JUDY呢個懶妹好少出黎跑步,但係有時跑後食飯佢就會到,今日佢一黎到我地跑完步既飯局,見到能蟹身邊多左個人跟出跟入,就問我:「果條友邊個黎架?」

我笑笑口同JUDY講:「能蟹新請既工人。」

「下?咩而家D工人咁忠誠地跟得咁緊既,我見頭先能蟹入廁所,個工人都入埋去WO。」JUDY話。

「幫佢逗住嘛。」我忍唔住笑大笑左出黎。

而阿琪都笑左好耐,然後先話返個真相比JUDY聽,JUDY一聽完後,就O晒咀望住我地,「唔係掛,點會有人咁直接叫人教架,而且係搵能蟹WO。」



「搵能蟹呢樣唔奇,最奇既係佢做得出呢種行為。」我話,然後阿琪點頭認同。

「世界真係無奇不有。」JUDY呢一句講完後,能蟹同七三廿一就返左黎,而七三廿一見到JUDY,就好積極咁介紹自己,「你好啊,我叫七三廿一啊,今日第一日黎跑步,以後請多多指教,係呢,點解頭先唔見妳跑既?但係妳又黎食飯既?妳……」

「等等,我同你唔係咁熟,你唔好問咁多野,OK?」JUDY一野就KO左七三廿一。

而七三廿一被KO後,就成個人呆左咁坐左係度,望一望能蟹,然後問:「師傅啊,如果呢D情況下,我應該點處理啊。」

係呢一刻,我飲緊既湯噴左出黎,笑到噴左出黎,不過我已經好快咁遮住個口,先唔駛噴到四圍都係,阿琪見到我咁,就比左張紙巾我,不過佢都係笑住比我,JUDY就反晒白眼無眼睇,剩返既能蟹,就乾笑左幾聲後答佢:「做人呢,就最緊要知幾時應該講野,幾時應該收聲。」



「咁而家呢?」七三廿一仲問我出口……我地笑到肚痛拿。

能蟹一副被打敗既樣子,搭住左七三廿一既膀頭,然後同佢講:「而家,唔該你,收聲。」

「知道。」七三廿一即刻收聲,終於可以靜下,「係呢,點解要收聲既?」佢仲問,媽啊,可唔可以比我安心地食埋個飯佢。

今日餐飯我地全程忍笑地食完,食完飯,七三廿一就繼續不停炮轟JUDY問佢問題,真到JUDY話佢有男朋友,七三廿一先停止唔問佢。

識左七三廿一唔耐,我已經覺得佢係一個發問問題機,但係佢只會對異性發問,但我更加意會到,原來只該名要異性已經名花有主,七三廿一就唔會再煩佢,因為佢見JUDY已經唔係佢目標,所以轉向其他人。



不過有一點我好奇怪,點解佢唔問阿琪既,而我心中呢個問題,比其中一位狗公問左:「七三廿一,點解你唔問阿琪問題既?」

七三廿一望一望阿琪,然後望一望我後就話:「佢地兩個一齊既,所以唔問啦。」

下!?我聽到七三廿一咁講呆左,而阿琪聽到佢咁講就係度笑,無錯,我係想同阿琪一齊,但而家未係WO。

而當大家講左比七三廿一知我無同阿琪一齊之後,七三廿一好似唔信咁話:「唔係WO,佢地好似拍緊拖既情侶WO。」

我都希望可以成你貴言,但唔係,所以我答七三廿一,「我同阿琪唔係一齊架。」

「所以……」睇黎七三廿一好似想蠢蠢欲動問阿琪問題,但係阿琪已經好快咁話:「你唔駛問我,我係唔會答你,而且我對你無興趣。」好少何見阿琪咁直接答一個人。

七三廿一見到咁,就唯有繼續問頭先有應佢既果D人。

但係點解,佢咁想做男神呢,呢個真係一個迷,等有機會問一問佢先得。