阿珍同阿塔下一個地點,係阿琪樓下既公園,其實我地都有諗過呢個地方阿琪出現既機會率係好細,因為如果阿琪真係唔想比人搵到,又點會係屋企附近出現,但係能蟹話可能阿琪有機會無啦啦諗通左返屋企……而且佢好堅持佢既諗法係岩。

就係因為呢一點以及佢既堅持,阿琪屋企樓下既公園都成為左要去搵既地方。

一去到呢個公園,我諗起好多野,好多同阿琪係呢個公園度既回憶。

「個公園其實一眼望晒啦,唔好話阿琪,一個人都無。」阿塔話。

「係囉,個能蟹又係既,係都要所有人係度搵一次,其實如果係我既話,要玩消失又點會返屋企。」阿珍既答案,正正係我地所想。



「咁唯有當呢度係休息站啦,坐住係度等阿琪。」阿塔坐左係搖搖板既一端,阿珍見到阿塔咁,都跑左去另一端,「我又玩。」

點知一坐上去,阿珍果邊好明題下墜得比阿塔果邊仲要多,「妳條衰妹呢排食多左定跑少左啊,重左咁多既,仲重過我WO。」阿塔笑住咁話。

「邊有啊,你不嬲都知道我骨頭重架啦,所以我實重過你。」阿珍既反駁。

而阿塔只係用兩個字已經完美KO左阿珍,「借口。」

「你一定想死定。」阿珍講完呢一句後,好用力咁坐到底,整到住佢對面既阿塔成個人彈起左。



「我諗係妳想死先岩。」阿塔都好唔客氣,就咁樣佢地就玩起上黎。

剩低心情仲係焦急既我,我都想好似佢地咁放鬆可以係度玩,但係如果唔搵返阿琪,我真係連坐係度既心情都無。

望住佢地兩個梅花間竹咁一上一落,玩得咁開心,加上佢地剛剛和好如初,真係無法阻止佢地。

但係,我真係要係呢個公園到守株待兔?

呢一刻我好唔想咁,但係我又可以點做……



就當我不停諗緊仲有咩方法既時候,阿珍突然同我講:「阿牛!你睇下果邊係邊個!」

唔通!?係阿琪!?

我聽到阿珍咁講,即刻望去佢所指既方向,但見到既,係一個男人,一個熟識既男人。

「阿富……?」我慢慢行到已經停下腳步既阿富面前。

而佢係我行到佢面前既時候,就問我:「你地咁夜係呢個公園做咩啊?」