「Hello 阿 Ben!好耐冇見... 吖,仲有 Kimi 同 Eva 都喺度...」這一次真是得來全不費功夫。

「你哋唔係喺村屋嗰度㗎咩,點解會出咗嚟嘅?」為免他們問我來到這裡的原因,所以打算先問一問他們的情況,以分散注意力。

「唉... 唔好提喇... 你哋走咗之後唔夠兩日,就有班兇神惡煞嘅人破門入屋,大肆搜掠之後就走咗。所有嘢食呀,日用品呀通通比佢哋攞曬...」Ben 失落地説著,「我哋冇曬嘢食,唯有出去揾啦!點知村屋附近已經十室九空,唯有同埋幾個村民過嚟馬鞍山呢邊囉...」

「佢哋有個人有七人車嘅,於是佢就車埋我哋出市中心。中途都見倒有唔少喪屍,不過對我哋冇乜影響。去到差唔多見倒市中心,就聽倒好大嘅"砰砰嘭嘭"聲,好似打仗咁,又好鬼大煙,於是司機就"屈"咗上嚟錦英呢度。」Ben 續説。

「我哋兜咗一個圈,見附近冇乜喪屍,就諗住落車行去商場搵嘢食。點知我哋一落車啲喪屍就撲出嚟,揸車嗰個人就即刻唔理我哋開車走...」Ben 説時把拳頭握緊。



「之後就唔想再講... 好彩嘅係,我哋走到百佳門口求救,裡面啲人肯開門比我哋,我哋先走得甩。不過,如果唔係其他村民嘅犠牲,我哋都未必有時間等佢哋開門入嚟...」Ben 好像有點傷心。

「放心啦!而家咪冇事囉!」我安慰道。

「唉... 之前我都咁諗... 直至今朝有班人嚟發現咗我哋,好彩我哋人多,佢哋冇我哋辦法,不過佢哋話今晚會搵齊人再嚟...」Ben 咬牙切齒地説,「佢哋班人當中,有個你都識...」

「強哥...」我衝口而出。

「吓... 你一估就估倒?」Ben 對此表示驚訝。



我遲疑了一會,決定將強哥捉住 Coco 的事和盤托出。

「咁... 而家你乜都講曬比我哋知,你點去救佢哋?」Ben 好奇問。

「唔... 其實我有一個大膽嘅諗法,不過唔知大家支唔支持...」我打算説出我的想法。

「你... 唔會打算叫我哋幫手啩?」説話的是 Eva,「要我哋去冒險,勢係假囉!我同你啲 friend 三九唔識七,憑乜要我哋幫你?就憑你入嚟講幾句嘢?」

「同埋你係咁問我哋套料,咁不如你又答吓我你點入嚟嘅?你啲 friend 同個八婆又去咗邊?」Eva 咄咄逼人。



我開始後悔將一切都和盤托出,我開始認同強哥的説法,這個 Eva 真的是切切實實的一個八婆。

「佢係我帶入嚟嘅,有咩問題?」不知何時素恩已經離開了職員辦公室,站在我的身後。

「吓... 話帶就帶,妳當呢度善堂呀?」Eva 依舊一副臭嘴臉。

「呢度唔係妳屋企,我唔洗妳批准!」素恩有點怒氣。

「呵呵,咪以為揸住幾枝箭就巴支閉,番去食泡菜啦,泡菜妹!」Eva 不肯退讓。

「我至少識得射箭保護自己吖,好過妳淨係識靠男人!」素恩不忿地説。

「我剩係靠男人,頭先我冇出去搵武器嘅?你哋一句話要準備佢哋嚟,我哋就算唔想打嘅都要去幫手,Ben,你評吓理啦!」Eva 充滿霸氣。

「係囉,Eva 真係幫咗唔少...」Ben 無奈和議道。



「阿 Ben,我真係服咗你喇!」我再也按捺不住,「反正你哋今晚都諗住對抗佢哋,與其守株待兔,倒不如主動出擊啦!」

「你唔洗講喇!總之我哋唔會陪你去送死!」Eva 得意地説。

「咁好啦,等強哥今晚嚟到溶咗你啦!」我説。

「哼!洗乜驚喎,我哋大把人!」Eva 不屑地回應。

「唉... 人蠢真係無辦法,佢哋已經知我哋有幾多人,人哋返得嚟嘅,就一定做足準備。更何況,我哋啲人都出咗去一排,點解淨係得我哋幾個返嚟?其他人又去咗邊?」素恩分析著説。

「你唔洗凶我!總之我哋就唔會走㗎喇,你要去死我唔阻你!」Eva 仍舊寸步不讓。

「好,咁我哋走!」素恩説著已步向側門。



「阿 Roy,可唔可以帶埋我走呀?」説話的竟是久未發聲的 Kimi。

「Kimi 你冇嘢呀嘛?」Eva 不悦地説,「我哋一路照顧妳嚟倒呢度,而家你就背叛我哋走咗去?」

「我... 我唔想再做你哋個妹仔呀!呢幾日你哋當正我下人咁洗,所有下欄嘢全部都比我做,我真係受夠喇!我要過番自己嘅生活!」Kimi 控訴著。

「吓,如果冇我哋包食包住,妳會過得咁易?妳淨係負責洗吓嘢清潔吓咋喎,有咩問題?」Eva 續説。

「咁都係頭兩日嘅事啦!咁過到嚟點解都要我去做呢啲嘢?」Kimi 仍心有不甘。

「呵呵... 無我哋頭兩日去照顧妳,妳仲邊得嚟有之後呀?妳去做番啲嘢係咪好應該呀?」Eva 真的可以把歪理都説成真理。

「算啦 Kimi,妳無謂再同佢嘈啦。妳 join 埋我哋一齊走啦,由得佢自 high 啦!」我真的不想再聽 Eva 的歪理。

「哼!妳走咗唔好返番嚟求我收留呀!」Eva 説罷便轉身走入店內...
已有 0 人追稿