傾完之後,能蟹同七三廿一爭住要送呂晨返屋企,不過呂晨就話:「我想阿牛送我返去。」然後就走左過黎我度,仲撓住左我隻手。

佢呢一下既動作,嚇左我一跳,我即時望一望阿琪,但佢竟然笑得好開心咁,真係唔知佢諗緊咩。

而能蟹同七三廿一見到呂晨咁樣,就向我投射敵視既眼神……

阿琪同呂晨雖然唔順路,但都算住得近,所以我提意一齊返其中一個既屋企先,然後再送另一個,跟住阿琪就話:「送我先啦咁,我想快D返家訓覺,今日唔知點解特別累。」

咁阿琪都咁講,所以我同呂晨就先送左阿琪返去先,係樓下阿琪叮囑我返到屋企記得話佢知,而我就叫佢早D部唔好掛住等我。



阿琪上樓後,呂晨就話:「你地駛唔駛咁SWEET啊,又記得話我知返到上去,又話記住唔好掛住等我早D訓,呢D根本係情侶先會講既說話。」

「妳未玩我啦。」我同呂晨講,而呂晨卻好詫異咁問我:「你仲未同阿琪一齊咩?」

聽到佢咁問,我就搖搖頭話:「未啊,佢話佢未READY WO。」

呂晨聽到後,只係笑左幾聲後就無再講野,而我就問呂晨:「係呢?點解阿琪會識得搵妳黎幫手既?」

「其實我QUIT左GROUP後,都有同阿琪久唔久來往下,交代下生活近況,今次知道JUDY同拾拾既事後,我第一時間就話如果佢有野要我幫手,出句聲就得,雖然我同拾拾唔熟,但話晒JUDY都幫過我,而且果陣佢都有話,呢D野無話邊個幫邊個,係因為大家係女人所以一定要幫,所以今次佢有時,我都一定會企出黎。」呂晨將佢點解黎幫手話左比我知道。



「但係,我驚今次會有危險咋。」我話,而呂晨就微笑望住我講:「我唔係講左既,如果我有咩事,你一定會第一時間衝出黎既。」

「咁呢層一定啦。」我話。

而呂晨就耐人尋味咁望住我話:「如果唔係你鍾意阿琪既話,我諗我都會鍾意你。」

「下?妳未玩我啦。」我講完呢句後,呂晨突然停左係度,而我見佢停低左,都停低望住佢問:「咩事?」

只見佢好認真咁望住我,然後問:「阿牛,你覺得你有無為左阿琪,而忽略左你身邊鍾意你既女仔呢?」



我唔知點解呂晨無啦啦會問我呢個問題,我只知道佢而家呢一刻係無比認真咁期待住我既答案。