我發現左我呀哥成日對住部電話講一種我聽唔明既語言: 19.你之後一定會恨我，恨我今日冇盡力阻止你
「你之後一定會恨我，恨我今日冇盡力阻止你。」
最後我都勸唔掂呀Q，而我又冇阻止佢做手術既權力，就只能親眼送佢入手術室，而我心入面只祈求佢能夠安全度過。
手術順利完成，我鬆左一口氣。但，呢個只係開始，復完既過程先係最痛苦既。自從呀Q入左療養室之後，我就冇再巡過療養室，因為我真係唔敢，唔敢面對佢。我唔知佢而家既心情係點，係憤恨，絕望定悲痛？我都好驚去知道，好怕見到佢係到受苦，好怕見到佢比死更難受。我希望我地重逢之日，佢已經浴火重生，咁樣可以免卻我既傷痛。避免去巡邏療養室既我，變左經常去練槍區到練槍，當做宣洩一下情緒。有時仲會同呀風，小七摙下槍咁。
今日又係練槍區見到小七。
「Nir!你又黎啦！」小七微笑咁講。
我無視佢，行過左佢，幫槍上子彈。到佢望住我，再同我講野既時候，我先會回應佢。算係一種對佢既治療，或者訓練？佢自己都明白我係想幫佢。
「Nir！你睇下我練成點？」佢望住我同我講。
我見到佢望住我，笑左笑，講：「好！」之後我就企左係佢後面幾步睇。點知睇睇下，我又諗起呀Q，就陷入沉思之中。小七另轉頭望我，諗住叫我比d意見，但就只見到我失神，就將我叫返醒。
「Nir! 諗緊咩？」
我驚醒，勉強咁笑左笑，講：「冇野！你繼續練啦！」
其實小七都知道我最近煩緊d咩！講：「Nir！呀Q唔會有事架！我地要支持佢既選擇。」佢眼望住我講左呢番安慰既說話，對於佢既關心同進步，我都好欣慰，微笑咁點點頭。
睇完小七練槍，我去左文件室處理組織既行政野，而呀風就黎左搵我。
「Nir！」
「咩事？」
「我覺得你應該去睇下呀Q！佢既情況好唔穩定，情緒好激動。」
我聽完之後停左係到猶豫。呀風再講：「咁樣對佢既康復都有好大既影響！」
「你同我一齊去！」
呀風陪我去呀Q間房既門口，我地都冇入到去，只係企係門口，打開左個個手掌大既蓋望入去。呀Q一見到我，就好激動咁衝到門口，拍打門口，似乎好想走出黎。
我見到佢咁，我真係好難受，我眼濕濕咁同呀Q講：「呀Q，唔好咁！我知你好難受！但唔好做d傷害自己既事。」
呀Q停左落黎，用怨恨既眼神望住企係我後面既呀風。由此我就知就呀Q已經被痛折磨到失曬理智，怨恨所有人，所有人。我心痛咁摸住到門，講：「Q！我等你出黎！撐住！」
佢聽到之後，轉用悲傷既眼神望住我，但我見到佢依然好激動，眼白佈滿血絲，直望住我。我地隔住道門，距離只有10厘米。我見到佢流左一滴血淚，係眼周圍既紗布開左一朵血花。我實在頂唔順，另轉面，背靠道門，同呀Q講：「我知道你而家一定好怨恨我，但點都好，你要好好保重，你出到黎，想點樣打我鬧我，我都認。只求你唔好再咁樣，你塊面會頂唔住架！⋯⋯Q～我地出面再見！」講完之後我就頭也不回咁走左，我聽到因爲我既離開，呀Q更加激動咁撞到門，但我都狠心冇理佢，一面走我面流眼淚，一面嬲自己冇更盡力咁阻止呀Q去做手術。我好快咁行係呀風前面，避免佢見到我流眼淚。我好快咁抺乾眼淚，同呀風講：「搵醫生黎睇下呀Q既情況。」
「嗯！」
過左3日，有人通知我，又有命案，又係係療養室，又係冇左個頭。小七帶我去案法個間房，一路行，小七突然停左係呀Q間房門口，對我講左句：「Nir！sorry！」
我推開左左小七，衝左入房，見到呀Q，唔係，係一個身型同呀Q差唔多既人，一定係咁。我打算扯開滲滿血既紗布黎睇，Lock(另一個視察現場既資深成員）捉住左我隻手，講：「Nir！唔好！」
冇錯，我初初處理呢種情況既時候，其他人教我唔好拆開紗布，因為情況有我地想像唔到咁恐怖。但我都扯開左呀Q面上既紗布，我至少要知道呢個係呀Q，至少要見佢最後一面。扯開紗布之後，佢唔止成塊面都係血，面皮破裂而且移位，個鼻褪到去眼既位置，個口就褪到去個鼻到，成塊面摺境一舊，下巴位置既血肉暴露係空氣之中，令呢塊面皮唔可以再被形容為一塊面。原來呢個就係之前d人教我唔好扯開紗布睇既原因。
「唔係呀！唔係呀！呢個唔係呀Q呢架！呀Q唔係咁既樣架！」我攬住呀Q條屍一面喊，一面講。
小七曾經講過，人死後，靈魂會留係原地一陣，我繼續講：「呀Q~嗚～呀Q，對唔住，我唔應該比你做手術架！你會唔會恨我？你一定恨我啦！你一定直到死個一刻都係到恨我！呀⋯⋯唔好呀！」
我餘光見到另一具冇左個頭既屍體，係kaki。我知Kaki 同呀Q既私交幾好，所以Kaki 會一個人黎睇呀Q並唔出奇。但呢連續既命案，兇手究竟係為左d咩要拎當走佢地個頭，點解？呀Q已經死左，我而家唯一可以為佢做既就係同佢報仇。
已經死左3個人，Simon，Vina，Kaki ，諗到佢地3個，我既心臟受左一下重擊咁，因為佢地3個都係之前香港潛伏失敗而撤退既成員。Vina 曾經係差佬個女，Kaki 曾經係醫生個妹，Simon曾經係李卓文。其中兩個既屋企人就係我地離開香港個時，同細佬劫左我地架車。細佬我就親眼見到佢條屍，咁可能就係個醫生同差佬。係我造成既罪孽，累到呀Q死左，令我更加心痛，更加內疚。無論佢係邊個，我都唔會比佢好過。
------------------
係香港
呀穎（醫生）收到一個訊息。
「穎，
我有一份禮物比你，快遞務必今晚8時留家親自取，隱蔽處打開。
言」
呀穎見到到呢個訊息，即刻好激動咁打返電話去發呢個訊息既號碼。
「電話暫時未能接通⋯⋯」
今晚8點，穎真係收到快遞，係一個好大既紙皮箱。一打開，係雪條黎既，呀穎拎起一枝，佢見到隻眼係下面，係佢呀妹隻眼，係佢呀妹塊面。
待續～
黑柴的話：
呼～終於將第一季同第二季既內容連返埋一齊。
細佬（呀言），出現左主角的光環，要開始細佬的逆襲？
唔知大家中意邊個多d? 支持邊個多d呢？
有興趣可讚黑柴Facebook
同步更新
https://www.facebook.com/%E9%BB%91%E6%9F%B4-879053098899020/