如是者,又過左一個月。放學返到屋企又好掛住林敏兒。

突然醒起我有佢屋企電話。

以而家既熟絡程度,打個電話去搵佢都唔會話好尷尬姐?

第一次打去,到底用咩藉口好呢?。。。

果個年代唔係好多同學有手提電話,我地通常都用屋企電話,有時會玩下駁線幾個人一齊傾計,我主要都係同男仔傾下電視呀、問下功課多。女仔真係無。



我鬼鬼祟祟咁禁左林敏兒既屋企電話(廢時屋企人發現我打俾女仔),2xxx xxxx。

我深呼吸一口氣,再禁撥出。

有D緊張,唔知佢係唔係屋企呢?唔知林敏兒聽到我把聲會唔會認得我?佢會好開心定好驚訝呢?

嘟嘟--

嘟嘟--



嘟嘟--

嘟嘟--

「喂,搵邊位?」同溫柔可愛既林敏兒完全拉唔上關係,一把粗獷既女人聲出現,破壞晒我美好既幻想。

「你好呀Auntie,我打黎係想搵林敏兒嫁。」我Chok晒聲扮有禮貌咁同Auntie講。

「哦。敏敏,你有個同學打俾你呀。」Auntie大叫。



「邊個黎嫁?」林敏兒用天真無邪既聲音問。

「唔知呀,女仔黎。」頂你個肺呀,我係男仔黎嫁!不過未變聲姐!家陣歧視雞仔聲?

「喂?」

「喂!林敏兒,我係林書生呀。」

「林書生?你點解有我電話既?」佢好驚訝。

「我叻囉,你唔會知點解嫁啦。」

「哦!肯定係你偷睇左我本手冊啦!乜你咁嫁!」計數果陣又唔見你咁醒,不過我係偷睇老師本點名簿。

「講左正經野先,你而家有冇上緊網?」我開始我既作戰計劃。



「有呀。做咩?」

「我屋企部電腦壞左,上唔到網。你幫我login做每日一篇呀。」

「點我做野?要俾冰紅茶做人工嫁喎。」你呢個貪心既女仔!每日俾一盒冰紅茶你都仲唔滿足,仲同我討價還價!

「飲咁多冰紅茶,因住糖尿病。」我還口。

「聽日俾兩盒冰紅茶我就幫你做啦。」林敏兒話。

「好,殺你!」兩盒冰紅茶都係8蚊姐,仲有2蚊剩。我聽日買少串魚蛋都得既。

點知。。呢個惡魔林敏兒仲得寸進尺:「我而家讀篇文出黎,你講個答案我幫你禁啦。」



「下,乜你仲未做咩?」

「我做左啦。」

「咁你都知個答案。唔洗讀咁麻煩啦,幫我揀咪得。」

「唔可以咁嫁,我只係應承幫你登入submit個答案,我無應承講過幫你做埋。」林敏兒用一副耶撚語氣對我說教:「咁樣都係為左你成績著想。如果我幫你做左,你就唔識嫁啦。」

林敏兒慢慢咁將成段文朗讀一次:「王太太養了一隻貓咪,牠雪白的毛髮上有點點黑斑,遠看上去,就像一團雪白的棉花沾上幾滴墨。這一段文字主要表達的信息是--

A 王太太用墨汁把白貓染上了黑斑。

B 王太太養的貓咪把棉花弄黑了。

C 王太太養的白貓被墨汁沾污了。



D 王太太養的貓咪毛髮是黑白兩種顏色。」

「Er.......」D問題真係好低能,簡直侮辱我小六學生既智商:「D囉。」



好快就做完成個練習。

林敏兒罕有地稱讚我:「好叻呀,你答岩晒。」

「每日一篇邊有人會答錯嫁。」

「唔係嫁,我有時真係會答錯。」



「我都話你低能嫁啦。第日我做完教你,咁咪唔會錯囉。」

「好呀,咁你做完打俾我同我講答案啦。或者一齊做每日一篇都得。」

「就咁話啦,咁我約你每日6點鐘一齊做每日一篇,等我電話。」

「OK。」林敏兒好爽快咁答應左我。

「唔講住啦。我地聽日返學見啦!」說罷我就收線。



「Yeah!!!!!我得左啦!!!!!」我係屋企好興奮咁大叫。

「仔,你係度做緊咩呀?」呀媽望到我興奮既樣子問我。「岩岩同女仔講電話呀?」

「無講電話呀,我問人每日一篇點做咋嘛。」

「呀係啦,媽咪呀,可唔可以加我零用錢呀?」我試圖同呀媽Deal下可唔可以加多D錢供養我既林敏兒。

「點解呀?你唔夠錢洗咩?」老媽子問我。

「係呀。每日買一串魚串同一盒野飲就無晒錢啦。」要養林敏兒呢個大食妹既話,自己真係無錢洗。

「都得,加多5蚊俾你啦。大個仔要學識管理自己D錢,唔可以咁大洗,知唔知呀?」

「知道啦。」其實屋企咁靚,應該都有唔少錢。呀媽對自己個仔真係孤寒。算啦,多5蚊都好過冇。

「仲有呀,唔好俾同學知你有幾多錢。廢時陣間D人黎拿你著數呀。」無啦啦講呢D。

你地D大人成日都以己量人。

「哦。」