[愛情無限loop] 就係咁，我做左女神一年既備胎: ３９　海濱公園

成餐飯野都未黎我地兩個就走左，我捉住阿琪隻手行左陣先發覺原來我捉住左佢，即刻縮返手，「對唔住啊，有無整痛妳啊。」雖然係捉住手臂位。

阿琪微笑話：「無啊……但我地而家去邊度食野好啊？」

我望一望四圍，眼見好多地方都已經坐滿晒人，一時間都唔知去邊度好，而係呢個時候，阿琪拉一拉我衫尾，指一指遠方既一檔車仔檔。

我望一望過去，然後問佢：「妳想食？」

「係啊……定係唔食車仔檔架，如果唔食我地可以食其他野。」「傻啦，邊有香港人唔鐘意食車仔檔架。」我係佢未講完就講。



「咁……」佢露出左成副為食樣出黎。

「知拿為食豬，我地去買啦，買完搵個地方坐得慢慢食。」講完之後，我同佢並肩行到果埋車仔檔度。

「呢度好熱鬧啊，仲好多野食添。」阿琪真係一見到野食對眼就發光，而我就係見到阿琪咁開心我隻眼就發光。

「有好多野我都想食。」佢轉左個頭過黎同我講。

「咁未買囉。」我笑住咁話。



「岩聽。」佢好得意咁笑一笑。

人多既地方，就即係擠擁，我同阿琪並肩既距離，慢慢咁縮短……

「你睇下，係生菜魚肉啊。」「係ＷＯ。」

我地靠到好埋，講野都近乎面貼面咁。

「燴蕃薯你食唔食架？」「呢個超鐘意。」



我地兩個隻手，係空氣中獨碰左無數次。

「魚蛋啊！」「呢個一定要買。」

我記得，我係阿琪身後，而佢個身輕輕咁靠住我。

我地既距離，就係咁樣慢慢咁拉近。

買左野食，阿琪提意買兩支果酒飲，而我就提意左一個地點，佢聽到之後都話好。

我地係呢個海濱公園，吹住海風，雖然就到冬天，但而家都未轉凍，我地食住岩岩買返黎，好熱既野食，兩個人狼吞虎嚥，大家都笑大定既食相。

食食下，阿琪伸左一粒魚蛋過黎，「食魚蛋。」

我張開口，咬走左粒魚蛋，係佢既笑容下，呢一粒魚蛋更加好食。



而我係夜色下，昏暗既光照射，見到佢食到下巴污糟左，我拎左一張紙巾出黎，同阿琪講：「唔好郁。」

「咩事啊？」阿琪仲好為食咁咬緊野，而我，就好細心望住佢，慢慢幫佢抹……我地兩個慢慢四目交投，而阿琪，開口話：「我本身今日好唔開心架。」

「唔開心？」我問。

「嗯。」阿琪點左點頭。