[愛情無限loop] 就係咁，我做左女神一年既備胎: ９５　比賽前夕

說時遲，那時快，我對腳都好返七七八八，鐵打師父話我聽話先好得咁快，但就叫我唔好跑咁多住，當然，我緊係有問對我最重要既問題啦。

「我可唔可以去比賽？」我問係我眼前屏息靜氣既鐵打師父，而佢檢查左我隻腳後就點一點頭：「但係跑完有事記住返黎比我睇啊。」

「知道！」聽到鐵打師父咁講，我個心都定ｄ。

但都只係定左一半，因為諗返阿富ｓｄ比我果個時間，就算我無整親隻腳前狂練，都無可能會練到佢既成績。

時間一日一日咁過去，我係比賽前果幾日都有同阿琪慢跑，起初佢都擔心我會唔會再整親隻腳，但好彩，一切都相安無事。



「你係未仲會同阿富比賽？」阿琪問我。

「係啊。」我點一點頭，雖然明知會輸但我都點一點頭。

「但你而家既成績……」阿琪一副擔心既樣子，想照直講，但又唔敢講。

「其實，我已經無理同佢比賽既野，我而家剩係想跑個好成績，其他既野我唔會理。」真係，真係可以唔理，如果輸左，阿富就會一直煩阿琪，真係可以唔理。

「如果係既話就好拿，我仲擔心你會因為先前傷左無練跑，輸比阿富會唔開心添。」阿琪微笑咁話。



「唔會啦，我剩係想贏自己。」講就講得好灑脫，但係心入面都係不是味兒。

「加油啊，我支持你，雖然我知道你輸緊。」阿琪取笑既語氣講。

「咁如果我贏左咁點先。」呢一句我只係講笑咁話，但無諗過阿琪好認真咁同我講：「如果你贏左，就同你做一件你想做既野。」

聽到佢咁講後，我呆一呆望住阿琪，「妳頭先講Ｄ咩？」

「聽唔到就算。」佢話。



「唔係架，聽到啊，你話我贏左就同我做一件我想做既野嘛。」我答佢。

「係啊，傻佬。」阿琪打左我個頭一下，「休息完未啊，我地跑返去拿。」

「好。」呢一刻，我覺得我已經贏左。

比賽既日期由本來望到頸都長，到而家只係相隔一晚，我望住日曆上面圈住既日子，聽日，就係我第一次跑比賽，唔知，會發生咩事呢？

「死仔，聽日要比賽拿，唔好緊張。」老牛大人企係我身邊，拍一拍我膀頭話：「上到擂台就唔好怯，怯既話，你就輸成世。」

「我聽日係去跑步，唔係去打拳啊阿爸。」我望住老牛大人好無奈咁話。

「差唔多姐，都係鼓勵說話姐。」佢笑一笑後又話：「睇住隻腳啊，你仲有成世人，條路有排你行架。」

「知道拿，阿爸。」我答佢，然後呢個時候，電話響起，我以為係阿琪打黎想係比賽前一晚同我傾陣計，但見到個來電，係阿富。



「喂？」又係呢一個每個人接電話都會講既字。

「牛兄，聽日比賽，準備成點。」阿富問。

「不過不失啦。」我答佢，雖然知道一定輸緊，但係都好有自信咁答佢。

「聽到你咁講就好，聽日大家好好跑，輸贏大家都仲係朋友。」阿富話。

「不嬲都係。」我答。

收線，再望一望個日曆，聽日，可能係我呢一世人都唔會忘記既一日。