［人性/有甜］- 屍•家•馬鞍山（隔日更新）: Chapter 83 - 魔鬼的接觸

我決定相信我的感覺。

「唔洗喇，等我返去同我啲朋友商量吓先，再傾！」説著我已經返回我的單位，準備把鐵閘打開。

幸好，他並沒有追出來。

回到單位之後，我便立刻關閉大門，下意識把防盜鏈也鎖上。

「出面，有喪屍呀？」突然的聲響令我嚇了一跳，剛才進來時實在太過驚慌，根本沒有為意 Coco 已經坐在梳化上。



「做乜嚇到鼻哥窿都冇肉呀？」Coco 對我的行為覺得奇怪。

於是我如實向 Coco 道出剛才所見。

「阿 Roy 你係咪好得閒呢？無啦啦嘢埋啲怪人！你唔顧吓自己，都顧吓我哋倆個女人仔吖！過咗咁耐，你仲覺得有人咁單純，毫無私心咁一齊對抗啲喪屍呀？」Coco 有點生氣道。

「你話我話啦，啲男人就算肯幫手，都係基於佢哋最原始食嘢同生殖嘅慾望。更何況，而家正正係佢地可以將慾望發揮到極致嘅時候... 所以如果比我揀，我情願搵番琴日救我哋嗰個女仔好過，起碼唔洗擔心比佢攪吖...」Coco 續説。

「我都想搵番佢，不過我都唔知佢走咗去邊！至多聽日一天光就出去碰吓運氣喇。係呢，Carey 佢點呀？」我問道。



「佢冇乜嘢，話想自己靜吓喎...」Coco 突然向我的手臂打了一下，「最衰都係你，人哋守身如玉咁等男朋友喺外國返嚟，你唔該都冇聲就將佢嘅第一次攞咗去，傷心死佢啦... 佢男友對佢好好㗎，最難得佢又肯結咗婚先會曳曳... 而家攪成咁，我諗佢一定憎死你！」

「喂，你都知唔關我事㗎啦！」我心感無辜地説。

「我唔知你呀！當初你又話照直講，突然又講啲唔講啲，我唯有就住你講咁衰囉，唔係點連戲呀？」Coco 怪責著我。

「如果你依家後悔，咪入去講返個真相比佢聽囉！可能佢會原諒你呢！」Coco 提議著説。

「唔喇，當初諗咗咁講，就遇咗要自己受。佢都係女仔嚟，咁樣講好似易接受啲...」我解釋道。



「隨便你！」Coco 好像有點不滿，「咁你嚟緊諗住點？」

「我想返健康院搵番細佬先，如果情況許可嘅話，就去搵埋琴日個女仔...」我道出我的計劃。

「我覺得個女仔唔係咁簡單，佢可以一個人喺咁嘅環境下生存，仲有一種久經訓練嘅處事手法，所以佢一定唔簡單。」Coco 托著頭説道。

「你見得佢嗰一陣，點會幻想倒咁多嘢㗎！」我雖然口中質疑著她的説話，但其實我亦曾經想過這問題。

「女人嘅直覺，唔信就算！不過你要小心啲...」Coco 提醒著我。

「咦？妳擔心我呀？」我不忘取笑她一下。

「你慳啲啦！你要嘅真愛係入面，我講咗你唔係我杯茶㗎啦！我廢時你連累我咋！」Coco 突然又恢復認真地説道。

之後我們亦有討論，在車隊中發現到強哥用過的貨車，但由於掌握的資料不多，現階段我們只有小心防備。



入夜後 Coco 凖備了一餐簡單的晚飯，由於要小心避免被人發現，我們只是開啟了一些基本的燈光作照明之用。

Carey 亦有離開房間用膳，由於燈光暗淡，她又不肯跟我同枱吃飯，我無法看清她的面容。但感覺上，她應該沒有大礙。

飯後她們各自返回房間，我亦理所當然地當起廳長來。

不知道睡了多少時間，忽然被數下急速的門鐘聲吵醒，看看電話，時間是凌晨一時正。

我在梳化上爬起來，然後在防盜眼窺看，門外站著的是隔壁的男子。

Coco 和 Carey 亦被吵醒，我示意她們靜靜返回房間。

我檢查確認防盜鏈繋穩之後，便打開大門在門隙中與他交談。



「喂，兄弟，有冇計傾先？」男人説話直接了當。

「咁夜喇，有咩都聽日先講啦！」我想把他打發。

「你同啲 friend 傾成點呀？啲喪屍喺夜晚冇咁活躍，如果出去就要行㗎喇！」他説著。

我對他得知喪屍的弱點有些驚訝，但他剛才不是説過因危險而沒有離開單位嗎？還是他之前曾經遇過喪屍，之後才逃到這裡？

這個人相當可疑。

「都係唔喇，我哋走咗一日都好攰，都係聽日先再決定啦！」説著我便想把大門關閉。

「啪」不知何時，門隙被放置了一條鐵枝把門堵住，令大門沒法關閉。

我連忙蹲下打算把鐵枝拉出，冷不防男子已經把外面的鐵閘拉開。



「碰！」就在我差不多把鐵枝拉出之時，木門已經被男人大力用腳蹬開，防盜鏈受不住衝擊斷裂。而我則被開門的衝力撞得頭破血流，跌坐在地上。

「哈哈，你哋究竟係行得攰，定扑嘢扑得攰呀？仲唔乖乖哋叫你條女出嚟？哈哈哈...」血流披面的我，彷彿看見一個惡魔，驟然出現在眼前...