[愛情無限loop] 就係咁，我做左女神一年既備胎: ３１２　夜空下的表白

咁究竟，我應該同阿琪一齊定分開會好ｄ？

本來以為跑完步思緒會無咁亂，估唔到仲乿過先前，漫無目的係屋企樓下踱步，直到，收到一個電話。

「喂？」我話。

「喂？係未阿牛啊？我係藍臣啊，阿琪佢唔見左啊。」藍臣把聲好慌張咁話。

「點會咁架！？」我問。



「唔知啊，本來頭先係屋企既，佢央求佢媽媽比手機佢玩一陣，點知佢拎起左部手機望左唔夠五分鐘，就喊住衝左出去，我地阻都阻唔到。」藍臣話。

「唔係掛！咁你而家搵緊佢？」我問。

「係啊，所以打比你諗住阿琪去左搵你，佢係唔係你身邊啊？」藍臣問。

「唔係啊，我都幫手去搵下。」我話。

「好！」藍臣講完後就收左線，而呢一刻，我貓海中閃過一個又一個阿琪會出現既地方，然後，跑起上黎，每一個每一個地方跑去搵。



「阿琪！」口中不停係咁叫：「妳係邊啊！」完全無理到而家已經係夜晚，劃破長空不停叫，可能，好多人都以為有個痴線佬係街到跑緊。

公園……無。

阿琪樓下……無。

後樓梯……無。

我去晒阿琪一唔開心就會匿埋喊既地方，但都係搵唔到佢。



究竟個傻豬發生咩野事，做咩無啦啦唔見左人。

我毫無目標咁四圍跑，跑入果ｄ唔識既路，當有人係我身邊擦過我都會停低望一望佢係未阿琪，但係，無一個係佢。

點算？如果阿琪咁樣唔見左，我點算？我仲要陪阿琪上去架，妳唔可以唔見左架。

緣份，永遠都鍾意捉弄人，又係果一條回家既路上面，我見到一個女仔坐左係石壆上面，手上面拎住一個不停響緊既電話，而佢，就目無表情咁望住頂頭既夜空，任由眼淚流出黎。

今晚既夜空，好黑，我慢慢行到呢個女仔既面前，攬住佢話：「傻豬，邊個欺負妳？」

比我攬住既阿頁，好惡咁望左我一眼好，好大力咬左我既肚一下，因為我係企係度攬住坐係度既佢。

感覺到痛楚既我，詫異地望住佢，而佢，就開左電話既一個ｃｈａｔ入面既一張相我睇，原來，係我頭先跑完步食飯，比女圍既相。

再睇清楚，係ＡＬＡＮ條狗公ＳＤ比阿琪。



呢條友仔真係打得少……

「我無理果ｄ女仔架。」我同阿琪講，而阿琪，就扮到好嬲咁唔理我。

我坐低左，「唔好嬲啦，我真係無理佢地架。」阿琪別過面，而我，就拖住左佢隻手問：「傻豬嬲既話，以後唔帶妳食好野架。」對住呢個為食豬，一出呢招佢就無事。

佢望住我，然後狠狠地話：「今次要食三餐自助餐！」

「嘩！咁嚴重啊！」我微笑話。

「緊係啦！」佢答。

「好啦……三餐自助餐啦。」係阿琪面前，我永遠都會被佢打敗。



講完ｄ無謂野後，我就認真咁問：「做咩無啦啦走出黎又唔話比其他人知？」

阿琪聽到我咁問後，佢一臉認真咁開左一個男仔既相我睇，然後話：「原來，我爸爸今次唔只想藍臣帶我上去醫病，仲想帶我上去相睇。」

真係……一波未停……一波又起……不過，都唔會令我想同阿琪一齊上去呢個諗法動搖。

我緊握住阿琪既手，然後好鄭重咁同佢講：「阿琪，今次我要陪妳一齊去，無論邊個反對，我都會咁做。」

阿琪聽到我咁講後，好驚訝地望住我話：「你傻左咩，咁你屋企人點算？」

「我已經同我阿爸傾過，佢話我大過，以後條路點行應該係我去揀。」我答。

「你爸爸真係好。」阿琪話：「但係，我無諗過你會咁樣做。」

我聽到阿琪咁講後，微笑左一下話：「妳唔駛諗，以後既野，交比我諗好唔好？」



「我……」阿琪支吾左一下，「我唔知點答你好。」

我撫摸住阿琪既臉，然後，輕輕係佢既額上錫左一啖，「唔駛答，一切，真由佢慢慢發展，好唔好？」

呢一次，唔知算唔算係一個表白？