[愛情無限loop] 就係咁，我做左女神一年既備胎: ４１　愛心宵夜？

阿琪聽到我講完後，笑到而家，而我就傻笑望住佢問：「有咩野咁好笑？」

「邊有人會叫另一個人欺負自己架。」阿琪話。

「見係妳我先咁講咋。」我答。

「唔信。」佢講完之後就企左起身，行左出個走廊度，「如果真係要欺負你，你會好慘架。」

「放馬過黎，我先唔驚。」我望住呢一刻阿琪既背影，係夜境下既佢，更加靚。



食完野，飲完野，傾左好耐去到好夜，我同佢坐車返屋企，係同一個落車既地點落左車後，我問佢：「送妳返去好唔好？」

點解？點解係漆黑既夜晚都可以佈滿粉紅色既？就連一盞街燈，甚至連車燈，都好似變晒做粉紅色。

呢一種愛既感覺，我有幾耐無感受過？

就當行到阿琪屋企樓下，出現左一個人，一個我同阿琪都識既人。

「咦？阿富？點解你會係度既？」阿琪問。



大家仲記唔記得我講過係跑ＧＲＯＵＰ入面有一個公認係好好先生既男人，而家係我地眼前呢個人就係，所有團友都想接近佢，但可惜佢一早就名花有主，有女朋友。佢一手我拎住個公事包，而另一隻手就拎住一袋野食，行到我地面前話：「無，我見我經過樓下，諗坐買D野比妳食姐。」

阿富真係好人到咁。

「唔駛拿，頭先我同牛兄食左好多野。」阿琪好滿足咀話。

「咁拎返去做宵夜啦。」阿富佢微笑咁講。

阿富佢係一個好勁既暖男，再加上佢笑起上黎有小酒窩果下，真係吸引左好多女FANS，阿琪見到佢個酒窩，都笑到收唔到聲話：「你個小酒窩真係好得意。」



「咁你要唔要D野食？」阿富又問。

「好啦，我當宵夜啦。」阿琪最後都係拎左。

送完佢返屋企，我走果陣又撞到阿富。

「阿牛。」佢叫停我。

「咁夜你仲未返去？」我問佢。

「無啊，想問你頭先同阿琪去邊姐？」佢問。

「佢話想去睇鞋，所以陪佢去睇姐，咩事？」我講完反問返佢。

「無啊，問下姐，夜拿，你都快D返屋企啦。」阿富講完就走左，佢既背影，有好大量既失落同膽憂。



就係呢個時候，我收到阿琪既MSG。

阿琪：好多野食，點算好？
我：妳自己話要既（喊笑）
阿琪：我怕佢死都唔走，好尷尬嘛
阿琪：佢成日都會無啦啦話買左D野食比我
阿琪：叫我去拎架
我：咁好，咁未岩晒妳個為食豬囉
阿琪：咁又係

聽到阿琪既說話後，我覺得阿富呢D行為好似有D問題，但係咩問題我又睇唔出⋯⋯