我發現左我呀哥成日對住部電話講一種我聽唔明既語言: 3 因爲我未夠狠

上回講到

細佬終於拎到家姐朋友呀儀既電話。


------------------------------------------

我即刻whatsapp呀儀。
「你上個sem係咪同過呀惠同過科同同過組呀？」
「係呀！你係？」




「你好，我係佢細佬。突然咁樣搵你可能好堂突，但我真係有好緊要既事想問你。我想問我呀姐之前係咪問過你我呀哥講個d係咩語言？個d係咩語言呀？」
「係呀！但佢之後都冇whatsapp佢d錄音比我！」
「可唔可以出黎見個面？」
「吓！」
「唔該你呀！我懷疑我家姐出左事，佢最近好奇怪。」
「幾時？邊到？」
「今日1400city canteen，ok?」
「ok.」

----------------------------------------





哥哥放低手機，上面係hack 左細佬（呀言）手機睇到佢whatsapp記錄既畫面。
哥哥：「聽日就郁手啦！」
家姐：「但總部未有人落黎。」
哥哥：「咁落去我地既身份好快會比佢揭穿，我地要先下手為強。」
家姐：「好，聽日爸媽9點就出門返工，我地個陣時郁手。」
哥哥厭惡咁講：「佢同佢家姐一樣咁麻煩！」

---------------------------------------





我好緊張咁坐左係city canteen 等佢，canteen好多人，我不停望呀儀係邊。一到約定時間，我就打比佢，我搵到佢之後，搵左個角落坐底。我地第一次見面，我地都顯得有d尷尬。但反而係呀儀開口先。
佢話：「其實我都覺得呀惠有d奇怪，我之後問返佢sd錄音比我，但佢就話唔使啦，之前明明仲勁緊張，勁驚。而且佢突然變到好抗拒同我交往，所以我地就冇再交流啦！仲有既係，佢身邊既朋友群突然變曬，好多係外國人，佢個人咁內向，咁樣真係一d都唔似佢。不過個時我廢時多管閒事，又驚自己諗多左。我就冇再留意佢啦！」
「呀儀，多謝你肯出黎，唔怕同你講，我都覺得佢變左個人。甚至我覺得佢唔係我家姐，我先想叫你出黎，攪清楚件事。」
「咁.......我有咩可以幫到你呀？」
「我偷錄左我家姐同我呀哥一d對話，你幫我睇下究竟係咩？」
「好，你sd比我，我盡快搵人幫你睇。」
「唔該曬！」

個晚返到屋企抖左陣，呀儀就打左比我，我心諗咁快有消息，仲要咁急打比我。
「細佬，我查到個d文係阿拉伯文。」
「阿拉伯文？」
「係！其實好奇怪，阿拉伯文唔係有錢就可以學到，香港真係冇咩人識。而且我朋友仲同我譯埋佢地講d咩！我而家sd比你睇。你真係要小心d!」
「好！真係唔該曬你！」
「唔好咁講，我都當呀惠係我朋友既！再需要幫忙搵我。」
「好！咁遲d再講啦！」





～叮～
呀儀 sd 左個 whatsapp比我
｛男：「佢已經開始懷疑我地。我地要快d行動。」
女：「經過我今日既表現，應該仲可以令佢信多陣既。」
男：「點都好，最近小心d，等總部派既人到左就即刻郁手。」｝

睇完段whatsapp, 我即刻打左電話比我個死黨呀樂。
「喂！呀樂，我有麻煩，想你幫下手。」
「講！」

------------------------------------------

到左第二朝，我聽到呀爸呀媽都出左門！「家姐」「呀哥」又冇咩動靜，或者大家都係等緊一個機會。





直到中午，我想出去碌個杯麵食，點知「家姐」同「呀哥」都已經坐左係廳到，我一出黎就企係到望住我。

「做咩？」我問。
呀哥：「你好清楚，亦都係因為你太清楚，所以我唔容許你咁落去。」
家姐：「臨死之前，有冇咩想知？我會盡量解答你。」
我：「我家姐同呀哥係邊？」
呀哥：「你知道嗎？你同你家姐一樣咁麻煩。我就係要送你去搵你家姐。」
「呀哥」講完之後，就同「家姐」慢慢接近我。係呢個時候，我既幾個死黨（呀樂，呀聰，呀峰）係我間房行左出黎。

