「我唔信……」阿銀已經比金姐打到面有少少腫,「……我唔信我贏唔到妳。」

其實我好佩服阿銀呢一種骨氣,面對一個無可能贏到既人,仲可以一直咁輸落去都唔會無左果一份氣焰,真係無幾多個人可以咁堅持。

但係,我又好好奇,金姐打左咁落,佢唔累架咩?

正手打巴、反手打巴、左右手互換,計上去點都多過我果二十七腳,佢過五十都有啦,隻手唔痛架咩?

就當我諗緊呢個問題時,阿琪係我旁邊輕叫左一聲,「嘩!」我回過神望一望,一睇,我都嚇親。



「仆妳個街!妳條八婆打還打啦!擸架撐打都有既!」阿銀燥左咁話,然後同個主持話:「投訴啊!佢點可以拎野打架!話明用手架!」

唔好話我話,我係同金姐同組都覺有少少過份,點解我咁講,我真係唔知佢係邊度拎左塊乒乓波拍出黎,仲要用呢塊拍打落阿銀度。

我同阿琪……唔止,係仲有在場既所有人見到都叫左出黎,而SUNNY就只係笑到眼淚都流左出黎,睇黎佢都見慣金姐咁樣掛……

而家既阿銀左邊面上面係有好多粒粒既印,因為金姐係用有好多膠粒既地方打落去阿銀塊面度,「最開頭都無講到唔可以用啊!」金姐反駁,睇黎佢係玩得性起,已經咩都唔理,佢仲用塊乒乓波拍指住個主持話:「你未撚理咁多啊!而家係我地兩母女既戰爭!你想加隻腳入黎我連你都打埋!」

主持人聽到金姐咁講,都唔敢再多講。



「咁係未仲繼續啊!」金姐呢一刻用手推左阿銀一下,就係呢一下,令到今姐輸左,點解?未就係好似我頭先贏馬高咁,因為金姐推果一下隻手既手指張開晒,而阿銀就係呢個時候出剪……

望住呢一拳,無奈,金姐只可以無奈咁笑左笑,但阿銀就唔同,佢好興高采烈地搶走左金姐手中塊乒乓波拍,然後話:「妳知唔知我等左呢一日好耐!我成日發夢都想打呢一巴啊!」

蓄勢待發,望住阿銀既表情,就睇得出佢真係等呢一個機會等左好耐,「就係因為妳!點解要同阿爸離婚!阿爸係一個咁好既男人!點解妳要放棄佢!」

我地幾個聽到阿銀講呢一句後,不約而同望住SUNNY,而SUNNY就解釋話:「因為金姐前夫係阿銀心目中係個好男人,係個英雄,所以金姐唔想佢個女心目中最崇拜既人有污點,所以就幫佢前夫食左呢一隻死貓食到而家。」

一切,就係SUNNY呢一句後原全明確,而阿銀亦都向金姐打出佢一直好想打佢既一巴,而且係用一塊乒乓波拍添。



但係,保護一個人,真係要保護得咁徹底咩?唔比真相佢知就等於保護咩?

「我同妳阿爸離婚,係因為佢出便有另一個女人。」「啪!」塊乒乓波拍接觸左金姐塊面後,微腫既臉上面有好多粒粒印,因為打落塊面既果一面係有好多膠粒,雖然金姐最後都比阿銀打左一巴,但係,佢將呢一個無對阿銀講既秘密,係呢一刻終於講左出黎。

就好似係一種如釋重負一樣,被打既金姐依然屹立不倒,雙反地,聽到金姐講呢一句既阿銀,成個人呆晒,無左果種氣焰,手中塊乒乓波拍跌左落地,「妳頭先講咩?」

金姐流出眼淚,「我同妳阿爸離婚,係因為佢出便有另一個女人。」「啪!」今次呢一巴,阿銀係用佢隻手親身打上去,「我唔準妳亂講阿爸啊!阿爸唔會咁架!」

「啪!」「啪!」「啪!」「啪!」「啪!」一巴又一巴響徹整個場,在場既人一粒聲都唔敢出,只係睇住阿銀不停打金姐巴掌,「啪!」「啪!」「啪!」「啪!」「啪!」佢一路喊一路打,佢接受唔到呢個現實,而金姐就一直企係度,佢唔痛?傻啦,點會唔痛,只不過佢無講出黎,而且,佢臉上既痛,又點會及佢而家呢一刻,見到佢個女喊到咁既心痛。

打到無力,喊得無助,阿銀跌坐係地上面,金姐望住喊成咁既阿銀,佢自己都喊得好傷心,而呢個時候,「警察查牌!開燈!」

一切,就好似突然係燈開後告一段落。