因為件事整到成個人都悶悶不樂,就算同阿琪一齊食過飯,都只係開心過一陣就DOWN返。唔知點解,今日個夜晚特別靜,果種靜唔係講緊聲音,亦都唔係講緊環境,而係心境。

個心靜到,平時鄰居係隔離吵交就覺得煩,今晚竟然想聽下佢地究竟吵咩,靜到每日樓上淋花果陣一定會整到D衫濕想鬧爆佢,但今晚竟然望住D水滴濕D衫都唔理,靜到平時部電話會因為GROUP D MSG勁多響唔停而整到我要熄左個提示,今日我就由佢響都唔介意。

腦入面不停諗今日三個人講過既野,果三個人,係阿琪、阿珍同埋阿塔。

愛一個人好傻,但等一個人仲傻……唔知,我會唔會變成阿珍咁樣,要等阿琪呢?如果係,我又可以等幾耐呢?

慢慢咁,我身邊每到一定時候,都會換左一批朋友……如果呢D係成為女神既代價,我諗阿琪一定會放棄唔做女神,雖然我識佢日子少,但我覺得佢會。



叫我比佢自己一個人好好咁走開,叫我尊重佢最後既灑脫,唔好再踐踏佢既尊嚴……究竟要對待到邊一個地步,一個人先會同另一個人講呢番說話呢?

我望住樓上滴落黎既水,不停係到反思緊,其實,有好多人自願做兵都無徵求其他人同意,咁樣都係一件煩事……

「死仔!」邊個,係邊個一巴打落本牛爺既頭度……「望住D水整濕D衫都唔幫手收!作死你啊!」原來係老牛大人。

「阿爸……」我傻笑咁望住老牛大人。

「都唔知係未你娘親生你時食錯野,生你生到成日傻笑咁,快D幫手啦,一陣你娘親見到實打死你。」老牛一邊收D衫遞比我,一路講。



「阿爸……」我話。

「咩事啊,口疾疾咁,搞大左邊條女個肚啊。」佢成日都係咁。

「邊有啊!我點敢!」我答。

「咁無用架,我係你咁大果陣已經搞大你娘親個肚啦,唔係點會生咁多。」佢一路講一路笑。

好耐都無同佢一齊收衫,而我係收衫時,就講左呢排發生既野佢知,當然包括阿珍同阿塔件事,而老牛大人既結論係:「都唔撚知你地而家D後生點拍拖既,都唔珍惜既。」



「唔珍惜?」我問。

「緊係啦,我同你娘親果陣邊有而家科技咁先進啊,無電話架我地兩個,約會早一日去到佢屋企話佢知,講好晒地點時間,第二日一定盡時到講果個地點,所有野排晒行程,點似而家咁,有WHATSAPP有玩LINE,有咩唔清楚SEND個MSG再問,但又唔撚知點解你地多左D咁方便既野,愈問仲可以愈唔清晰,約定都可以遲到,以前約地點有目的地,而家你地D後生約就興約果區等,唔見人,用係一個LINE搞店,我果陣邊有LINE玩,奶就有得我玩拿話你聽。」老牛大人一臉睬你都費事講,但又可以講得咁大段。

我聽到佢咁講後,笑左笑問:「玩奶啊,玩邊個架?」

「關你鬼事咩死仔。」佢又一巴打左落黎。

老牛大人又講得岩既,可能因為而家我地呢一輩太過唔珍惜,先會有咁多咁唔健康既愛情。