雖然我口講話阿琪同能蟹扮情侶,我無所為,但係心入面唔知點解,始終都係有少少唔舒服,唔通,呢D就係D人成一講,心中入面有氣刺?

而又因為今次又要能蟹幫手,而且阿琪又話唔放心只係得佢地兩個傾,所以能蟹就開左個GROUP,加左我入去。

個情況,就好似上次COW一樣,但打死今次我一定唔會比老牛大人知道件事。

開左個GROUP,能蟹就同阿琪傾緊要點樣扮情侶,而且只係會係有阿富在場既時候先會扮,阿琪都十分認同,而且仲話最好添,佢都唔想同能蟹有咁多身體接觸……

係WO!?如果佢地要扮情侶!難免要有身體接觸架WO!!!



點解我到呢一刻先發覺到會有呢個問題……

係GROUP入面,我係完全無出過聲,因為,我只係望住佢地既MSG,就唔想應落去。

能蟹佢不停提出好多只會有情侶做既事要阿琪一齊做,但係阿琪好多都拒絕左,而大部份都係比較親蜜既舉動,就好似錫、攬、甚至拖手,阿琪都拒絕左,激到能蟹火都黎話咁樣點扮啊。

佢又講得岩既,如果一對情侶,唔拖手、唔攬、唔錫,又點算係一對情侶,我愈睇佢地既MSG,個心就愈唔開心。

到最後,阿琪就講出自己既底線,話可以比佢搭膀頭,而且話可以扮一對剛剛開始既情侶,唔想比大家知所以唔會有太多既親匿動作。



講到咁,其實能蟹一開始好唔讚同,但係阿琪難得地堅持己見,而能蟹最後都妥協左,亦都唔知點解,我個心情係見到阿琪既堅持後放鬆返。

而佢地傾完後,能蟹佢私底下MSG我。

能蟹:喂,阿琪佢咁樣做,呃唔呃到阿富架
我:我都唔知啊,你盡量幫佢啦
能蟹:我佢係妳鐘意既女人先咁做咋
我:唔該晒
能蟹:不過話時話
能蟹:你真係可以偉大到,見到我同你鐘意既人做D親匿既動作?


我:得掛……
能蟹:我真係唔多信WO
能蟹:答應我,到時你忍唔住唔好打我
我:唔會啦
能蟹:你係先好講
能蟹:不過講開先講
能蟹:你都要小心阿琪
能蟹:阿富呢個男人都比佢迷成咁
能蟹:但佢就對人無意思
能蟹:感情既事處理我咁亂
能蟹:都唔方好得去邊
我:佢係呢方面弱D姐
能蟹:咁就死得啦
能蟹:如果日後你真係同佢一齊既話,佢仲係咁既樣你就辛苦拿
我:都唔會既


我:可能你同佢相處耐左,會知道佢既優點同佢既苦況呢
能蟹:無言,我只能說我唔會似你咁偉大

同能蟹MSG左陣後,阿琪就WECHAT我。

阿琪:你做緊咩啊?
我:無啊
我:上網搵緊D野
阿琪:搵咩野啊?
我:唔比得妳知架
我:對妳黎講係秘密
阿琪:咁神秘既
阿琪:我生日D野
我:係啊
阿琪:我叻(喊笑)


我:係拿
我:叻拿
阿琪:我去沖涼先
阿琪:再唔沖阿媽就鬧我架拿
我:嗯
我:咁妳快D去沖啦
阿琪:你等我
阿琪:一陣再傾

望住阿琪既MSG,再諗返能蟹頭先問我既說話,我真係一個咁偉大既人咩?我知道阿富錫左阿琪一啖後,都已經癲晒然後唔開心左成日,如果我親眼見住能蟹同阿琪一齊扮悵侶,雖然我會一早知,但我可唔可以控制到自己既情緒呢?

我再望一望電腦話面上搵緊既野,唔知到阿琪生日之前,佢同阿富既事會唔會搞得完?我又應該做D咩野,令到阿琪覺得,我同佢過呢個生日係有驚喜同難忘呢?