cool咁望一望我點一點頭，
之後就望返住窗出面繼續聽歌。

 全程車姑姐就係咁同阿晶傾計，而姑丈家良就不停咁聊我傾計，
我都係不停咁hea佢，坐左半個鐘左右，我地就落車啦，
睇吓先...雖然周圍嘅金舖都唔見哂，但係我認得依度係銅鑼灣，
而且sogo已經喺度，不過就好似細間啲咁。

 「…喂...我唔識架，應該搭咩車?」一落巴士姑姐就問。





 兩個男仔你眼望我眼咁，一齊行左埋巴士站牌度搵離搵去。

 「...坐地鐵啦。」阿文突然開聲講。

 「…好呀...我未坐過。」阿晶開聲和應。

 「...其實...你地想去邊?」我好疑惑咁問。

 「…太古城中心呀。」家良好快咁答我。





 「…哦...原來起左架啦。」我答。

 「...起左幾年架啦，不過果陣冇地下鐵，所以都唔知點搭車去好，
可能阿宜你小過海唔知啦。」家良繼續解答。

 「…行啦...坐地下鐵路，話咁快就到啦。」阿文好有型咁背住我地揮一揮手，
所有人就好興奮咁跟住佢行啦。

 「…係啦...阿宜牙，你有冇坐過地下鐵呀?」行緊果陣家良問我。

 「…er...成日都坐架啦。」我好hea咁答。

 「...吓...係牙!!!點解嘅???」家良姑丈吳若希上身咁問點解，死啦...我係咪講多左呢。

 「...er...因為...」死啦...點答好呢。





 「…因為九龍果邊早幾年已經通左車囉，阿宜住果邊緊係成日都有機會坐啦。」
我未講完...阿文已經專家口吻咁，解釋比家良聽...好彩姐。

 「...哦...乜...乜係咩...哈哈!!」家良好尷尬咁以笑遮醜...。

 「…阿文真係犀飛利...咩都識，家良你就...。」
姑姐瞇起對眼咁望住家良講，好似有啲恥笑緊佢咁。

 「...死婆...咪鬼瘀我啦!!!」家良姑丈好不滿咁對住姑姐講，
之後全程港鐵呢...佢兩個都不停互窒，十足一對鬥氣冤家咁...
嘻嘻...唔知佢地幾時行埋架呢。

 好快就去到太古站啦，其實個地形同現代都冇咩分別，我地出閘後，
經過一條長長嘅扶手電梯就順利到達太古城中心啦...。





 「...嘩...好熱鬧呀!!」阿晶講，因為依家真係幾多人，雖然冇2016咁q多，
但係都真係唔小，而且大部份都係年青人添，睇離依度係當年啲後生仔女聚集嘅熱滿地。


一上到去個大堂，就見到大大個溜冰場喺中間，
個位同現代有啲唔同，基本上扶手電梯一上到去就係溜冰場。

 「...wu...好緊張呀!!我未玩過滾軸溜冰架!!!」姑姐好興奮咁邊行邊講。

 「...不如我地上樓上間(出奇老鼠)食啲野先啦...，大家都應該肚餓架啦。」阿文建議。

 「...好喎...啲薄餅好正斗架，前排喺屋企樓下果間食過。」家良和應。

 「…出奇老鼠???」行緊果陣我問姑姐。





 「...有得食薄餅同玩遊戲架，你果度...冇架?」姑姐喺我耳機細細聲問。

 「...米奇老鼠我就聽過。」我答。

 「…可能到你地個年代叫米奇老鼠掛，唔好講咁多啦，上到去你咪知囉。」姑姐搭住我膊頭講。

 我地跟住阿文尾，搭扶手電梯上左幾層，再喺人群當中穿插，
依度呢...好多我都未見過嘅舖頭...好似仲有戲院同保齡球場。

 「…吓...ikea!!!」...乜(宜家傢俬)果陣已經有架啦，我仲以為係新野離添。

 「…咩牙話???」阿晶望一望我問。

 「...哦..冇野...。」我講。





 唔知點解呢，我覺得阿文好似望一望我咁，
可能係我心理作用啦，唔好理咁多啦。

 好快我地就行到去果間佢地所講嘅(出奇老鼠)，哦...原來係冒險樂園果啲野離架，
開頭仲以為係好似荔園掟香口膠果啲灘位遊戲添....。

我地行到門口離遠已經好多人，有啲一家大細，有啲就一對對情侶，
有啲就係好似我地咁成班friend...仲有啲著住校服嘅學生添，
啲人圍住個門口行離行去，依度除左玩呢，仲有野食架...可以叫pizza同啲小食，
我地搵左個位坐低之後呢，佢地就輪住出去睇野食啦。

