三男看見我後十分驚訝,立刻放開 Venci 與我對峙。

Venci 立刻拿起衣物走向我身後,瑟縮在一旁。

「你... 你唔係受咗重傷㗎咩?咪喺度死撐喎!」領頭青年問道。

「你哋過嚟咪知堅定流囉!」我挑釁著他們説。

「兄弟,我哋一齊上!」領頭青年説罷便作狀向我衝來,可結果只是另外兩人出現在我的跟前。



我揮動拳頭出擊,轉眼已經把兩人擊退。當意會到衝出來的只有他們二人時,他們都不約而同地咒罵著,「我頂你吖,又話一齊上?你竟然縮沙!」

領頭青年二話不説,便推開二人奪門而出,其餘兩人亦立刻跟著。

我隨即把大門鎖上,然後去關顧一下心靈受創的 Venci。

「你個衰人,再遲啲先出嚟吖!叫咗咁耐都唔出嚟救我!」已經穿好衫褲的 Venci 向我責罵道。

「我咪出緊嚟囉,妳估我真係好番曬咩,我隻腳仲痛緊㗎!」為了掩飾真相,我決定把病情誇大。



「吓... 我仲以為你行得走得添...」Venci 雖然帶著懷疑的眼神,但也不好意思再質疑我的傷勢。

始終在常人看來,我的傷勢一點也不輕...

我就這樣在 Venci 家中多休息了一會,吃過午飯後,是時候再出發去繼續我的任務。

至少,我亦應該回去向孝信報告,以免對 Carey 她們不利。

「Venci,都係時候要走喇!我仲有嘢要做,好開心識倒妳。」我與 Venci 道別。



「吓,你咁快要走嗱?你走咗,啲衰人返嚟點算呀?」Venci 擔憂地説道,「之前都有阿俊保護我,但係而家佢攪成咁...」

「呢度唔係有保安隊之類㗎咩,乜冇人維持秩序㗎?」我問道。

「係就係有,不過佢哋幫我唔倒。因為頭先嗰個𡃁仔唔係普通人,佢係呢度最高話事人嘅細佬。所以,佢可以喺呢度蝦蝦霸霸...」Venci 答道。

「又係一啲狐假虎威嘅人。得,我幫你解決佢先走。」我説。

「你唔好呀!你殺咗佢跟住又走咗去,呢人嚟搵我報仇咪一樣...」Venci 好像説得不無道理。

「咁又唔得、咁又唔得,你教我點做喇?」我開始感到不耐煩。

「咁不如你留低啦!一係就帶埋我走!」Venci 竟也毫不客氣地説出她的要求。

「阿小姐,我好似同妳唔係咁熟㗎喎,同埋而家係妳欠我嘢,唔係我欠妳。唔好講到我一定要負責任咁!總知我而家就要走!」我終於忍不住惡言相向。



「我都唔係咁嘅意思... 咁人哋真係唔知點算吖嘛!」Venci 突然改變態度,「呀!差的唔記得,琴日應承救你嗰個阿頭,話等你醒番就帶你去搵佢喎!」

我半信半疑,「係真唔係呀?無啦啦做乜要見我?」

「真㗎,不過佢話同你講強哥搵你,你就一定會去㗎喎!」Venci 答道。

為何強哥會在這裡出現?

他該不會是逃跑到這裡吧。還是,他原本就是無間道。

不過,這也是個得來全不費功夫的機會。

「你咁講好啦!不過,妳可唔可以幫我搵吓有冇輪椅之類... 我隻腳仲好痛,唔係咁方便四圍行...」我不能確定強哥到底是怎樣的人,於是打算藉此降低他的戒心。



「你啱啱先話要走,而家又話行唔倒,咪玩啦!」Venci 質疑著。

「係,我有心扮行動唔方便嘅!不過妳應承我,唔好爆我出嚟,人命攸關。」我請求 Venci 與我配合。

「Okay,我應承你冇問題,不過你都要應承認我做男朋友,無論咩人問到都要咁講!」她亦提出條件,「同你個要求一樣,人命攸關!」

我雖然可以將她欠我的人情去命令她,但我又覺得應承她沒有什麼不妥,於是便爽快答應。

「口講無憑,鈎手指尾吖!」Venci 提出小孩般的要求,我亦在不太情願下跟著做。

「如果反悔,你就以後都唔準走,留喺度負責保護我一世!」Venci 突然新增了這個條款。

「喂!」她沒有給予我時間去反駁,便頭也不回的走了出去。

我突然覺得有一點不安,但卻也想不出來自哪裡。



我不讓自己胡思亂想,因我必須預備好之後將會發生的事情。

強哥為何會出現在這裡,還對我出手相救?他究竟是什麼身分,而我亦應否繼續執行孝信給予的任務?

看來待會要先跟他弄清楚...
已有 0 人追稿