「你兩條仆街唔係以為我會單人匹馬黎對付你地呀麻！你而家唔講唔緊要，陣間我會打到你地講。」
四對二，我胸有成竹。

點知「呀哥」冷笑左一聲，以迅雷不及掩耳既速度衝過黎打左呀呀峰同呀聰一拳，佢地跌左落地下，表情好痛苦。之後我同樂就同「家姐」「呀哥」打起上黎，呀峰同呀聰都爬左起身。我同呀聰對「家姐」，呀樂同呀峰地都對我「呀哥」。
我地四個平時都有做運動，論體格都算係年輕力壯。點知4對2都打得勁吃力，佢地真係好快，拳拳有力，就好似被訓練過咁。經過一輪打鬥，我地4個都食左好多拳。呀聰甚至跌左落地撞到個頭，暈暈地咁。就係呢個時候，「家姐」將我禁係地下，鍊着我條頸，好大力，令我呼吸困難。佢笑住問我：「你知唔知點解你打唔贏我呀？」





---------------回憶-------------------------------

「你知唔知點解你永遠打交都打輸，從來冇贏過？」家姐以前都曾經咁樣問過我。我細個成日同同學打交，成日整傷，但從來冇贏過。
「點解？」
「因為你唔夠狠，做大事一定要心狠手辣。仲有嘅係，你心入面根本就唔想傷害嗰個人，咁你又點會贏呢？」我聽完呆左，家姐笑左笑又再講：「所以你同我都唔係做大事嘅人，做好d小事我就心滿意足啦！」
「咁咩時候我先可以變得夠狠呀？」
「當你有想保護嘅人，你就會變得夠狠。因為你知道如果你輸咗，個個你想保護嘅人就會受傷。」

---------------------------------------------------
我答「家姐」：「因為我唔夠狠。」
之後我就一野踢開佢，企左起身，大叫：「呢兩條仆街唔係我家姐同阿哥，唔好留手，同我打到佢哋趴喺度。」
因為我呢句野，大家士氣大增，一齊打到佢兩個趴左係到。
綁起左佢地之後，我去左搜佢地間房，竟然比我搜到4支手槍。我用支槍指住「呀哥」個頭，問：「佢地究竟係邊？」
「呀哥」依然冷笑，講：「放左我，我帶你去搵佢地。」
我望住「家姐」，講：「你帶我去，唔好諗住玩野，我會一野打爆佢個頭。」




我點諗都係帶個女仔安全d.

「我同佢去搵我屋企人，你地係到睇住佢。」我同班死黨講。
「我跟埋你去。」呀樂講。
「好。」我都諗多個人多個照應。
我地一人拎左一把槍，帶住「家姐」坐的士去搵我家姐同呀哥。
的士上左山，入左一個好好好偏僻既地方，落左車行多30分鐘先到一個大草地，「家姐」示意我地摸下地下，呢度竟然就係入口，比d草隱蔽得好好。開左度草皮門，沿樓梯行落地底，係普通既住屋咁樣，有廳有廚房，有床。唔通佢地就捉左佢地係到，逼佢地係到生活唔比走。

「佢地係邊？」我好心急咁問。
「家姐」繼續帶我地行。行到一個好大既會議室。會議室旁邊有一道銀色，好似夾萬咁，睇得出好厚既門。我摸下門身，好冰。我問：「佢地就係入面？」
「係！」
「點開？」
「就咁扭個盤。」
我即刻去扭個盤，好重，要好用力，好用力咁扭。而呀樂就用支槍指住「家姐」，廢時佢玩野。終於扭開，我一野推開道門，刺骨既寒氣由門口湧出黎，而我見到入面既野之後，差d心臟停頓。
入面一個一個裸體既人，好似豬肉咁，個背隻比勾勾住，一排排，一行行咁掛左係到。最恐怖既係，佢地個頭都係血肉既顏色，由面到頭皮都係，好血腥。不過可能因為受到冷藏既關係，入面一D血腥既氣味都冇。呢到既寒冷甚至令我覺得裸體既僵硬係因為凍，而唔係因爲死亡。

「佢地呢？」我震住咁問。我都唔知我係因為凍而震定驚而震。
「就係到，你搵下。」「家姐」笑住咁答。
「我問你，佢地係邊呀？」我大嗌。
「係既，咁多個，係可能認唔到既！個到有本簿，有寫邊個打邊個。你攞黎睇下佢地係邊。」

待續


#有興趣歡迎讚黑柴Facebook
https://www.facebook.com/%E9%BB%91%E6%9F%B4-879053098899020/