交咗選校表基本上大局已定,除咗專心溫習都無乜野可以做。

倒數兩個月就完咗呢個學期,級上既同學開始交換紀念冊,但我自問無乜實感。

臨近畢業好多人既屋企都會買返部手提電話俾仔女(當時電話係千零二千蚊,LG 、Nokia、Sony Ericsson年代,未有手提電話都唔係咩出奇事)。

我同熟既人基本上都直接打去屋企搵對方、或者落樓下見面,ICQ、手提電話呢啲高科技野我個人就唔係點用,因為無咁既需要。

「喂。拿本手冊黎。」我走過去同林敏兒講。



「做咩呀?」林敏兒問。

我逕自拿咗佢本手冊,係今日家課欄備注入面寫咗8個數字,同埋E-mail。

「咦?」

「呢個係我新電話號碼,同埋MSN。」我懶係酷咁講。

「幾時買嫁?」林敏兒難掩喜悅既心情。



「琴日同屋企去買嫁。」我強調:「你係第一個知嫁。」

「好開心啊。你終於肯玩手提電話~但你咩台嫁?有冇加8蚊網內任send呀?」

「咁緊係跟你啦。3台呀。」呢個人人都係3台既世界,唔上3台真係傻的嗎單機。

我用中指勁大力咁彈林敏兒個額頭,「大姐,我無用開姐,我都知而家send msg要加8蚊。」

「呀。。好痛呀。。」林敏兒痛到想喊咁既樣。



我望住佢,好滿足咁對住佢微笑。



我去到臨畢業先開返個MSN同埋抄返同學既手提電話牌。亦都見證另一個時代既開始。



「林書生,出黎呀。」有一男一女黎搵我。男既係高高瘦瘦串柒柒型,唔特別講啦。女既就膚色白晢,身高大約158,瘦底,眼大大鄰家女孩斯文樣,留左Pet MK齊陰,我會形容佢為好Fresh。呢個女仔個輪廓係美人胚子,執下第時條兵隊一定排到上月球。

呢排lunch總有好多格離班陌生既面孔派紀念冊俾我。事實係我有少少臉盲,講過一兩句野我都唔會特別記得。呢個習慣唔好,要改下。

「紀念冊。。俾你嫁。。」個女仔遞左4張紀念冊俾我。

「咦?點解係四張既?」我問。



「有兩張可唔可以幫我俾埋林敏兒?」個男仔問。

原來係林敏兒既fans。仲以為係專程黎搵我添。

「你係張紙角落頭寫返你個名啦。咁多張好難認,都唔知邊張打邊個。」

個女仔係張紙既右上角寫咗個名:丁丁。原來佢全名叫丁佩嵐。

之後我當然無俾返佢地,有接近3/4既紀念冊我都無寫。唔寫既原因一方面係懶啦;另一方面,六年來同學都係玩伴性質居多,真正稱得上友情,會傾得深入少少既人係少之有少,無乜令我想寫既人。朋友呢樣野,我由細到大都分得好清。

我同林敏兒都交換咗紀念冊。

留言欄一大片空位應該寫啲咩,對我黎講有點煩惱,呢個係一個值得思考既問題,我知道寫完會係日後重要既記憶,唔可以柒,寫得太多,一定會俾人拎返黎笑。暫且諗下先,遲啲再俾返佢。