「件事要由幾日前講起。我哋原本都係同班同學,但一啲都唔熟。幾日前,突然有好多痴線佬走入校園咬人,我哋一班同學就走返宿舍二樓飯堂避難,入到去仲見倒其他班嘅人。頭兩日都相安無事,但係之後孝信同幾個同學就話啲嘢食唔夠要出去搵,點知佢哋番嚟之後,就用唔知喺邊搵番嚟嘅槍指嚇我哋,仲話依家開始佢哋話曬事,所有嘢要由佢哋重新安排同分配!」素恩訴説著。

「其中有兩個男仔唔服,走過去同佢哋理論,跟住就大打出手。打咗一陣孝信就走埋其中一個男仔度,一下就扭斷咗佢條頸,另一個男仔諗住走過去報仇,結果同一遭遇。」聽素恩説到這裡,我不禁抹一把汗,我竟然跟這樣的人遇上,還曾經大膽到要放下他不顧。

「跟住佢仲同大家講,話廚房已經冇曬食物,又出唔倒去,之後每日會用抽籤決定殺邊個比大家食,或者有人自願都無任歡迎。不過今日已經有自願者,唔洗再煩大家。跟住就拖咗佢兩個入廚房...」素恩説著開始手震。

「之後我都唔想再講,第一日好多人聞倒味都嘔,全部都冇食,反而嗰幾個揸槍嘅同學食得津津有味...」素恩有點哽咽, Frankie 想過去安慰她,但又好像不知如何入手。

「到咗今朝,有啲人終於忍唔住要食... 我哋幾個女仔就情願餓死都唔食,但係冇幾耐又話要抽籤,我哋一個女同學比佢哋抽中咗。但係佢哋... 佢哋冇殺咗佢先捉入廚房,而係... 而係捉咗佢入去,比佢哋幾個蹂躪咗一輪先聽唔倒佢把聲... 嗚...嗚...嗚...,孝信全程喺出面睇住我哋冇入到去。不過我哋... 我哋原全幫唔倒佢...」素恩已經哭成淚人。



「夠喇,唔好再講喇!」Frankie 終於按捺不住推開我要去安慰素恩,但素恩伸手阻止後續説。「我冇嘢,比我講埋先...」

我把紙巾遞給素恩,她感謝地點頭後説,「到咗夜晚,佢哋發現你哋一行人。佢哋就諗住引你哋過嚟,又話有新女咁...」

「咪住咪住,呢樣我都諗唔明。你哋楝宿舍已經比喪屍重重包圍,就算我哋肯,有咁多屍喺度我哋都過唔倒去啦?」我想不明白。

「呢樣真係問嗰啲人先知...」素恩嘗試解釋,「不過之前我哋見過佢哋將的人肉掛咗去宿舍嘅另一邊窗,啲喪屍叫聲又好似走曬去有掛肉嗰便。我諗呢個係佢哋用嚟引開喪屍嘅方法,又或者...」

「又或者係引我哋去試下個效果...」我搶先道。



「Bingo, you are so clever! 我都係咁諗呀!」在素恩讚美的同時,我感到一道凌勵的目光從某人射向我。

「咁,之後呢?」我立刻轉移話題。

「之後就有啲從未聽過嘅怪叫聲,跟住就有的好似人猿嘅怪物出現喺窗邊。孝信喺呢個時候突然打開度門叫我哋即刻走,我同幾個同學走落去就遇到喪屍,跟住我哋就返轉頭,上返去就見倒孝信走去另一邊,我同我啲同學就跟住佢走。走咗一陣,我聽倒後面好大聲嘅開門聲,跟住就係慘叫聲。我唔敢再向後望,到我走到落樓下嗰陣,已經剩番我同我個同學...」素恩再開始哽咽。

「點知... 點知原來佢個膊頭有比喪屍搲倒,跟住就喺度喊話唔想死。跟住孝信突然走過嚟向住佢個頭,就一刀... 嗚...嗚...嗚...」素恩抺一抺眼淚,「跟住就同我講,唔想好似我同學咁,就要聽佢説話做。我唯有跟住佢,之後就見倒你哋。本身喺佢叫你哋行先嗰陣,我想同你講唔好信佢,佢係壞人。不過佢阻住我答,之後仲同我講,你而家夠膽講,信唔信我殺曬你哋全部人?」

「咁我唯有跟佢指示做,走到一半,突然孝信停低咗,然後後頸一陣劇痛,我就失去知覺...」我用失望的表情看著素恩,素恩看在眼裡,便道,「對唔住,我睇唔倒孝信點帶你朋友走...」



「咁之後就嚟咗呢度!」Frankie 説著廢話作結,車內沒有人作出反應。

「點都好,好多謝你救我嚟呢度!」冷不防素恩向我的臉吻了一下。

「唓...冇乜大不了啫!比著我都會咁做啦!夜喇,瞓先喇,如果人有三急就喺嗰邊攞個膠袋攪掂啦,記住要包好,唔好攪到周圍都係!」Frankie 不忿地説。

「其實,你哋有冇嘢食?我已經兩日冇食嘢...」素恩尷尬地問。

「吖,我哋啲嘢食...」我們所有的糧水已經與 Karen 一起,被孝信拿去。

「哈,冇嘢食哩?」Frankie 忽然在後座彈起來,「嗱,呢包係我僅有嘅乾糧,我比你食吖...」

「多,多謝你...」素恩的笑容很美。

「唔洗客氣,你...慢慢食吖,我瞓先,goodnight!」Frankie 瞬間被融化。



「照咁睇,孝信都應該識廣東話?」我大膽推斷。

「Yup, 我哋其中一科有學。」素恩印證了我的想法。「同埋,我覺得孝信應該唔係韓國人... 吖,我係指南韓人...」
已有 0 人追稿