救爸行動1986(穿越)(愛情)(親情): 9
~「...吓...咩野覺得點呀?」我問。
「…咪扮啦...講緊阿哥女朋友呀，頭先明明仲望到人地實一實咁...。」姑姐開始質問。
「…咩喎...咪女仔一個囉!!!」我口窒窒咁回應。
「...靚唔靚?」姑媽繼續追問。
「...er...幾...幾好吖...斯斯文文咁...。」我答。
「…...你點會讚自己嘅情敵架!!!應該好憎佢至係架???」姑姐好疑惑咁。
「...我都話我對你阿哥冇野囉...。」我有啲無奈咁回應...。
「…係啦係啦...冇野啦...，但係都要做多啲準備...，唔好咁易比對手打贏先得架。」
吖...講離講去姑姐都係唔信我對阿爸冇野....。
過左一陣，阿爸阿爺佢地已經做完野返哂入離，
而阿嫲同阿媽亦都煮好哂飯餸準備開飯，
於是我同姑姐兩個都走左出去幫手。
食飯果陣...阿爺阿嫲都表現得好開心，
連姑媽都係一樣笑笑口咁...係咁同阿媽傾計。
「…係啦...原來大大百貨執笠啦。」食食吓...阿爸無啦啦醒起咁。
「…吓...咁大間公司都執笠...估唔到喎!!!」
阿爺好驚訝咁回應，大大百貨個名好似好熟咁嘅...。
「…係呀...世伯...伯友，頭先我地去左華富間大大執平貨...，啲風褸好抵架，
買左兩件比你地...睇吓啱唔啱著?」阿媽一邊講，一邊遞左袋野比阿爺...。
「...嘩...唔洗咁客氣啦...離食餐無餸飯姐...嘻嘻!!」阿爺雖然話唔洗，但係身體真係好誠實，
笑到四萬咁口雙手接過袋衫...之後即刻拎左兩件風褸出離左睇右睇咁。
「…阿娣姐...我仲買左啲bb衫仔比凱瑩架...你睇吓，我見啲款式都好時毛架...。」
阿爺都未笑完姐，阿媽再拎左第二袋野出離比大姑媽啦。
「…哎喲...連我到有份...，嘻嘻...金喜你真係...太客氣啦!!」
依家又到大姑媽四萬咁口啦...估唔到阿媽真係幾識做人架喎!!
「...阿如...你都有份架!!!」估唔到連姑姐都有喎...
阿媽繼續喺袋度拎左一盒野出離遞左比姑姐。
「...吓...多...多謝...喜姐。」姑姐自己都打左個突...，無諗到連自己都有份咁。
就係咁...成餐飯大家都有講有笑咁，就連開頭對阿媽冇咩好感嘅姑姐都變哂樣咁
...估唔到一份禮物就收買左姑姐...嘻嘻。
食完飯之後，大家就照舊坐哂喺大廳度睇電視，阿嫲就行左去洗碗，
而我依個閒人就緊係爭取機會即刻跟住阿嫲尾走左過廚房果邊啦。
「…er...我幫你手洗碗吖!!!」未講完我已經走左埋去阿嫲身邊準備拎起啲野洗啦。
「...唔洗啦...阿宜...你同佢地一齊睇電視得架啦!!!」阿嫲微笑住咁應我。
「…唔得...我以經冇貢獻架啦，你比我幫吓手啦阿嫲，唔洗我會唔好意思架!!!」
我好堅持咁講，之後冇理到阿嫲就拎起左啲野起勢咁洗。
「...er...咁...咁好啦...。」阿嫲見到我咁堅持...亦都冇再推...，
之後我地兩個人就靜靜地咁一齊洗碗啦。
唔知點解呢...阿嫲真係好小講野...，老左果陣明明好多野講架喎...而且仲...
好錫我添...，而家廚房就靜到連大廳出面嘅電視聲都聽得相當清楚...。
過左幾分鐘之後，阿嫲終於都肯開聲同我講野啦。
「...阿宜...點解你...唔同佢地一齊睇電視嘅?」阿嫲忽然問左我一個咁嘅問題。
「...吓...er...我都唔鍾意睇電視嘅，況且啲電視節目我都唔知做緊咩...。」我諗左一諗之後答。
「…係呢...唔知你屋企...有啲咩人呢?」阿嫲繼續發問。
「…er...阿爸阿媽囉。」我答。
「...冇兄弟姊妹拿?」阿嫲問。
「...冇啦。」我答。
「...吓...咁奇怪嘅...，咁你喺邊樹人呀?」阿嫲問。
「…吓...er...er...er...。」死啦...我係南丫島原居民離架嗎...都冇鄉下嘅...點答喎!!!
