簡介



「仆街啦你⋯⋯」一句車埋嚟都唔係少野㗎,仲要一野拍「將軍」塊面落張檯度,即刻爆曬缸⋯⋯「佢」有著天使般既身材同面孔,仲要「佢」一笑同林嘉欣一樣會令成個世界靜止咗;但行為同知識仲變態過D宅男,我地甚至以為「佢」有精神病⋯⋯有次「光仔」俾人踢爆「一腳踏兩船」,當日上堂「佢」即刻搵成班同學捉住「光仔」成堂係度玩「千年殺」,搞到之後個小息「光仔」即刻跪係佢個ex面前認錯。但「佢」並唔係班入面D咩大家姐,而且佢所在嗰班更加係全校紀律最好既一班⋯⋯「佢」就係聖胡安書院既5C班班主任暨女神Miss Leslie Chan。

  聖胡安書院雖然係好出名既男女校,但近年大學入學率大跌(啱啱跌出50%),而且成班5C聯署要求校委會更換班主任,所以5C今年一開學就換咗個新班主任,而佢就係啱啱20歲大學畢業既Miss Chan。

  諗番當日9月1號,簡直係經典。嗰時因為上年個Old Seafood班主任Mr RJ Ko搞到成班勁頹廢,而且成績又差,開學嗰日根本就冇人想番。但當Miss Chan一入班房,成個氣氛唔同曬。嗰日Miss Chan平日一樣咁著恤衫短裙配黑絲襪高踭鞋、成個AOA Miniskirt既造型咁走入班房;對於對咗個阿叔成年既5C班嚟講,無論男女同學見到Miss Chan都打咗個凸,甚至「將軍」嗰班宅男見到即刻流曬鼻血 (真人真事!!!!!!)。

  正當大家以為要起身打招呼時,Miss Chan蹺著腳咁坐係度碌手機。「做乜尻?其實大家慳番呢D咁無謂既打招呼,心照啦屌。」第一句就彈句咁既粗口即刻嚇到成班都O曬咀⋯⋯「班長係邊位?自己自動彈出嚟,攞埋全班手提開班whatsapp group之後就add埋我。」講到呢度,Miss Chan仲係係度玩緊whatsapp,而成班仍然呆咗係度。Miss Chan見到咁既情況,即刻開「吐糟mode」:「成班個個做乜成個撚樣咁呀?Come On James,唔好同我講你地真係咁乖熄曬機呀⋯⋯」成班即刻點頭,而今次就到Miss Chan O曬咀。「What the Fuck?? 妖,全班即刻開機⋯⋯」班長即刻舉手企起身:「Miss,其實我地班早年已經有whatsapp group⋯⋯」「妖,早響呀⋯⋯」Miss Chan行到去班長隔離,同佢交換電話號碼;而同一時間大家聽到Miss Chan既「order」都開始開手機。Miss Chan入咗group之後,即刻打咗一大段message出嚟,內容大概係咁:
「你班粉腸咁憨唔怪之得D成績咁差喇屌⋯⋯但唔緊要,做得你班主任就遇咗要『屌那媽,頂硬上』,我點都會盡我能力教好你地班包皮過長既撚樣。我以前都做過學生,都知你班友有D咩想做同唔想做,所以係我堂上做咩都得,只要唔影響上堂進度同隔離班就可以— 即係話你可以上堂打電話、打機、打麻雀、打boxing、打茄輪,甚至打埋飛機我都唔會阻你 (呢樣最好唔好俾我見到,我唔想見到你地D光纖)。」突然Miss Chan企起身講野:「正所謂『What happens in Green Miles, stays in Green Miles.』,呢班裏面做過既野出到去冇人可以知,只有我地知。只要大家願意keep secret,你地都可以擁有呢D權利,否則我就做下一個RJ Ko⋯⋯」睇到呢度,全班即刻大嗌:「唔好呀!」

  RJ Ko之所以咁恐佈,全因上佢堂真係照書讀,又成日亂罰人,以為自己係校長個細路就大晒⋯⋯總之係名乎其實既「老屎忽」。突然,坐係後面、平時好少出聲既Fredrick竟然突然企起身,目無表情咁問:「咁你到底係邊個?你都未講⋯⋯」



