［人性/有甜］- 屍•家•馬鞍山（隔日更新）: Chapter 283 - Jacky 的變異

原來，孝信曾經說過關於病毒解藥的傳聞，是真確的存在。

而這些珍貴的東西，卻不幸在我手中溜走。

「咁其實嗰啲病毒抗體，係咪即係喪屍病毒嘅解藥？」我想確認一下。

「你可以咁理解，不過如果你問我，我就會答唔肯定。因為未經臨床測試嘅抗體，我哋完全唔知道佢嘅特性、成效、抗藥性同埋副作用。所以我哋只可以講，呢隻抗體仍然屬於理論嘅階段。」

「不過，其中一枝就用咗喺 Jacky 身上，結果就話比我知，呢樣嘢嘅特性都唔係咁穩定...」



「吓，你意思係 Jacky 打過嗰啲針？」我明知故問。

「係！就係喺一次佢同你哋啲人打嗰陣，迫於無奈打嘅！」Veronica 説得有點激憤，「雖然佢最後打贏咗，但就變咗一頭怪物！」

「我之前都同佢交過手，但佢比我個感覺，好似仲擁有人類意識咁。」我回憶起與 Jacky 交戰的情況。

「你某程度上講得好啱，不過，你唔會知道佢嘅所謂意識，會喺幾時出現、幾時又突然消失。而當佢個意識消失嘅時候，佢就係一頭好恐怖嘅怪物。」

「而我亦開始發覺倒，佢有意識嘅時候已經越嚟越少。雖然我喺佢不斷變大嘅外表睇嚟，佢嘅力量都不斷咁增強。但係同一時間，佢已經越嚟越比肉慾所支配。」



「妳嘅意思係，佢攪啲女人可以增強自己嘅力量？」我只想印證一下，自己所知的是否正確。

「其實喪屍事件之後，我哋都分析過呢種病毒。發現佢同我哋之前研究過嘅瘋狗症同愛滋病嘅混合病毒非常相似，只不過喪屍病毒比佢哋更加活躍同具攻擊性。」

「所以感染咗喪屍病毒嘅人，大腦同血管會漸漸比急於將自己傳播嘅病毒侵蝕，然後不斷擴大人類嘅饑餓感，令佢哋可以籍由襲擊其他人，不斷咁將病毒傳染開去。」

「而其實隻病毒本身，係有擴大人類性慾同食慾嘅特性，因為佢哋都係主要嘅血液或體液傳播媒介。對於唔能夠生活喺空氣中嘅病毒嚟講，呢個係最 effective 嘅方法。」

「不過，由於病毒侵蝕同支配咗人類嘅大腦，冇咗大腦嘅協調同指揮，病毒只可以控制人類最本能嘅動作，就係咬！」



「所以一般街上面遇倒嘅感染者，都只係會追住其他人嚟咬，而你唔會見到佢哋四周圍強姦人。」

「咁 Jacky 即係唔屬於一般喪屍啦！」我進一步追問。

「嗯...」Veronica 好像若有所思，「因為我哋製造出嚟嘅血清當中，加入咗一樣嘢。」

「一種應該係嚟自，帶有病毒原胚嘅感染者血清。」

我聽後突然感到毛孔直豎，幸好她好像沒有發現異樣。

「自從加入咗呢種血清之後，我哋發現病毒嘅不穩定性減少咗，而由我對 Jacky 打入咗病毒之後嘅觀察，呢隻變種病毒初頭只會寄生喺感染者身上，而唔會即刻入侵。所以感染者都會有自己嘅意識。」

「不過隻病毒依然會不斷影響大腦，放大感染者對慾望嘅需求，間接去支配住佢哋嘅行為。而喺呢個過程中，身體嘅細胞亦慢慢咁同病毒融合，令到感染者體格力量各方便得以上升。我諗呢個都係病毒製造者嘅目的...」

「咁 Jacky 算唔算係成功嘅實驗品？」我立即追問，因為這好像也跟我有著切身的關係。



「絕對唔係！」Veronica 斬釘截鐵地答道，「Jacky 係喺完全無接觸過喪屍病毒之下，突然注入咗高濃度嘅血清。咁就由原本冇中毒，變成中咗毒，仲要隻病毒犀利過普通喪屍病毒好多...」

「結果就係你見倒咁，佢開始越嚟越強大，但同時又越嚟越喪失理智。所以每次我見佢都好危險，雖然佢應該唔會殺死我，不過遇正佢失去理智嗰陣，我嘅下場就好似你前度一樣...」

說到這裡，她也不禁黯然神傷，但我卻沒有多加理會，只想她解答我一連串的疑問。

「既然啲抗體咁唔隱定，點解當初妳又會比枝嘢佢嘅？」我好奇問。

「枝嘢唔係我比佢㗎！」Veronica 突然提高聲浪答道，「我事後諗返，應該係佢幫我放啲針入手提喼嗰陣，偷偷攞咗一枝。」

「因為我曾經同佢講過，啲針嘅威力同副作用。如果唔係佢一心想保護我，佢都唔會變成咁。」

「所以，我係好憎你呢班人！」Veronica 的眼神變得凌厲，把我突然嚇了一跳。



「吼～～～」漆黑的山洞中，突然傳出 Jacky 的叫聲。

「Veronica，妳！」我立刻從後挾持著她，希望 Jacky 投鼠忌器讓我們逃走。

「素恩，同 Janice 走先呀！」我立刻往素恩喝道。

可是，一切已經太遲。