「係啊,今個星期六我可唔可以早少少去到果度準備D野啊?」我拎住部電話,問緊一個人。

「可以啊,你準備成點啊?」果個人問我。

「大既都準備好。」我答佢。

「咁祝你果日順順利利啦。」果個人話。

剛剛同我傾電話既人,係我早前打去BOOK場既人,BOOK咩野場?仲記唔記得我要同阿琪慶祝生日呢,我諗住比個特別D既生日比佢,所以無諗住BOOK餐廳同佢食飯,咁樣實在太簡單,所以,我上網搵左好耐,最後比我搵到一間係觀塘既出租廚房。



無錯,我諗住租個廚房煮野食比阿琪食。

而且我仲已經訂左D汽球,裝飾下果日既環境,所以打左去問可唔可以早D過去SET場。

另外蛋糕一早就訂左,我對自己煮野食既能力其實無咩信心,但係如果講焗果一方面,我就完住無問題,不過整蛋糕對我黎講係好難既事,而且我時不時食阿琪親手整既野食同甜品,所以決定買現成既。

餐單已經一早訂左,就同我同先所講既一樣,我會以焗為主,頭盤係牛油果粒大蝦沙律杯,佢好鐘意食牛油果架,然後就整一個薯仔濃湯,阿琪唔多鐘意食飯,所以我決定整意粉,主菜方面就會有焗烤雞、烔魚,甜品就食我一早買左既蛋糕,我揀左鬆弛熊蛋糕,因為阿琪鐘意鬆弛熊,唔知佢見到個蛋糕會點呢?

呢幾樣野我都試左幾次,只要多人唔出差錯,就無問題,希望,阿琪佢會鐘意啦。



而家只係差一樣野,就係餐酒,有時同阿琪出去飲野,佢都好鐘意開一支白酒,所以,我決定搵一支我同佢都覺得好飲既白酒,但係我又唔記得叫咩野名,所以我是但搵左個借口,係慶祝既前一日,叫佢同我出去買白酒。

同阿琪慶祝生日既事,有幾個人知道,我親口講比佢地知既人有JUDY同能蟹,而唔係我親口講既,有阿富。

阿富有幾次同阿琪講叫佢唔赴我既約,但係阿琪點會聽,而JUDY同能蟹聽到我會點同阿琪慶祝後,都問我駛唔駛搞咁大壇野。

但係佢地唔會明,只要為左佢做既所有野,就算幾大壇,幾辛苦,只要佢最後對住你笑得好開心,所有野都覺得值得。

頭先都講過阿富好似想阻止我同阿琪慶祝,所以佢呢排都成日會約阿琪夜晚出去食飯,好似想係我同阿琪慶祝前,可以成功咁令到阿琪同佢一齊,但佢愈咁做,阿琪就愈反感。



而有一次,阿琪同我加上能蟹三個人出去飲野,呢排能蟹多左JOIN我同阿琪既DATING,唔知佢係未想睇住我同阿琪會發展成點,因為佢同我打賭過果樣野。

不過,總覺我佢都有少少唔妥……

呢一次飲野,我地都講左好多自己既事,而阿琪都有同能蟹講,話我對佢好好,係無可能果隻好,唔知點解,我聽到阿琪咁講後,有少少感觸。

而飲飲下野,阿琪收到個電話,係阿富,佢知道左我同能蟹同佢一齊飲野,佢死都話要黎,其實多個人我真係無所謂,而且今日係能蟹佢有野想呻所以陪佢,佢覺我多個人黎無咩問題,而且佢不知幾想睇阿富黎到阿琪同我會點,佢條死仔擺到明係想食花生等睇戲。

由電話掛左唔到十五分鐘,阿富就到左,佢一到左係坐左係能蟹既旁邊,因為阿琪同緊我坐,其實我有一刻諗過讓個位比佢坐,但係佢話唔駛,所以我都坐返低。

佢一到就不停飲酒,好似唔想同我地傾計咁,而我就要睇住坐係我前面既能蟹,因為佢開始發酒癲,不停拎自己D錢周圍派,係啊!佢飲醉就會咁架拿!!!

然後就不停拎住支酒話要同我鬥飲,我都因為咁比佢整到有少少醉。

好唔容易先叫到能蟹坐低,坐低後我望一望阿富,佢今日同平時唔同,因為以前都有同阿富飲過野,佢唔係咁易醉既人,但唔知點解,今日既佢好似已經醉左,佢望住面前既阿琪一粒聲都無,而阿琪好似好唔好氣咁別個面,唔知係未頭先佢地吵過黎。



「我去一去洗手間。」阿琪講完後,我就讓左個位比佢去洗手間,剩低我地三個人,阿富就問我:「牛兄,你地成日出黎飲野架?」

我只係點一點頭,因為得真係比能蟹隊左都幾多醉……

「咁係未次次都會攬住阿琪架?」佢問我……咦……我頭先好似真係有攪住阿琪架WO。

「我問你係未次次都攪住阿琪啊!」阿富開始有少少唔妥,而我就問佢:「你係未飲醉左啊。」

阿富佢不停咁搖頭,然後一野咁打左落場玻璃度。

不過好彩,阿富唔夠力,只係傳左一下好大聲,而阿琪剛剛返到,佢問我:「咩事?」

「無事,妳放心……」我望住阿琪話,而阿琪就望住我問:「咁你有無事?」



「我?有咩事?無事啊……」我講完後就同阿琪四目光投,而佢都望住我無講野,就好似而家呢一刻,呢個世界入面就只得返得同佢咁。

我同佢既距離慢慢接近,直到我,我視線由佢雙眼移到佢既耳仔,到視線好接近耳仔果陣我就閉上眼,我聞到佢既髮香,呢一種髮香我成日都會聞到,係阿琪用開既果種洗頭水味,我感覺到鼻頭碰觸左係阿琪既臉蛋上面,嘴唇既感覺都係一樣。

我錫左阿琪塊面一啖,然後,我就眼前一黑,到我清醒返少少既時候,已經係身處一間M記既男廁入面。