[愛情無限loop] 就係咁，我做左女神一年既備胎: ７９　哭聲背後

究竟，點解阿琪會喊呢？發生左Ｄ咩事呢？我不停問佢，佢都剩係識得係度喊。

「妳係邊啊？」我再問佢，而今次佢終於話我知道：「我……我係……屋企樓下……」

我用左一秒都唔駛就答佢：「妳等我，我而家過黎。」

雖然頭先飲左Ｄ酒，但係頭先吹左陣風都醒一醒，我用我最慢既速度跑去阿琪既樓下，係佢樓下不停咁圍圈搵佢，最後，係公園見到抱膝喊緊既阿琪。

我慢慢咁行過去，喘晒氣咁係佢面前蹲低，拍一拍佢既頭，然後話：「阿琪小傻豬做咩事喊到咁慘慘啊。」



阿琪佢喊住抬係個頭，望住佢咁樣，我個心都噏埋，佢好似喊到自控唔到，甚至真係喊到……「慘囉，真係喊到有豬叫既。」

阿琪聽到我咁講後，笑左下然後打左我一下，「邊……邊有啊……」佢喊到連講野都難講果種。

我坐左係佢旁邊，問佢：「咩事……啊？」係我問佢果陣，我見佢所著緊既衫，有一部份係濕左，而且睇得出果Ｄ唔係普通水，因為係有Ｄ顏色，啡啡地既顏色。

再睇真Ｄ阿琪塊面，點解！？點解佢右邊面會腫左架！？

「妳比人打黎！？」我問阿琪，而佢喊住咁點一點頭。



「係邊個咁過份打妳！」我成個人著晒火咁問。

而阿琪佢好細聲講左D野，但係，太細聲聽唔到，「係邊個？」我問多左佢一次，而佢就多聲左少少話我知，「……我……前男友……」

仆街！我記得阿琪先前講過！佢前男朋友會係佢屋企樓下伏佢！打佢！

「有無搞錯啊！一個男人點可以打女人架！」唔知點解我會無明火起，阿琪聽到我咁講後，繼續喊。

而我見到佢喊，就同佢講：「唔駛驚，而家我係度，無事架拿。」



阿琪淚眼望住我，呢一刻既阿琪，好需要被保護，我用手擦走佢不停流落黎既眼淚，佢不停流，我就不停擦，擦到一個地步後，阿琪笑住望住我講：「你咁樣……幫我擦眼淚……擦到幾時……」

我一臉憐惜咁望住佢話：「擦到妳開心為止。」

阿琪甜笑左一下，「唔喊……喊拿。」

「妳講唔喊定喊架？」我問。

「唔喊……喊啊。」

「唔喊定喊姐？」我笑住問佢。

「唔喊……喊啊。」佢打左我一下，然後跟住我笑。

見到阿琪開心返，我都放心Ｄ，我指一指佢濕左既衫，問佢：「點架妳件衫會咁既？」



阿琪望一望我指既地方話：「頭先……佢一杯Ｍ記可樂……淋向我度……」阿琪扁住咀咁講，但係睇得出佢已經無咁唔開心。

「可樂！？咁都得！？佢有無搞錯架！」我又無啦啦火起。

「好彩……佢唔係拎住……鏹水咋……」阿琪竟然講笑咁話。

「傻既妳，講埋呢Ｄ野。」我答佢，然後又摸一摸佢塊面，「痛唔痛啊？」佢塊面腫到而家呢一刻都可以感覺到有少少熱。

「……少少……啦……」佢答我。

「呵返……好唔好？」我講左Ｄ咩啊？我點解會講Ｄ咁既野既？那來的勇氣我會咁講架？唔通因為我飲左酒？

阿琪聽到後，呆一呆望住我問：「點呵啊？」



佢咁問，我點知啊，我唯有用手輕撫佢比前男友打腫左既面，一路撫摸一路話：「呵呵……」我一直做，阿琪一直望住我笑，直到阿琪同我講：「唔痛拿。」我先停低。

呵完，應該做Ｄ咩好呢？要講Ｄ咩好呢？定係靜靜地咩都唔好講坐係佢身邊就我呢？我個腦不停諗緊呢Ｄ問題，直到阿琪既頭枕左去我個膀頭度，然後同我講：「多謝你啊，阿牛。」

今晚，我係第二次比女仔多謝我。

講完呢個多謝後，阿琪就問：「係呢？你唔係同ＪＵＤＹ佢去飲野架咩？」

「……係啊。」剛剛回神好彩仲答到阿琪。

「咁然後呢？」佢問我，然後我將同ＪＵＤＹ去飲野果陣講過既野，同埋遇到呂晨既野話左佢知，當然我無同佢講我比呂晨錫左啖啦。

而阿琪聽到ＪＵＤＹ同呂晨Ｄ野後，就話：「每個人，都有自己既難言之隱既。」

「係啊。」我答阿琪。



「估唔到呂晨原來背後受左咁多傷痛。」阿琪語帶著憐愛。

「係啊，佢講我知果陣都嚇左一跳。」我答佢，然後阿琪無啦啦扮嬲咁望住我話：「你仲咩上次呃我話係唔舒服早走，原來係呂晨整到你成身濕晒再加上佢既行為先早走既。」

「……我……我唔係全心呃妳架。」大鑊，頭先講多左添。

「唔理，我嬲啊，我而家頭餓，我要你陪我去食Ｍ記。」阿琪扮嬲既樣，真係可愛。

「好啦，去啦。」好彩無同佢講呂晨錫左我一啖。