「我地係唔會有可能架!」望住眼前激到喊既阿琪,以及比阿琪嚇到呆左既阿富,而我都呆左咁望住佢地。

究竟發生左D咩野事會搞成咁呢,時間,回到一個小時前。

今日,係跑GROUP舉行例會既一日,會有好多人出黎跑步,而今日比較特別既係,因為阿琪剛剛生完日,好多人仲想繼續送禮,但係都比阿琪婉拒晒,不過,有一個人點被婉拒都好堅持。

果個人,就係阿富。

阿富呢一排只要有阿琪出現既跑步活動,都會幫阿琪霸一個LOCKER,而今日都唔例外,而且,佢今日準備左好多野比阿琪,有好食既野,有解渴既野,以及仲有一份小禮物。



我陪阿琪去放野果陣,見到個LOCKER入面有一個紅色既小盒,就好似裝戒子果D紅色小盒。

放完野後,我同阿琪話:「我見到入面有個盒仔,可能係阿富想送比妳。」

阿琪聽到我咁講後,就話:「最好唔好啦,因為果個盒好似阿富之前想同佢前度求婚用既戒子。」

「下?唔係掛……」我聽到阿琪既說話後,第一時間既反應係咁。

「所以我未話千祈唔好送比我,如果佢真係送比我,我一定拒絕,佢已經唔係第一次話要送呢隻戒子比我。」阿琪講講下嘆一嘆氣,「係未已經係時候直接同阿富講呢?」



「一早就應該講啦。」我話。

「跑完步先再諗。」阿琪講完後就跑出去運動場。

跑左一陣,人都慢慢多,個死仔能蟹而家先出現。

「你地咁早啊。」能蟹一到場就同我地兩個講。

「係你遲姐。」阿琪話。



「咁阿媽妳係未又要話我先。」睇黎佢地兩個都已經好受樂地玩呢個母子遊戲。

又跑多左陣,我地諗住休息,而遠睇見到一大班人係度傾緊D野,我地三個就行左過去問:「傾D咩野傾到咁開心啊。」

有個狗公就好直接話:「無,我地係度講緊阿琪心目中既著緊龍虎榜姐。」

「下?我既龍虎榜?」阿琪一聽到就問,而我就話:「你地都好無聊下WO,咁都有龍虎榜。」

而在場既人聽到我咁講後,就話:「牛兄,你唔好咁講住,你都係呢個龍虎榜上面,而且係好高既位置。」

「下?」呢次到我下左一聲,而能蟹佢就話:「講黎聽下啦。」

D狗公聽到能蟹咁問,就話:「拿,排名又最低開始,係……」佢地一個一個咁講,人愈黎愈多,連阿富都行左過黎,而阿琪一路聽一路係度笑,又時就反駁一下,當講到,「第三名應該就係阿富。」講完之後所有人都起哄,而阿富聽到自己第三名,就話:「我呢D人點會係第三名WO。」

阿琪聽到阿富咁講後,就話:「係啊,佢點會係第三名。」



全場尷尬左一下,而我見咁就為左打圓場所以問:「咁第二同第一呢?」

「我地都諗左好耐,究竟邊個係第一呢,係阿牛定係能蟹呢,我地都諗左好耐。」佢地繼續起哄,而阿琪就笑我好開心咁話:「唔比雙冠軍既。」

「唔得!」能蟹一聽到阿琪咁講後,就話:「我要拎第一,唔要雙冠軍。」

估唔到能蟹佢會咁小朋友脾氣,但係原來有時小朋友脾氣,係有用,「好啦,比第一你啦,阿牛你就讓下佢啦。」

「OK,我無所謂啊。」我係無所謂,點解個心有D不是味兒既感覺,而在場既,有個人比我更不是味兒,果個人,就係阿富。