點解呢?究竟發生左D咩事呢?呢排係我身邊都係充斥住對阿琪既負面說話。

一個二個都叫我唔好再行近阿琪,就連本身支持我既JUDY都無再幫佢講好說話,就連一直教我日久生情要慢慢等待既老牛大人都怕我做左人隻兵。

能蟹既說話究竟應唔應該信呢?定係,我應該相信阿琪呢?

我唔知,我只知道今日我想一個人靜下,唔想再同任何人有接觸。

離開下都好既,但聽日又要返工,想離開既話可以去邊呢?長洲……我決定自己一個人入長洲靜下。



唔知幾時開始,長洲多左好多人,多到有時連原居民都投訴叫D人還返長洲比佢地,我選擇左星期日入去長洲,已經預左好多人。

一落船,同我想像一樣,人群係我面前行過後,又有另一個人群,就好似海浪一樣。

我買左幾支酒,然後租左架單車,係長洲既岸邊踩,踩到一個比較少人既地方後,就停左落黎。

有時,一個人靜靜地都唔錯,我仲特登熄左電話,唔想比任何人搵到,開左其中一支酒,係仲有微溫既太陽下,呢支冰凍既啤酒都真係透心涼。

其實我唔係一個成日飲酒既人,但係自從識左阿琪之後,我就多左出去飲野,而且,每次都有阿琪係度,諗返轉頭,其實同阿珍同能蟹既說話好似,我同阿琪可能真係兩個世界既人。



海風一直咁吹,但係我既心情都係一樣,好虛無,因為我真係唔知應該點做。

我成日都話,愛情其實係自己既事情,就算點都好,最後既選擇都係自己所決定,唔可以怨其他人,而且當你決定去愛既時候,就唔好動搖,但而家,我卻開始動搖。

我有嘗試用老牛大人教我既方法,係度諗我同阿琪之間發生過既事,不過,今次好似點諗都唔夠填補內心既空洞,呢種感覺,好唔實在。

我去到一個睇唔到日落既沙灘,坐在係度漫無目的咁望住個海,個腦真係好似空左咁,咩都無諗,唔想諗。

真到,有一對情侶係我不還處,係到打鬧……係真係打鬧,我見到個男既打左個女仔一巴,然後個女仔就話:「你打我……」見到咁既情景,我成個人當堂醒一醒。



而有個女仔就衝左過黎,推開左個男既,而個男就氣沖沖咁走左,剩低果兩個女仔。

我聽到,呢兩個女仔既對話:「點解佢成日咁對妳,妳仲要忍佢?」

「因為我愛佢囉。」
「但係佢唔識得珍惜架。」
「佢識架。」
「佢識就唔會打妳啦。」
「可能,佢唔知要點樣表達對我既愛呢。」
「所以就打妳?妳未咁傻啦。」
「佢真係對我好好架……喂!妳去邊啊?」
「我去幫妳打果個衰人。」

個女仔走左後,就剩返另一個女仔好無奈坐左係沙灘到,而我,就好八掛咁行到果個女仔旁邊,然後問:「妳無野嘛?」



個女仔無啦啦咁比我一問,嚇左一嚇但係都有答我:「……無野。」佢下意識雙手護胸。

而我就話:「我無惡意架,我頭先係旁邊聽到你地既對話,點解妳男朋友咁對妳,妳都可以忍佢?」

果個女仔笑左一笑,然後話:「可能,係因為我以前對D男仔太差,所以,我唔敢還手同怪佢掛?」

「對D男仔佢太差?」我問,而個女仔就望住個海答我:「我以前,持住自己好多人追,就無理過一個對我好好既男仔,只要我想搵人接送,搵佢一定要,我唔開心,佢一定陪我,就算我有男朋友,同男朋友吵後都一定會搵佢,因為我對佢好放心,佢唔會傷害我,甚至,我比其他男仔傷害佢都會陪我一齊去面對。」

個女仔講講下,眼角慢慢流下眼淚,「但係,我辜負左個男仔,最後都係選擇同一個傷害我既人一齊都無同佢,佢喊住問我點解,點解咁多年入面,都好似對佢既付出不聞不問,點解我唔比機會佢,點解佢十年入面一直為我做咁多野,我都無一刻感動過……」佢擦去眼淚,然後話:「但其實我係好感動,只不過,我已經係一個傷痕纍纍既人,已經配唔起佢……」

我睇得出,呢個女仔既眼淚帶住既無奈,遠比起頭先比果個男仔打佢既傷痛仲要多。

「但係,妳應該選擇對妳好果個啊,妳都話妳已經傷痕纍纍,點解仲要搵其他人去傷害自己?」我問佢。

而佢望一望我,眼淚更加湧出黎話:「因為當我想搵返果個男仔既時候,先發現果個男仔比我傷害得仲慘,佢比我仲傷,傷到佢要遺棄以前自己既原則,去做一個壞人。」



呢一剎那,我腦入面諗起一個人。