「我哋頭先諗住上番嚟富寶搵番你,點知行咗一陣就比一架迎面嚟嘅貨車截停咗。Coco 有諗過褪後行,點知架車又死咗火,撻極都撻唔著。」Carey 説道。

「Coco 就叫我哋唔洗驚,睇定啲先,我哋 lock 咗度門佢哋應該做唔倒啲乜。點知我哋見倒佢哋就係之前比我哋偷車嗰班男人,有個仲攞住個大搥。Coco 見到即刻叫我哋落車分頭走!」她續説。

「我一直向富寶呢邊走,走咗一陣唔見有人追嚟,於是就望番轉頭...」Carey 忽然眼泛淚光,「點知... 點知就見倒 Coco 已經比兩個男人捉住咗,我就即刻走番轉頭想幫手,點知其中一個男人發現我就追過嚟,Coco 見倒我就大叫,"走呀!搵阿 Roy 呀!",個男人就打咗佢個肚一拳,之後就冇再講嘢...」

「我即刻轉身就走,衝落樓梯過嚟富寶,諗住搵你幫手,點知我落到嚟唔係好識路,又驚佢哋會追嚟,所以咪匿埋喺一邊先囉。」

「等咗唔知幾耐,我隱約聽到有車聲,覺得應該係佢哋,於是就膽粗粗裝吓囉,結果比我見到佢地扚咗 Coco 落車,不過就唔見 Heidi。」



「即係 Heidi 走甩咗?」我問。

「應該係啩,我哋一落車就向唔同方向走,佢走咗去西沙路嗰邊。可能佢一心想番新港城搵 Johnson 啩。」Carey 稍為停頓,「不過走嗰邊應該凶多吉少,我哋坐緊車嗰陣,都見唔少喪屍喺附近...」

「希望佢冇事啦...不過,而家最迫切係救番 Coco。」我説道。

「係,照我頭先睇,佢應該比人捉咗去商場嗰邊... 我頭先跟咗一半就唔敢再走出去,因為嗰度太空曠好易比人發現,我唯有走返去附近搵你,搵吓搵吓就喺度見番你。」Carey 答道。

「咁你見唔見倒佢哋有幾多人?」我想衡量一下危險性。



「我見到有三個,不過我離遠見到佢哋企咗喺門口度一陣,似係等人開門入商場,所以我諗佢哋仲有其他人喺入面。」Carey 分析道。

現在,我手上只有一支不知道還有多少子彈的手槍,若要制服四個或以上的人,真的沒有勝算。更何況以上次相遇的經歷,那些人看似不易對付。

以我現在擁有的實力,盲目出頭只會是白白犧牲。

但 Coco 最後都把寄望放在我身上,要 Carey 逃走以向我求救,我逃避豈不是辜負了她對我的信任?

但我們只是相識了短短一天,我值得為她們冒險嗎?



天使與魔鬼在交戰...

「Carey,我決定潛入去救 Coco,不過妳唔好跟住嚟喇。」我的英雄感又再作祟。

Carey 看著我欲言又止。

「嗱,妳攞住枝槍,試吓返番去健康院,起碼嗰度安全啲。記住,妳一㩒呢個制就會開槍,所以小心唔好走火射倒自己。開槍時會有好大嘅反撞力,所以一定要揸緊。」我細心地向 Carey 解釋。

「我唔走!Coco 為咗比我走先比人捉住,我唔可以就咁走咗去!我要同你一齊入去!」Carey 説得熱血沸騰。

「妳聽我講啦!」我雙手捉著她雙肩説,「入到去九死一生,妳無謂去冒險。更何況,妳如果比佢哋捉住,未必淨係死咁簡單。」

「咁,我有咩可以幫倒你?」Carey 態度有點軟化。

「吖... 錫我一啖啦!」我打趣地説。



Carey 望著我,面色一沉道,「我都話我有男朋友㗎咯,我唔係咁隨便...」

「我講笑咋嘛,生死關頭,口痕吓啫,千祈唔好誤會...」我摸著後腦打完場道。

「好,我應承你,不過要你完完整整出番嚟先,我會匿埋喺一邊等埋你先走,所以唔好放我飛機!」Carey 紅著臉説道。

「如果我有命出番嚟,可唔可以唔浄係錫先?」我又再次不經大腦,衝口而出。

「你好喇喎!唔好得寸進尺喎,再係咁我就唔再理你喇!」Carey 生氣的樣子十分可愛。

「好啦,對唔住喇,唔好嬲喇!記住自己要小心啲,如果黃昏前唔見我,妳就自己番去喇!夜媽媽番去會好危險...」我對她作最後的提點。

「我有分數啦!總知你唔出嚟,我就唔走!所以如果你唔放心我,就記住要出番嚟,知冇?」她突然好像對小孩訓話,樣子十分可笑。



「Yes madam!」我收起笑容,認真的對她説,「好喇,我真係要出發喇,自己小心啲。」

説罷我便將身上的背囊交給她揹著,然後頭也不回地向商場方向跑去。

「你都要小心呀!」Carey 沒有理會四周的環境,説出老套的對白。但現在對我來説,卻是十分窩心。

我沒有回頭,只報以一個 "OK" 的手勢便向前奔去...
已有 0 人追稿