一個書生既Player故事: 八

身體壯健既我當然好快就好返。小病係難我唔倒既。

今日班主任堂既時候，Miss Chan派左一本升中學校指南俾我地。

「先前都講過小六係對你地重要既一年，成績係好重要。入唔入到Band 1既中學就係睇你地今年有幾努力啦。已經十二月中，四月中就要提交選校表，你地要同家長慢慢研究下派位既擺法啦。當然到左家長日我會照你地成績俾相關既意見你地既。以你地而家既成績，再努力少少，全班入Band 1都唔係難事。」

呢個消息對於我簡直係晴天霹靂。

好快就要同共事六年既同級同學分道揚鑣，從前覺得係好遙遠既事，估唔到咁快就要面前人生第一次既分離，對於呢個改變心底好無實感，望住個日曆就係倒數緊我同林敏兒仲可以朝夕相對既時光。。。



唔計一見鍾情既感覺，林敏兒係實實在在咁滲入左我生活入面。

我既生活好似由返學、放學都充滿住呢個人，已經習慣左佢既存在。

我想像唔到有一日離開左佢，個世界會變成會點。佢對我無庸置疑係最重要的。

比爸爸媽媽更重要。

對於十二歲既我，林敏兒就係我既世界。



我想日日返學都見到佢，知道佢身邊發生既大小事。

我唔想同佢分開。

所以，我要同林敏兒升上同一間中學。

我一定會做到的。





今日係由我同林敏兒做值日生。

我亦都借機同佢傾下升中既問題。

「林敏兒，你想入邊間中學呀？」

「我。。想入。。A中學。。不過媽媽想我入B中學。。你呢？」A中學係區內最Top果間男女校Band 1英中。B中學都係一間名校英中，當係女拔果個級數，係一間女校。

「我未諗。。。」其實我想跟你入同一間學校咋，不過女校真係有D難搞。「我媽媽就想我入C中學。」係一間名校英中，男校，當係皇仁果種。

「咁我地咪會升唔同既學校囉？」林敏兒問。

「不如我地同屋企講一齊填A中學做第一志願啦。」我同林敏兒提出。

「嗯。。。」林敏兒深思熟慮後回答我：「我試下說服下佢。」



呢個咁現實既問題我都無把握可以說服到自己父母，因為佢地實會選擇對我最好既方案。

我一個小學生，對自己人生重大決定無乜選擇權可言。

「我都試下。」

不過為左你，我願意去嘗試。



佢用水汪汪既眼仔有D感動咁望住我。

有種羅密歐與朱麗葉要脫離屋企私奔既感覺。



呢個氣氛促使我大膽左，我好想表達我有幾想同佢一齊。

我雙手用手捉住佢雙手（自以為）深情咁對望：「林敏兒，升中之後，你做我女朋友好唔好？跟住我地就結婚生仔，第時買間屋一齊住。」

佢俾我既舉動嚇親，呆左幾秒，「你。。。我。。。唔要呀。。。」

一野Fing開我隻手。就係咁，我既表白就慘被請食檸檬。



但勢估唔到，佢Fing開完我隻手就起勢係度喊。

我完全理解唔到佢喊既原因。

係因為俾我捉住對手覺得太核突？



「Sorry呀我無心嫁。。。我岩岩玩下講下笑嫁咋。。你唔好喊啦。。。」

我拎張紙巾俾佢抹眼淚。

「乜你講假嫁？我仲以為係真。。」林敏兒喊到豬頭咁，差D聽唔到佢Up乜。

「你點解要喊呀？」我輕輕咁摸佢個頭。

「算啦。。無野啦。。。你唔明嫁啦。。」

我真係唔明。不過你喊既樣幾得意。