如果,阿銀既問題係佢由佢生活上面帶黎既話,咁樣可以話係佢既一個陰影,試問有一句最老套既說話叫做心病還須心藥醫,但係阿銀既心藥係d咩呢?

唔知?

係能蟹?係金姐?定係……

呢一個問題,成為左呢幾日我地幾個成日諗既問題,過左幾日後,我收到SUNNY既電話,佢約左我出黎,而姐仲有能蟹。

我地幾個係果次幫COW諗點樣哄返JUDY既大排檔度食野,而SUNNY約我地出黎,當然係傾果晚發生既事。



佢一坐低就咩都唔理,叫左幾支大啤,然後同我地兩個講:「今日男人既世界,無女人係度,講野唔駛就住就住。」

能蟹聽到SUNNY咁講後,笑左笑話:「都係既,有時有d場合有女人係度,我地男人係唔可以暢所慾言。」能蟹開左一支大啤,幫我地倒滿左後就話:「為我地呢幾個為女人辛苦既男人,飲杯啦。」

我聽到佢咁講都笑左一笑,能蟹為既女人係能利,SUNNY為既女人係金姐,而我為既……係未阿琪呢?

碰杯過後,我地叫左幾個菜送酒,而SUNNY就話:「係知唔知道當我聽到阿金佢以前既事後,我有一種感同心受既感覺。」

能蟹聽到SUNNY咁講後,用好奇既樣望住我,而我就解釋話:「SUNNY同金姐一樣,都係離過婚既人。」



SUNNY聽到我咁講後,搖左搖頭然後話:「唔單止係咁,我地除左都係離過婚既人之外,以前後生都係被好異性圍住係身邊既人,姐係果d所謂男神同女神。」

聽到SUNNY咁講,再望一望佢,其實佢雖然40幾歲,但係保養得好好,成個任達華咁款,所以佢話自己以前係男神,我真係信架,當然金姐都係啦,佢本身係美魔女,後生係女神都不出為奇。

而能蟹聽到佢咁講就話:「真係失覺晒wo。」

SUNNY笑左笑又話:「果晚我未話金姐因為被人傷害過後,所以怕自己個女都受同樣既傷害,所以唔想佢咁早試愛,不過,其實我話想同金姐一切果陣,佢都諗左好耐。」

「咁最後點解你地又會一齊?」我問。



「我同佢講我地兩個都已經係受夠傷既人,好明白而家眼前既對方係未一個可以直到最後既伴侶,如果妳覺得係既話,我地就一齊,如果妳覺得唔係既話,我地就咁算。」SUNNY話。

「好野,SUNNY,你呢d先係男人黎嘛,阿牛,你要學野拿,唔好為左一個唔值得為佢好既人一直等落去咁on9啦。」好明顯能蟹佢開始飲醉。

「又做咩無啦啦講我果d野wo。」我話,但估唔到SUNNY都講:「你兄弟講得無錯架阿牛,等其實唔係一個問題,但如果果個人覺得你根本同佢無可能既話,你等幾耐都係無用架,記住,有時做男人要硬正d架,咁樣d女人先會覺得有安全感,嫁得過。」

唔知點解,總覺得呢句說話,如果係能蟹講出口我可能會燥底,但而家係SUNNY口中講出黎,反而又好似有d道理。

我地三個男人,愈飲愈多,愈飲愈多,咩都傾下,而最重要既我記得係有傾過點樣幫阿銀同金姐既事,但係詳細內容……我就唔係幾記得。

不過發展落去既事……可以話係波折重重。

因為又係一個會入院既故事。