  Miss Chan撥一撥佢嗰束秀髮,坐係張檯度,話:「我咪就係你今年既班主任囉,Miss Leslie Chan。」

-------------------------

  今日又如常咁返學,Fredrick帶住空蕩蕩既索繩袋,好瀟洒咁行過走廊。佢男神般既外表令到身邊經過既女同學都不禁望佢一眼,但佢空虛既眼神卻令到身邊既同學,甚至老師都唔敢走近。

  聽聞Fredrick有一張來歷不明既「免死金牌」,大到係教育局落秘密order要求老師唔准騷擾佢,甚至5C班作出人事變動一事都係因佢而起:事源RJ Ko有日屎忽痕,係度狂鬧Fredrick唔聽書,甚至鬧到隔離班都聽到。然後,Fredrick係佢耳邊出咗一句聲,RJ Ko即刻嚇到跌咗落地,然後跑出班房。冇幾耐,RJ Ko即刻被停職兩個禮拜。自此冇人老師夠膽要求佢做野,淨係得將軍嗰班宅男平時會同佢傾計同有D情深似海既師妺同佢講野之外,根本冇人夠膽行埋去。

  入到班房,Fredrick照舊放低個書包,坐係自己位度聽歌。同一時間,Miss Chan同成班韓粉絲打係度吹水,一講到「本命」成班就係度嗌到癲曬。Miss Chan見到Fredrick以不屑既眼神望著佢,嬲嬲地咁行埋去:「你聽D咩咁撚巴閉呀,睇過⋯⋯」佢一手攞起佢部手機,一開mon就見到佢係度播緊防彈少年團BTS首Run。再㩒多幾首,都係BTS D歌。Miss Chan即刻勁興奮:「原來你都聽BTS㗎!喂,BTS本命係邊個,講!!!!」Fredrick答都冇答,諗住一手搶番部手機,點知Miss Chan一手隔開。「答咗我問題先,唔係既話你唔好怪我唔客氣呀⋯⋯」Fredrick即刻面都黑埋,大家即刻係feel到勁大鑊。阿芝即刻走出嚟,諗住調解佢地。點知Miss Chan勁硬頸,死都唔肯放手。「講!!!!」見到Miss Chan咁硬頸,Fredrick終於開口:「Jungkookie⋯⋯」「嗱,咁就乖喇⋯⋯」Miss Chan開始放低部手機,而Fredrick即刻順手攞走部手機。「妖!」Fredrick一講完,即刻走出班房。Miss Chan即刻抽水大嗌:「嗱嗱嗱⋯⋯條友面紅呀!條友本身根本就係ARMY,佢叫怔國係叫『jungkookie』,得ARMY先係咁叫㗎!」Miss Chan走到班房門口,大嗌:「做韓粉有罪咩?我夠係EXO-L咯!」



  正當Miss Chan諗住一個「華麗轉身」,諗住話俾班女同學聽自己又KO咗一個「麻煩學生」既時候,阿芝嗰班女仔即刻走埋去。「Miss Chan⋯⋯Miss Chan⋯⋯」成班女仔即刻個樣變到好驚,Miss Chan就笑著問:「咩事?你班友做咩成個食咗屎咁款呀?玩吓啫⋯⋯」「嗰個唔玩得㗎,佢咪就係玩死RJ Ko嗰條友囉!」「Haha⋯⋯ Oh Shit⋯⋯」Miss Chan即刻冇曬霸氣,驚到掩著塊面話:「我份工無喇無喇⋯⋯」
其後,鐘聲響起,全班學生都返到自己座位開始上堂,包括Fredrick在內。呢堂正正係Miss Chan既英文堂,仲要係double lessons。Miss Chan嘗試鼓勵自己,叫自己繼續番平時自己教書既起勁,但一見到Fredrick冷漠既眼神,Miss Chan即刻驚到面都青埋。大家見到咁,都不禁一問:「Miss Chan,你冇嘢呀⋯⋯」Miss Chan舉起隻手,話:「幻覺嚟嘅啫,我有咩未驚過⋯⋯我冇事!」之後Miss Chan繼續教書,但大家都feel到,今日既Miss Chan好唔妥⋯⋯
到咗落堂,Miss Chan走去瞓緊覺既Fredrick張檯面前,敲醒佢然後對佢講:「Fredrick,你陣間放學落樓下活動室見我。」講完Miss Chan攞埋D書即刻急急腳走。

