「姐係妳都唔知拾拾點解會同B男一齊?」我問,呢個就係我地今日約佢出黎最望要既目的。

「我唔知佢地點解會係埋一齊,但係我可以講B男根本無真心愛過拾拾,但係拾拾一直盲目咁話B男係愛佢,有時我都唔明佢諗咩。」壹百話,然後就望住七三廿一講:「但係而家拾拾已經無再同B男一齊,所以你會唔會同拾拾一齊?」

被壹百咁樣一問既七三廿一,無出聲,睇黎佢唔想回應呢個問題。

而我就問壹百,「咁點解妳會話B男唔係真心愛拾拾?」

「有眼睇囉,你話一個男朋友會唔會成日打自己個女朋友?又成日呼喝佢?仲有佢成日出黎玩、流連酒吧晚晚唔同女,但係佢又唔比拾拾出黎玩WO,最恐怖既係唔知點解佢好似知道拾拾廿四小時既位置咁,總係可以無啦啦出現係佢身邊然後帶走拾拾,就好似上次係長州咁,佢都係無啦啦出現話要帶拾拾走,只係果次拾拾唔肯咋。」壹百講到面都紅晒咁,睇黎佢都覺得B男咁做好可恥。



而係佢言語間,我地聽到一件好重要既事,就係B男可以隨時出現係拾拾既身邊,究竟佢係點樣做到咁架呢?

就係呢個時候,阿琪就問:「妳話果個人成日去玩,佢會去開邊度玩?」

壹百聽到阿琪咁問後,諗左諗話:「尖沙咀係佢地擔。」然後阿琪就好似係度盤算緊一D野。

而唔知點解,我見到咁樣阿琪,心中有一種不祥既預感,「妳想做D咩野?」

「我想睇下點樣埋佢身,查下點解佢可以知道拾拾廿四小時既位置。」阿琪講得一副理所當然。



「傻左啊妳!咁危險!」我第一次咁大聲喝阿琪,而阿琪見到我咁都嚇左一嚇。

「你地今日約我出黎,就係想知呢D野?」壹百問,而我就點一點頭。

「睇黎呢個傻女最近都識返D好人。」壹百微笑咁話,然後語重心長同七三廿一講:「我唔知你而家仲對拾拾有無意思,但我相信佢係你心目中有一定既地位,就算你真係由愛轉恨,都唔能夠磨滅到你以前對拾拾愛既感覺,我知道你因為拾拾咁樣對你而去學壞既事。」

「妳……點知……」七三廿一話。

「有眼見,但係就算你點學都好,你點都係一個好人,就算你點想做一位男神都好,你點都係一個宅男。」壹百既直言,令到我同阿琪失笑左一下。



「但係,就係因為你既好,先可以將拾拾拉返出黎,我而家問你多次,你想唔想同拾拾一齊?」壹百好認真咁問。

頭先無答既七三廿一,係呢一刻只係講左一句話:「我想愛佢一生一世既時候果陣佢無選擇我,點解要到我離開左既果陣佢先倒返轉頭想同我一生一世。」

呢一句,就好似我成日講果句,愛果陣唔珍惜,到無左先話要珍惜,呢D,係愛咩?