我抱住左暈到既阿琪,都唔再理B男係未已經走左,而阿珍就好無助咁望住兩個暈左既女仔問:「而家點好啊?」

本身走左去追B男既能蟹同七三廿一徒勞無功而回,佢望到我地後就好唔忿係咁話:「我追唔到果條仆街啊!」佢雙眼好似想殺左佢咁款。

而七三廿一就喘晒氣話:「佢……佢仲拎走左部手機。」

呢一刻佢有無拎左部手機已經唔重要,最重要係我最重要既阿琪而家暈左,我抱起左佢然後同佢地講:「快D叫車送左佢地兩個去醫院先。」

呢個,係我而家唯一可以做到既決定。



救護車好快就到,用左差唔多十分鐘左右就去到醫院急症室,我地幾個係外面等,心急如焚,而放左係阿珍果度既阿琪既電話不停係度響,係連逐響唔停果隻,阿珍見到咁就行左過黎同我講:「阿琪電話已經響左好耐,接唔接好?」

阿珍遞左部電話比我,我一拎部電話,部電話又再響起,我望一望個來電顯示,見到上面寫住既係「父親大人」,我諗一定係阿琪既爸爸。

能蟹同七三廿一都行左過黎問咩野事,而阿珍都講左阿琪既電話不停響既事佢聽。

而我,就望住「父親大人」不停打入黎、收線、不停打入黎、收線……我諗佢一定好擔心阿琪,所以我決定做一件事。

「父親大人」呢四個字又係阿琪既電話上面出現,我按下接聽键,「喂?」另一邊係呆左一秒,可能阿琪爸爸無諗過係一個男仔接聽,「你係邊個?」佢語氣唔多好咁問。



「我係阿琪既朋友。」我平心靜氣同阿琪爸爸講,而佢就話:「個衰女呢?叫佢聽電話。」

而我就諗左一陣後話:「世伯你冷靜D先,阿琪因為出左少少事,而家係醫院……」「咩話!?個衰女入左醫院!!!佢搞咩會入左醫院架!」

永遠叫人冷靜聽既說話,往往都會令到果個人好激動,阿琪爸爸都係一樣。

我聽到佢咁激動,都唔知可以點答佢,我只係同佢講左我地而家係邊間醫院,而阿琪爸爸一聽到後就話:「我而家就過黎,個衰女一定打得少。」

然後,就收左線。



本身我係本住阿琪出左事佢屋企人點都要知既心態話左比佢爸爸知,但估唔到阿琪爸爸竟然話黎到要打阿琪……我係未害左佢……

阿珍、能蟹同七三廿一見到我聽完電話果樣呆晒,一副驚恐既樣,就問我:「做咩事咁啊?」

而我就答佢地:「阿琪爸爸話會黎,但係佢好似好嬲。」我無講阿琪爸爸話佢打得少既事,但係佢地聽到我話阿琪爸爸好嬲,佢地都已經覺得好大鑊。

過左陣,醫生出左黎同我地講:「你地果兩位朋友已經醒返無事,下次你地要小心D拿。」

我地聽到即刻入去睇佢地,我見到佢地兩個各一左一右咁訓左係張床上面,神情仲有少少呆滯但醒左已經算係好好。

我當然第一時間走左去睇阿琪先啦,而能蟹佢地就去左呂晨果邊。

「妳無事嘛?」我問阿琪,而阿琪神情呆滯咁同我講:「點解我會係度既?」

「頭先我地諗住去捉B男,但點知佢係黎面前揚左幾下手後,妳就暈左拿。」我答佢,而阿琪就諗左陣後話:「……好似係,我聞到一陣香味後就眼前一黑……」



聞到一陣香味?唔通係B男做既?

我望住阿琪,佢好似好想諗返頭先發生左D咩事一樣,但佢剛剛醒返,所以我話:「妳休息下先啦,唔好諗咁多野。」

阿琪向我點一點頭後,就諗住閉上眼訓一陣,但係佢又突然張大隻眼,望住我身後既方向,好驚訝咁。

而我都望一望我身後,見到既係一位大叔,一個阿姨,同埋另一個男人,係呢個時候,我地到阿琪講左句:「阿爸、阿媽,點解你地會係度?」

原來位大叔就係阿琪爸爸,阿姨就係阿琪媽媽,但係果個男人係……