《廿一歲個年，我成為左隱世富豪》－大結局: 第二章：天使
「好，唔該。我等陣會揾返佢。」
「誠翔，咁我出去攞文件先。」
「嗯。」
究竟有無人可以話比我知而家要做咩...
叮叮叮，電話突然響起，嚇左我一跳。
「喂，係咪王誠翔？」係女仔聲，不過邊個咁大膽直呼我全名。
「係，請問你係邊位。」
「我係Venus，將會係你秘書。」又多個秘書？
「下，我已經有一個秘書啦喎。」
話筒無再回答我，反而咚咚既敲門聲引起左我既注意。
「誠翔，呢個人話係你秘書喎。」見到Chole個樣有啲不屑，唔通佢覺得秘書一職有危機？
「Chole你返出去先。」
「係...」好明顯，Chole有啲唔開心，睇黎等陣要開解下佢。
「你係邊個？」
「你無需要知道我係邊個，你只需要我係你身邊。」講到自己好有利用價值咁，就睇下你有咩咁犀利。
「我會成就你呢個身份同地位，將你唔明既野，逐樣同你解釋。」竟然係咁？
「你好似知道啲野咁。」
「我知道你從前係一個賊仔。」
「得，你想點。」
「我只係想幫你。」Venus逐漸行過黎，仲坐左係我張枱到。而家行緊左，發覺佢都幾靚，可能只有22歲，但係佢穿著起OL裝束黎，又顯得佢幾成熟。
「點解你要幫我。」
「因為我想阿天死。」阿天？係咪頭先Chole同我講咩烽火聯盟個個阿天？
「算啦，你第一日做人咩都唔知，就等我話比你知點樣玩呢個有錢人既遊戲啦。」太好啦，聽到有人指導我行，興奮都黎唔切，但係對呢個女仔仍然存在戒心。
「既然你咁想知咩係烽火聯盟，咁我就以最簡單既方法話你知。」Venus企起身，原來佢都幾高，而且身材比Chole好，甚至比佢顯得成熟。
「烽火聯盟係五個後生仔而成既聯盟，控制政府施政，政策，經濟等等，甚至將來控制全世界，而呢五個人互相制衡，無人會有過高既權力，而呢個五個人當中你都有份。」
「下，有我份？」可以控制政府甚至控制全世界既人？
「無錯，你地五個後生仔被揀選為最有智慧既人才，但係每一個人都有好大既缺點，如果五個人唔互相制衡，成個聯盟就會決裂，甚至會出現有人獨大既情況，而想獨大個個就係阿天。」最有智慧既人才，呵，竟然係咁，點解我仲未察覺到。
「其實邊個唔想獨大...」
「無錯，當每個人都想獨大既時候，就係唯獨阿天，佢咩都唔做，等你低自相殘殺，最後佢就漁人得利。」
「乜有咁簡單咩？」
「唉，同你講都無用，帶你去開一次會你就會明白。」
Venus幫我約晒佢地四個出黎，等我見識見識一下。
「點解開會既地點會係我地公司？」
「因為係你約，就要係約個個人既公司開會。」
「咁今次開會有咩講？」
「放心，我會係你身邊。」佢咁講的確令我放心，但係乜我真係有咁既能力去成為個五個人其中一個咩？
「等陣你要講既野好簡單，就係報告今期公司業績。」Venus攞左一份報告比我，上面全部都係英文，但係奇怪既我，即使中學英文成績有幾差都好，而家既我竟然可以睇得明成份報告。
「明唔明？」
「明。」其實我只係望左一兩眼。
「果然係醒目仔，無睇錯你。」到而家先知道原來我間公司係做科研產品，最新研發既耳機獲今年銷售總額達一萬億美金，究竟一萬億美金有幾多個零...
「等陣就簡略咁講下報告既野啦。」Venus摸一摸我個頭，雖然有啲唔鍾意，但係就比到好大信心我。
「好。」
「今日又係大家present公司業績既時候。」作為主人家，先出聲都係理所當然。
「不如阿天你先報告一下？」係會議室裡面，光線稀微，但係仍能好清楚咁見到其餘四人既樣貌，有兩個係女仔，兩個女仔都眉清目秀，樣貌標致，而且真係好後生，而且有一個都幾可愛，睇個樣真係唔似啲咁有機心既女仔。而另外既兩個男仔，一個著西裝，一個就著衛衣，個人將衛衣頂帽戴上，甚至到而家仍然以黑色口罩遮臉，比人好神秘既感覺。而著西裝個個樣貌非常奸險，相信唔使講都知道佢就係阿天。
「好，今年我地Flyupon集團研發既手機應用程式成功索取十億用戶既個人資料。」下？唔係講自己公司賺幾多錢咩，點解會講自己成功索取幾多用戶既資料既？同埋偷取就偷取，咩索取，講得咁好聽。
「但係就有五億用戶安裝反駭客程式，呢五億個用戶分佈係中國大陸同美國，我地將會係呢個禮拜採取進一步行動。」西裝友，即係阿天講完之後，個位比較可愛既女仔企左係身，開始佢既報告。
「而我地恆金集團所研發既VR裝置，有三億用戶，已經成功將全部用戶大腦鎖定，可以控制佢地，亦可以隨時進行操作。而我地研發既VR，除左我地本身自己研發部，無人可以攻擊到我地系統，所以一切順利。」咩話...VR都可以操控人地大腦？呢個五人既世界真係恐怖。
「到你啦，誠翔。」我吞左啖口水，準備我既演講。
「我地明雲集團所研發既耳機有二十八億用戶，相信大家都知道呢個而家既特別之處，就係一款植入式耳機，將耳機植入人既大腦，而且防水，放火，對人體無害既無形耳機，一旦植入，就無得攞返出黎。所以當呢二十八億用戶認為呢款新型耳機真係革新時代既耳機既時候，其實耳機已經將我地烽火聯盟既生化武器植入大腦。」
「好，大家都既產品唔錯。」個位戴住黑色口罩既人終於開聲，佢除低口罩，放低頂帽，佢，原來係Dennis。