我發現左我呀哥成日對住部電話講一種我聽唔明既語言: 18.克服
見到呀風詭異既笑容，我個心當堂離一離，心諗今舖我死梗啦！好後悔自己咁大意。之後，我用盡全身既氣力大叫：「小——七，救我！」聲音大到係房入面產生強大既回音，但我好清楚呢個密室做左隔音既，離開左既小七要聽到我既求救聲，根本係冇可能既事，但我都要試，因為我已經冇辦法。
Voice 聽到我大叫，唔耐煩咁扯起我d頭髮，再將我個頭撞落地下，不停撞，不停撞，撞到我又暈又痛，無力反抗。眼見Voice 自己褲都除埋，我先意識到有幾咁恐怖。
突然，Voice比人一腳踢開左，迷糊之間我見到兩個人扭打起上黎，我拍下自己個頭，逼自己醒返d，先睇清救我個個係呀風。咁我岩岩見到佢笑係睇錯？情況緊急，我冇理咁多，想幫呀風手制服Voice，但望勻成間房都見唔到可以做武器既野。係既，因為怕療養者頂唔順要自殺，入面係無任何危險品，係連枝筆都冇。而我見到呀風係處於下風，明明Voice已經日日注射激素，但身型依然有增無減，打到呀風一仆一碌。
「Nir!你走先！」呀風講完Voice就一個膝頭頂上佢個肚，佢痛到瞓左係地。我見到咁，轉身就走，點知一野比Voice扯返返黎，禁我係地下，今次真係死梗啦！突然，間房就噴出左白煙，我跟住就暈左。
醒返既時候，我已經係返自己間房，小七坐左係我床邊。
「Nir,你醒啦！你見點呀！」佢熱切咁問。
「點解？」
「我返黎個時，見到你比Voice禁左落地，我就開左個鎮靜氣體，所以你地都暈左。」
聽完之後我靜左。小七就繼續講：「Nir !對唔住，我差d累死你地。」佢依然眼神望住床邊。我握實拳頭講：「你知就好。」佢低頭不語，我再一手扯住佢衣領兇狠咁講：「道·歉，就要有誠意d，望住我對眼講。」小七艱難咁將視線轉向我對眼，用清澈而又內疚既眼神望住我，再道多次歉。
其實我自己都有疏忽，我冇阻止小七離開，我自己都估唔到會有d咁既事發生。我唔係想怪小七，但岩岩見到小七軟弱既樣就突然無名火起。我想佢知道，佢呢個唔望人既陋習係呢個咁既既環境，會為自己帶黎好大危險，睇黎我要好好教育一下佢。
「算啦！呀風呢？佢冇事麻？」
「佢都冇事！都係d皮外傷，抖抖就冇事啦！」
「冇事就得啦！你返去啦！我想一個人抖抖」
「嗯！」
小七走左之後，我又諗返起呀風個笑容，究竟係咪我自己睇錯。一定係我睇錯定啦！佢仲因為救我而受傷，而且仲叫我走先。說服左自己之後，我又昏昏沉沉咁瞓左一日。
到左第二日，新人有射擊訓練，我去左睇。見到呀風如常有黎訓練，睇黎佢真係冇咩事。經過多月黎既訓練，咁多個新人既槍法都好純熟。我見到小七都係到練緊，打出好多個十環，心諗佢望人可以開槍咁集中就好啦！此時，我見到有個本地新人行左去小七到叫小七讓位比佢練，我只見佢低頭，臉有難色，但放低左枝槍，打算讓位。我見到咁，就慶恰恰咁行過去，拎起小七放係台面既槍，用槍抵住小七既額頭，扣左一下板扣，小七驚恐咁碌大隻眼望住我，而旁邊既本地新人都嚇左一跳。
我對驚恐既小七報以微笑，講：「小七，你幾時先可以好似而家咁望人，你細佬講得岩，你只有係極端既情況之下先可以克服到你個病。」
呢個時候，個本地新人已經走左。我放低枝槍，靠近小七耳邊講：「只係係開槍既時候望住人係唔夠架，距離你有能力報仇仲差好遠。」
小七聽到呆左咁望住我，我繼續笑住咁叫佢：「繼續練啦！仲未夠。」
之後我就走左，亦希望小七明白我用心良苦。
之後有個成員拎左份文件比我睇，我睇完之後即刻衝左去搵呀Q.
呀Q見我咁激動咁衝去搵佢，佢笑住咁同我講：「睇黎你知道左啦？」
「點解換面手術名單上會有你個名架？你去申請？」我激動咁問佢。
「係呀！」佢愉悅咁答我。
「而家去取消申請，唔好去做。」
「唔得！」
「點解？」
「我想知道你發生咩事。」
我聽完佢咁講，我更加震怒，我唔想因為自己影響佢去做一個咁重要既決定。我拉住佢講：「唔得，你一定要去取消。」
「點解？」
「你一定會後悔架！唔好去做。」我凝重咁講。
「但你話你冇後悔過做咁既決定，點解你又唔比我去做？」我比佢問到口啞啞。
但我始終覺得一定唔可以比佢做，我暴怒咁一拳打埋牆，心痛咁講：「唔得，一定唔得！你之後一定會恨我，恨我今日點解冇盡力阻止你。」
黑柴的話：
由第一季開始追既朋友，可能會覺得第二季既內容好散亂。細佬係第一季既目的，一直都係救家姐，呀哥，同埋報仇。
而第二季家姐既故仔就較散亂。於是我整理下內容，而家故事既發展有3方面：
1.尋找殺左兩個資深成員既兇手，兇手究竟係咪對Nir笑既呀風？
2.Nir想幫小七克服社交障礙
3.Nir 想阻止呀Q 做手術
以上3件事看似毫無關係，但⋯大家可以細味下。
仲有既係，雖然呢個係第二季，但內容其實同第一季有關聯既，後面會劇情發展會陸續交代，敬請期待。
最後，多謝有一直追呢個故仔既人，希望唔會令你地失望。
#有興趣可讚黑柴Facebook
同步更新
https://www.facebook.com/%E9%BB%91%E6%9F%B4-879053098899020/