就係因為要幫COW,所以我地開左個GROUP傾佢D野,當然入面仲有老牛大人啦,又佢入左GROUP果刻起,就係惡夢既開始,因為老牛大人以前好少用電話SD MSG比人,通常都係直接打電話,但係佢入左GRORP,就緊係同我地一樣打字架啦,所以……

「阿仔,我應該點樣SD MSG出去啊?」

「……你打完,禁旁邊個男色利啦……」

「邊到有男色制啊!個相機制同咪制咋!」

「……你要打左字先出黎架……」



「係架咩!咁撚煩架……哦!係未呢個藍色箭咀制啊?」

「……係啊係啊……」

「真係好撚煩……咁樣先SD到D野出去……喂!能蟹仔SD呢個公仔咁得意既!點SD架點SD架!」

能蟹仔,我真係多得你唔少,點解你要開個GROUP,點解你要拉埋老牛大人入黎,最重要係,點解果日你要去果個大排檔度食飯,唔去果個大排檔食飯,未唔駛比老牛大人撞到,咁佢就唔會話要幫我地,你就唔駛開左GROUP後要拉佢入GROUP,最緊要,係唔會煩到我……

而家每日老牛大人都機不離手係度SD MSG,有時佢有咩字唔識打,就會SD個語音MSG比我問,都唔問已經教左佢好多次部機有得認你講既字幫你打,佢硬係要SD比我問……



不過,都算同老牛大人多左互動,而且呢樣都算係佢首次接觸而家既通訊設備。

係呢幾日,佢地兩個不停咁傾有咩野IDEA可以做,但好多一係就好老土,一係就好天花龍鳳。

能蟹仔:不如你買層樓落佢名,佢一定感動到濕晒
COW:邊度濕(喊笑)
能蟹仔:眼濕濕(喊笑)
我:你呢個諗法其實都算貼地,但係COW有無咁多錢先
COW:……未有
老牛大人:我條IDEA不知幾WORK



大家係未好懷疑呢一句呢,其實都唔怪得老牛大人,因為佢剛學打字,所以有好多時候我地討論完一個話題後,佢先會SD到一個MSG黎答返幾廿個MSG前既野,而佢話佢個IDEA WORK 係講緊同JUDY去郊野公園野餐彈結他唱歌加送花。

我地見到佢SD左個MSG出黎都唔知覆唔覆佢好。

而我係呢個GROUP入面既工作,就係打聽JUDY既野,因為平時JUDY都會搵我同阿琪傾下計,當然啦,我無將所有既野都話比佢地聽,我只係講果D有幫助既野比佢地知。

而最重要既一個情報,就係JUDY搵A男既次數。

其實平時聽JUDY講A男,雖然每次都見到佢愈講個心愈甜,但當問佢A男係咩野人,佢都好直接話A男係……「玩家囉!但又鐘意傷春悲秋!扮撚晒憂鬱的浪仔四圍溝女!比女話果陣扮撚晒自己係受害者!」佢每次都係用充滿怒氣既話氣講呢一句說話。

然後,阿琪就會串佢:「妳講到佢咁差,咁妳仲繼續同佢一齊?」

JUDY好理直氣壯話:「我犯賤囉。」然後大笑左出黎。



聽得出佢呢個笑,係笑中帶淚。

「其實,妳會唔會試下唔搵A男啊?」我問,而JUDY就諗左諗話:「我又諗過架,但係怕自己做唔到。」

我聽到佢講後,笑左笑,如果佢有諗過的話,就得拿,如期等能蟹仔同老牛大人諗D無用既計仔,倒不如我試下用直常既方式試一試。