 「…阿宜...想食咩呀?」家良好熱情咁問我。

 「...吓...是...是但得架啦。」我答。

 「…咁我去叫啦。」家良對住我微笑，
之後就行左出去點野食啦，點解姑丈對我咁鬼死熱情架。

 其他人都走哂出去睇野食嘅睇野食...玩嘅玩，得返我一個坐左喺度霸位。
其間見到牆邊台上面嘅幾隻老鼠公仔樂隊忽然唱起歌跳起舞贈慶囉，
氣氛都真係好熱鬧，但係果幾隻老鼠個樣真係一啲都唔可愛囉，
可以用恐怖離形容添。

阿文好快就行左返離，而且仲唔知點解坐左埋我隔離添。

 「…hi...。」阿文主動開口同我打招呼。

 「...hello。」我禮貌回應。

 「...頭先聽到你講ikea喎，英文發音都幾標準吖，
係呢...唔知你讀邊間學校架呢?」阿文好似對我好有興趣咁問。

 「...吓...er...呂明才囉。」我口窒窒咁答。

 「…咦...我母校???吖...唔記得左阿宜你住九龍果邊添...應該係沙田果間呀呵?」
阿文好似咩都知咁...，連我自己都唔知沙田有間呂明才囉。

 「...哈哈...咪...咪係囉!!!」我笑笑口咁回應。

 「...哦...讀到中幾呀?」阿文繼續追問。

 「…吓...讀...讀緊form six。」我答。

 「…咦...竟然!!!好小有女仔讀到咁高form架喎，你屋企...家景唔錯架?」
阿文越問就越興奮咁，點算好呀再問就穿崩架啦。

 「...er...。」我dup低左頭，唔知點答佢好。

 「...er...sorry呀，好似問多左啲，唔好意思...當我冇問過啦。」
阿文見我咁尷尬，亦都冇再追問落去。

 「…喂...傾緊咩呀?」姑姐同阿晶翹住咁返離。

 「…哦...冇野...我問阿宜識唔識踩roller姐。」阿文好自然咁講完就行返開啦。

 其他人亦都前後腳咁行左返離，好快已經成枱都係野食啦，
又pizza又意粉咁，姑姐佢地見到啲野食個樣真係好鬼死興奮囉...，
好似前世未食過pizza咁。

 「...喂...鄭寶如，你識唔識架。」家良望住姑姐講，
因為姑姐而家揸實拳頭咁拎住隻叉，叉極都叉唔起件pizza唔知點好咁....。

 「…哎呀...好難用呀!!!點叉架???」姑姐想發卑氣咁濟啦。

 「…如姐...用手食咪得囉!!」我拍一拍姑姐講。

 「…吓...但係...er...會唔會比人笑架??」姑姐好疑似咁喺我耳邊問。

 「…冇野喎，你睇吓...阿文都係搵手食咋嘛。」我指一指坐喺遠處嘅阿文講。

 「…係...係喎，咁...都冇咁驚，嘻嘻...其實我第一次離太古架咋，平時成日都喺漁排咩都唔識...。」
姑姐望到阿文之後即刻冇咁緊張啦，之後細細聲喺我耳邊講。

 「...咦...啲鬼佬薄餅，又幾好味喎!!!」姑媽一邊食一邊講。

 「...係喎...個感覺幾特別!!!」阿晶和應。

 食野途中...佢地都不時講返啲舊事，原來佢地幾個呢...係小學同學離架，
阿晶呢就眼大大咁…包包面皮膚同姑姐一樣都係咁黑，有肉地但係唔算肥，
不過小腿就粗左小小，而且同姑姐一樣都係住南丫島嘅，所以同姑姐特別friend。

阿強呢…就住喺阿晶隔離...四眼仔…一樣係黑到舊炭咁…仲瘦到棚骨咁添，
至於家良呢...都係瘦架啦，不過就好樣過阿強亦都冇阿強咁黑，雖然都係漁民，
但係好早已經上左岸住，所以依家就住喺香港仔中心。

至於阿文呢...三個男仔當中算最靚仔，雖然單眼皮，但係眼大大，鼻高高咁，
幾高大...望落應該有178左右，健康膚色但係又唔會好似阿強果啲咁黑喎，
加埋衣著我都唔識點形容啦，總之就係望落去好順眼啦，而且好似係有錢仔...
至於住喺邊呢...，喺佢地嘅交談中就聽唔到。

 唔洗幾耐大家都已經飲飽食醉啦，家良急不及代咁...不斷催促仲未食完野嘅阿強，
阿強食野真係好鬼死慢，頭先傾計果陣已經唔多見佢出聲架啦，
都唔知點解佢都仲係食得最慢果個，可能依個就係佢瘦到棚骨咁嘅原因啦。

最後阿強都係食唔哂，好狼狽咁比家良夾住走。

我地繼續經扶手電梯上到去六樓，
終於都去到佢地今日嘅目的地(滾軸溜冰場)啦。