一個書生既Player故事: 四十四

我：【敏敏，你捨得覆我未呀？】

等咗半個鐘，沒有回應。

我：【你測完兩日應該得閒理我啦？】

再等多一個鐘，都係沒有回應。

乜覆男朋友一個sms真係咁難咩？



名義上我好似仲係佢男朋友。

我應該要重新定義下男朋友呢個字，我覺得自己仲慘撚過隻狗。

我：【你去咗邊呀？再唔覆我去你屋企拍門搵你嫁啦。】

係我半威脅佢既狀態下，佢終於肯理我呢隻狗。

敏：【我好忙。唔好黎搵我啦。】
我：【你幾點返到屋企？】


敏：【七點啦】
我：【我七點係你屋企樓下等你】
敏：【你鐘意啦】

六點半，我就已經拎住個Agnes b紙袋係林敏兒樓下等，驚死佢會走咗去咁既樣。

我唔鐘意去佢屋企樓下，上上次搞到佢喊，上次就撞到何諾軒送佢返屋企，去親都無好野。


等到七點三，林敏兒終於出現。佢帶住厭惡既眼神望住我。



我連忙衝上前去同佢講野：「我果日語氣重咗啲，好對唔住。送俾你既。」我將個袋遞俾林敏兒。

佢望咗個Agnes b紙袋一眼，果一眼我感覺到佢既喜悅，我似乎無買錯禮物。

「嗯。多謝。」說罷就想轉身離開。

我拉住佢隻手：「其實，我地仲係咪男女朋友？」

「話俾我知你諗緊咩。如果你真係想同何諾軒一齊，你同我講啦，唔好等我一個好似個傻仔咁估估下。我好辛苦。」

林敏兒目無表情咁望住我，輕輕答咗一句：「係男女朋友呀。」一副事不關己既語氣。


呢個唔係我心入面渴望聽到既野咩？



但我聽完一啲安心既感覺都無。。

我到底想點。。

我攬住佢，就黎想喊咁既款：「你唔好走啦。我好驚。」

「哈。傻既，我唔會呀。」但佢都係伸手攬返我。


我都知佢咩意思。

但我唔想相信，唔想面對現實。。

我知道我同林敏兒真正分開既日子都唔遠了。



我能夠做既就只有倒數我地既終結。

同埋乞求你對我既憐憫，就算望我一眼都好，至少，我知道你眼中都會有我既存在。


林敏兒輕輕推開我：「我走啦。」

我用眼神希望佢可以為我留多幾秒。

But she didn't.

呢一刻，我知道佢心入面已經再無我既存在。

唔想接受，唔想同佢告別。



心痛。

好似呼吸唔到咁。。

原來鐘意一個人係咁痛。。

原來失戀會痛嫁。。

『玩唔起，就唔好學人玩啦！』我心入面有把聲音同我講。


。。。

愛情呢個遊戲真係好好玩。



同打機果種刺激緊張唔同，個程度係多一百倍。

會痛，會喊。

打機你唔會喊嫁嘛。

原來我可以咁無尊嚴，咁歇斯底里，發掘左從未見過既自己咁。

第一次打既呢舖機，我被技術性擊倒了。