到底人一生追求嘅係咩?錢?女人?我細細個已經成日咁問自己。自從肥仔誠介紹我玩呢個遊戲已經幾個月,一開始佢話我裝個個版本好怪,明明其他人係ver. 4.5.2, 但偏偏我嗰個係ver. X beta。明明係肥仔自己幫我係Play Store down落嚟,但佢自己都一頭霧水。由一開始抽到一千萬現金之後,我就慢慢墮落,世界所有野我都可以得到,愛情?金錢?權力?已經滿足唔到我。我而家想了解嘅係真相,到底我發生梗咩事?點解我只需要郁一郁手指公就可以得到呢個世界嘅所有嘢?我冇諗到追查到最後,會發現原來世界唔係我所諗咁簡單……
       
「阿凡你想去邊?」阿玟問我,我而家只係想用自己嘅人力去了解呢個app到底係點運作。我曾經課金過四次,每次課金嘅單位都係一章,到底一章點解?你話故事就係一章章姐,錢又點會係一章章呢?
       
而家唯一嘅線索就係呢個app嘅開發公司——ACCHATER。呢間公司暫時只係開發過一隻Game,就係我玩梗個隻。我諗住直搗黃龍去搵佢哋最高話事人了解發生喺我身上嘅事。ACCHATER嘅總部位於印度,一個好神秘嘅地方。我乘搭私人飛機到達ACCHATER嘅總部,一入門口以為一定會有人阻撓,點知接待處嘅女性笑一笑話:「總監已經係55樓等梗你哋。」
       
我同阿玟搭升降機去到總監嘅門前,封閉嘅門好似迎接我哋咁慢慢打開。
       
「我等咗你好耐喇張啟凡先生。」眼前嘅印度佬居然以流利嘅廣東話講。
       


「唔洗驚訝,我已經張廣東話嘅字庫、發音嘅上下變化植入我嘅腦。」
       
「植入?」我問。睇嚟眼前呢個人可以解答我一直想知嘅疑問。
       
「張生,你知唔知人嘅腦而家開發度去到幾多?正常人用唔到自己嘅腦嘅百分之十,但我哋已經掌握技術,除咗可以令人發揮自己腦嘅50%,更加可以令嗰個人用腦電波去影響其他人嘅思想,同植入知識。」
       
「至於你玩呢個遊戲用嘅到底係咩?哈哈……」
       
「即係我而家抽到嘅智慧、身邊人嘅關係都係你哋隔空去更改我哋腦電波而導致?」我驚訝咁推測。「咁你哋都可以憑了解人腦去知道人嘅壽命,可以令人長生不老,亦都可以殺人於無形?」我的推理能力因為我抽到嘅銀蛋而有所提昇。印度佬輕輕點頭。
       


雖然我嘅思考能力已經比正常人強很多倍,但因為唔係金蛋,所以我一開始根本諗唔通。情形就似雖然知道好多線索,但就係差將所有嘢連埋嘅一條線。
       
「係呢,你到底課咗幾多次金去換取抽嘢機會?」佢雖然喺到微笑,但佢嘅笑好奸,好有陰謀。
       
「我課咗四次,但魔法石只係得返四粒,即係只可以抽多一次。」
       
「知唔知點嘢每次要用四粒石去抽?知唔知一章又係咩意思?如果一章唔係代表故事嘅章節,而係時間呢?」他再次冷笑,笑到我毛管都梀晒。
       
「月分成閏,閏七而盡,其歲十九,名之曰章。章首分盡,四之俱終,名之曰蔀。後漢書記載過以上中國古代嘅曆法,十九年為一章,四章為一蔀,一蔀即係七十六年。」
       


「你意思指我一直將我生命四年四年咁去抽,去換取而家所有嘅嘢?」我嚇到標晒冷汗,睇嚟我估計冇錯。
       
「張啟凡,你陽歲本應有96歲。不過你呢一年內抽啊抽,抽啊抽……而家已經得返4年零5分鐘嘅壽命。」
       
「唔撚係啩?」我決定講句粗口定一定驚。咪住,如果過多五分鐘,魔法石再扣一粒我就冇可能再抽,我就注定要過埋個三年幾之後就賣鹹鴨蛋。
       
「咁我仲會唔會有機會去扭轉而家嘅困局?」雖然唔知眼前嘅人是敵是友,但為咗生存,只能夠探吓佢口風。
       
「張生你鐘唔鐘意玩俄羅斯輪盤?不如同你玩一場。我會叫人係抽蛋機只入兩隻蛋,當中只有一隻金蛋可以重置你嘅人生。50%機會你會走得甩,50%機會你嘅壽命只係得返5……4……3……2……1,三分鐘。」
       
我打開手機,眼前依舊係嗰部扭蛋機,我堅定咁望住印度佬,一嘢拉落去。