其實我同阿琪都諗住唔會將果日見到金姐既事講出黎,咁當然就連阿銀都唔講啦,不過呢件事能利知道,姐係能蟹都知道,所以當佢知道阿銀係金姐個女果一刻,佢就好驚訝咁話:「唔撚係掛,香港係未真係咁細啊。」

老實講,香港其實真係幾細,唔係就唔會唔夠地起樓啦……

講返正題先,我地知道左呢件事後,都有個協定唔會將呢件事係個跑group度講,但係我估唔到既個協定就只有我、阿琪同能蟹三個人,而能利係毫不知情……

講到咁,我諗大家都估到咩事啦,就係一次突然既機會……真係黎得好突然,突然到我都估唔到。

果一晚,跑步既活動本來一早約左好多人,但點知果一有少少雨,好多人都因為天氣既問題唔出黎跑,不過,我、阿琪同能蟹就好少理天氣跑既人,所以都照常出席,而且能蟹都想知道我地跟阿銀果日既事,當然事前佢已經知道阿銀係金姐個女啦。



而果晚跑步既活動,金姐同SUNNY都有黎,整到能蟹果晚都好避忌講野咁,而且睇得出佢好似驚左金姐咁……應該話唔係驚,係突然好專敬佢,所有野,只要金姐話一,能蟹就唔敢話二,真係可以話果一刻既能蟹真係聽話過隻狗。

而金姐見到能蟹咁樣,都好奇怪咁問:「你係未做左d對我唔住既事先咁架?」呢一句無心既問題,真係直中要點啊,係旁邊既我同阿琪真係笑到收唔到聲。

呢一既既跑步因為少左好多人,所以好快就完,而金姐跑完就提意我地一齊去食飯,咁能蟹都話左聽話過隻狗,金姐話去佢點會話唔ok,所以就一齊去左食野。

但在食野期間,金姐佢接左個電話,聽完呢個電話後,金姐成個人都慌晒,佢同SUNNY咬完耳仔後就話:「我地有d緊要既野要做,要走先。」

「駛唔駛我送妳啊,我今日有開車黎。」無錯,唔知點解今日能蟹開左車黎跑步,咁金姐聽到能蟹咁講,當然話好啦,然後佢就同能蟹講:「我地而家要去醫院。」



咁其實人地去醫院我都唔多想理,但係能蟹又話怕一個人面對住金姐同SUNNY,所以,就叫左我同阿琪一齊跟住去,我同阿琪就因為咁一齊去左醫院。

講到呢到大家係未覺得好怪呢,點解無啦啦會發展到去醫院既,我都好想知,但事實就係咁發生,最搞笑既係開車其間,能利不停話要搵能蟹,能蟹是但講左話要去醫院,所以能利都仆左去醫院。

可能,係上天想安排今次大家既會面掛,因為直到而家回想呢一刻,我都覺得呢一切既發生,真係難過中謙合彩。

去到醫院,其實一直唔知點解要黎呢度既我終於問金姐,「其實點解妳要黎醫院既?」

金姐一副緊張話:「我個女入左醫院,所以我要黎睇佢。」



下!?金姐個女?未姐係能蟹話比佢害左果個女仔?未姐係果日叫金姐跪低果個人?未姐係比SUNNY打左一巴既女人?未姐係……姐係今晚咁齊人,未好容易知道晒件事囉!?

仲未諗到咁多既能蟹陪左SUNNY去搵護士問野,所以聽唔到金姐頭先講既野,我諗如果佢知道,能蟹一定成個人呆晒。

而係我旁邊既阿琪都聽到,佢聽到既第一刻就即刻拉一拉我既衫尾話:「而家好大鑊wo,而且能蟹個女朋友黎緊,一陣佢黎到未死得。」

係,阿琪講得好岩,能利黎到真係死得,不過已經無得阻止,因為能利已經係我眼前果個門口走左入黎,「能蟹係邊度啊?點解佢要黎醫院架?」

佢一入到黎就亂叫一通,我行左過去話:「能蟹無事。」然後拉埋佢一邊,本身想叫佢今日唔好講果一晚既事,但我都未拉佢,佢就一下推開我:「你條on9仔死開啦,我要搵……」

係啊……佢同金姐正面對望緊……

「妳未係果晚比自己個女叫跪得果個女人?」金翅仆街鳥……

「咩果晚?咩跪低?妳係邊個?」金姐問。



「前晚啊,我地幾個跟緊一個女人,然後妳衝左出黎又扯又叫佢跟妳返屋企,之後佢未叫你跪囉,然後……然後果邊果個男人就走左出黎打左妳個女一巴嘛,我地果日三個都見到架。」能利……其實妳咁好記性真係好勁……但係有無人講過有事好記性唔一定要講晒d野出黎,妳有無諗過而家既處境係點架……

能蟹企左係旁邊o晒咀咁望住能利,而我同阿琪都唔知講咩好企左能利既身後面,亦姐係金姐直接望到我地,呢一刻,我見到金姐望住我地既眼神,好尷尬。

之後,能利仲講多左樣野,「整到我條仔以為係佢害左妳個女,係佢搞到佢要四圍學壞啊。」

仆!妳!個!臭!街!

最唔想妳講果句妳都講埋出黎,金姐聽到能利咁講,本身尷尬既表情無晒,換成左一個好認真既眼神望住能利問:「等等,妳頭先講咩野?可唔可以講多次?」

「我話,整到我氣仔妁為佢害左你個……」「啪!」能利都未講完,金姐就衝左過去能蟹到打左佢一巴,「原來係你!原來係你呢個人令到我個女變成咁!!!」金姐好嬲咁話。

呢個,就係果一晚發生既事……其實都唔可以話係果一晚,因為其實只係剛剛發生完既事,我同阿琪望住面前一發不可收拾既局面,露出一副無助既眼神。