「…唔洗er啦...!!!」阿嫲忽然叫停左我。
「...其實阿宜你...根本就唔係大陸落離，而且...你唔係普通人添...。」
阿嫲依然係保持微笑...同頭先一樣都係咁平靜咁講。
「...er...嘻嘻...。」我無言以對...左望右望咁...唔敢面對住阿嫲。
「…雖然我係冇讀過書，但係...其實我有一種好特殊嘅能力，
不過我一直都好小會話比人知。」阿嫲繼續講。
「…咁...咁係咩能力呀?」我好奇問。
「...可以睇到鬼神...，而且仲睇到每個人身上面發出嘅氣牆添!!!」
係喎...好似聽阿爸講過...阿嫲後生果陣有幫人問過米架...
以前成日都覺得係啲呃人嘅野...乜原來...係真架...。
「...我睇得出...阿宜你嘅氣牆...同福頭嘅氣牆有好微妙嘅關係...。」阿嫲好認真咁慢慢講...。
「…er...咩野關係呀???」我繼續扮傻...睇吓阿嫲到底係咪吹水...。
「…血...緣...關...係....!!!」阿嫲用絕對唔會錯嘅語氣慢行咁彈左依四隻字出離..
.睇離阿嫲真係唔係浪得虚名喎!!!
「......。」我而家面都青埋...啞口無言咁...呆左...，唔知應該點做好。
「...講比我知啦...你嘅身世...你知你呃我唔到架啦...。」阿嫲繼續微笑...
而家比起頭先笑得更加燦爛...，於是我都唔轉彎轉抺角啦...將所有野...
豪無保留咁講哂比阿嫲聽。
阿嫲聽完之後嘅反應竟然相當鎮定喎...比起姑姐嘅驚訝樣，
阿嫲就真係面無懼色咁...繼續保持住佢果個親切嘅笑容...。
「...er...點解你...一啲反應都冇嘅?」反而喺我好疑惑咁問返阿嫲轉頭囉。
「...嗯...因為同我預計嘅情況差唔多啦，只係有嘅細節有出入。」阿嫲繼續答。
「…咩野細節位呀?」我繼續追問。
「…我一早估到你係福頭個女，但是就估唔到點解會出現，
開頭仲諗會唔會係福頭個女嘅前世添。」阿嫲大條道理咁講。
「...哦...。」我傻間間咁喺度點頭。
「…乖孫...估唔到有生之年都可以見到你咁大過...真係要多謝天后娘娘呀!!!」
阿嫲忽然間好鬼感性咁攬住左我...個感覺真係好warm。
「...阿嫲吖...2016年你都仲好健壯架，第時要睇埋我啲仔女大架嘛!!!」我講。
「…嗯...係呢...阿宜你有咩打算呀咁???」阿嫲好擔心咁問我。
「...唉......我都唔知呀，想返去囉，但係其實...我都唔知可以用咩方法先返到去。」我嘆住氣咁講。
「…慢慢諗啦...凡事都有因果嘅...可能係上天比你離依度做啲野呢...。」
阿嫲講到好玄咁...唔知佢想表達啲咩呢?
「......因果?」我呆左咁諗緊野...唔通我今次嘅經歷，真係可以幫到我救返阿爸???
「...慢慢諗...放心繼續喺度住啦，阿嫲一定會睇住你...好好照顧你嘅!!!」
阿嫲拍一拍我膊頭繼續微笑住講，搞到我差啲想喊出離咁濟呀，
果份窩心揀直無與倫比，加上阿嫲果一雙令人心醉嘅眼，無論幾冷傲嘅人，
都會比佢溫柔嘅眼神所溶化，阿嫲多謝你呀，你令我有一種他鄉遇故知嘅感覺….好溫暖呀。
就係咁，我同阿嫲喺廚房足足擁抱左幾分鐘，
但係突然聽到有人行緊過離咁喎，到底係邊個呢?