[愛情無限loop] 就係咁，我做左女神一年既備胎: ３１９　母牛大人

做左呢一次大清除之後，我把心一橫熜左自己既電話，行返出廳繼續陪媽媽佢折元寶，折左無耐佢就問我：「你阿爹先前同我講你鐘意左一個女仔，個女仔點架？」

比佢突然咁樣一問，我都唔知點答佢，只好支吾左一下後話：「一個好女仔，好孝順，好顧家。」

「佢顧家你又知？」阿媽問。

「咁佢有少同我傾心事果陣，好多時候都講佢屋企既野。」我答佢。

媽媽聽到後，露出左一絲難得既微笑，「牛仔，你知唔知你同你阿爹好似架。」



「邊度似？」我問。

「牛脾氣，鑽牛角尖。」佢好直接咁同我講，而我就無奈左一下望住佢，「但係，可能就係因為呢種性格，你阿爹先可以追到我。」

「我都有聽阿爸講佢果陣追左妳好耐，係妳身邊對妳付出左好多，甚至放棄左佢以前既家。」「無錯。」阿媽佢好珍而重之咁張折好左既元寶放左入個袋度，「但你知唔知度，當初我好反對佢咁做，因為佢父母將一生既愛比左佢，而佢卻為左愛我而放棄左佢地，我知道，仔女一大左，總有離家既一天，不過，我果陣希望佢選擇既，係家人。」

「點解？因為你唔鐘意阿爸？」我問阿媽，而佢搖一搖頭話：「唔係，就係因為太愛，所以希望佢選擇家人。」

「因為太愛，所以想佢選擇家人？」我問，而阿媽就繼續答：「如果佢選擇家人既話，就唔會好似今時今日咁，想返去搵佢地都無方法，其實你阿爹好想搵返佢地，不過，點搵都搵唔到。」



「咁……」我欲言又止，同阿媽對望左一陣，見佢眼神好似叫我可以問，我先開口問：「如果當初，阿爸揀左家既話，妳會……」「我會等佢。」直接而肯定既答案，我諗無論係幾時答呢個問題都好，阿媽都係咁堅定。

唔知，阿琪同阿媽既想法會唔會都一樣呢？

「其實我地兩母子好少咁樣傾計，可以話直頭無添。」阿媽佢笑住講呢句。

「係囉，好似真係無。」我話：「不過以後，應該會成日咁傾。」

慢慢折下折下，我都已經折左三大袋，折咁多因為要每日都燒ｄ，阿媽見都夠燒幾次，就收返起ｄ野，叫我去搵果位叫小段既人問問阿爸身後事既野。



入房，開返熜左既電話，已經見到好多ＭＩＳＳ　ＭＳＧ　同幾十個未接來電，唔知點解，仍然係無心情開出黎睇，轉左個飛行模式先。

ＳＤ　左個ＭＳＧ比小段，佢好快就回覆，見佢ＷＨＡＴＳＡＰＰ張相好似係個後生仔，好鬼似ＭＲ入面既主音。

然後，望一望個ＣＨＡＴ　ＬＩＳＴ，同我所想一樣，佢地個個都搵緊我。