[愛情無限loop] 就係咁，我做左女神一年既備胎: ３３５　心入面既答案

如果可以既話，我真係想呢一程車開到最後，直到永遠，因為，阿琪就住係我身邊，我地兩個拖住手，佢個頭枕左落我既膀頭上面。

呢一刻，我地係情侶，我諗所有旁人都有呢個諗法。

「估唔到，每當我地好似就快可以係埋一齊，都會有Ｄ事發生咁？」阿琪話，而我微微咁點一點頭，我個臉頰撞輕輕咁撞落佢既頭頂，而佢就笑左幾聲話：「但如果唔係有發生呢Ｄ事，我地都唔會走到今日呢一步。」

我仍然都係靜默咁點頭。

然後，阿琪望住左我，「你仲係唔係好唔開心啊？」佢呢個問題，我知道佢係以老牛大人走左呢個出發點而問。



「係，因為太突然接受唔到。」我答佢。

「你知唔知你尋晚話我知既時候，我都嚇左一跳，之後又搵唔到你，見到你仲ＱＵＩＴ晒所有ＧＲＯＵＰ，我不知幾驚，所以想去搵你，瞞住爸爸走左出黎，但又唔知去邊度搵，只係不停去同你有回憶既地方到漫無目的咁等，等到電話都無晒電。」唔怪得知一直ＳＤ　ＭＳＧ比佢都唔應啦。

「其實，妳爸爸有搵過我。」「真架！」阿琪聽到我咁同佢講後，反應好驚訝。

「佢同我講左Ｄ野，然後再同我講妳唔見左。」我如實將佢爸爸同我講既野話比佢知，而佢聽到後微笑左一下話：「我一直都明白佢係為左我好先咁樣做，所以我一直都好尊重佢每一個決定，但係，我始終都有自己想做既野。」

「妳爸爸知道，不過，佢始終都會實行佢既方式，但同樣地，佢地比妳用妳自己既方式。」我話：「妳其實都幾似妳爸爸。」



「唔係掛，我靚咁多。」阿琪笑住咁話，而我就輕掐佢既鼻一下話：「我講你地兩個既性格，一樣咁硬頸。」

「係堅持啊，唔係硬頸。」佢呢一句無心插柳，令我諗係老牛大人封信入面所寫既內容。

我深呼吸左一啖氣，然後問阿琪：「妳幾時要返上去？」

阿琪靜左一陣，「今個星期六。」姐係，仲有三日。

地鐵係隧道入面飛馳，氣流慢慢刷過我地，我望住前面因入左隧道成黑色反射既窗，見到阿琪安穩既表情，「阿牛。」佢叫左我一聲，「其實你唔跟我上去，我都唔會怪你。」



突然間，全世界就好似靜左一樣，好似等緊我回答阿琪呢一個問題，「點解妳會咁同我講？」

「因為……」阿琪與我四目交投，「我知道你心入面既答案。」