  入到教員室,Miss Chan即刻扒係張檯,郁都唔郁下。坐係隔離、又身為Miss Chan同校畢業既姊妹Miss Ho見到Miss Chan變到咁頹,即刻推張櫈埋去,問:「Leslie,係咪又俾你班學生蝦呀?」又將佢手上包蕃茄味薯片遞俾Miss Chan,諗住用Miss Chan成日偷嚟食嘅薯片安慰下佢。點知,Miss Chan一手推開,坐起身發曬脾氣咁講:「食食食⋯⋯成日掛食,依家人地就嚟要食豉椒炒魷喇!」Miss Ho嚇咗一跳,即刻放低包薯片,問:「你唔係咁啱係校長巡房嗰陣講粗口呀?叫咗你好多次呢個習慣要改㗎喇⋯⋯」「唔係呀!」Miss Chan即時糾正。「係我係班房入面得罪錯人啊⋯⋯」Miss Ho就覺得奇怪,心諗:「成班唔係得佢自己一個唔得罪得咋咩⋯⋯」Miss Chan繼續講:「唉,好玩唔玩,就咁啱今次玩大咗⋯⋯」於是Miss Ho就問:「邊個咁巴閉呀?」「Fredrick呀⋯⋯」Miss Chan即刻回答。Miss Ho諗咗一陣,就話:「Fredrick⋯⋯咪就係⋯⋯?」Miss Chan點頭,細聲話:「咪就係連出名老屎忽既RJ Ko都怕咗佢既嗰條友囉⋯⋯唉,今次仆街啦⋯⋯」Miss Ho即刻劃個十字聖號,話:「今次真係願主打救你喇!你除左道歉之外,我諗你就算連出賣色相都應該幫唔到你㗎喇,R.I.P.。」Miss Chan即刻祈禱,話:「主啊,求祢幫下我,至少畀我留住份工啊,最多我唔要男朋友喇⋯⋯」

  到放學既時侯,一落堂Fredrick就攞起佢個袋,行落活動室,但佢面上仍然一直毫無表情。走入活動室,已經見到Miss Chan企係度、蹺住手咁等佢。Miss Chan見到佢,即刻話:「Fredrick,我有D野想同你講⋯⋯」見到Fredrick面露殺氣,Miss Chan都難免噎嚥一下。見到Miss Chan似想講又唔想講,Fredrick開始有D唔耐煩,話:「如果冇野,我想走先⋯⋯」「等陣!」Miss Chan即刻喝止Fredrick,直接講出嚟:「我知我今日搶咗你部手機嚟睇,係我唔啱,係我貪玩。Fredrick哥,你大人有大量,唔該你唔好port我,俾我留番份工呀⋯⋯」

  突然,Fredrick走到Miss Chan面前,一手摸住Miss Chan臉頰,面露微笑咁話:「你果然過咗咁多年,都係冇變⋯⋯」之後直接一下嘴落Miss Chan紅潤既嘴唇上。Miss Chan都被Fredrick呢一下舉動嚇咗一跳,一時唔知應該點反應。同時間,佢腦海彈起一幕幕細個嗰陣既回憶,但佢唔太清楚係咩。回過神來,Miss Chan即刻將Fredrick推開,大叫:「做咩呀你?」Fredrick即刻解釋:「小欣,你唔記咗我嗱?我係小豬呀⋯⋯」「小豬⋯⋯?」Miss Chan完全唔明Fredrick講咩,但腦海開始泛起對「小豬」既回憶⋯⋯

相關文章

已有 0 人追稿