「嘩你個眼袋就黎跌到落個鼻度。琴晚肯定溫到好夜先訓啦!」我望住羅嘉樂講。

「痴線。我都無溫,十一點就上床訓教。」唔知點解學校啲人總係唔肯認自己溫書。大概係驚考衰咗會柒。

「信你一成,雙目失明!」陳詩詩話。岩呀,搵鬼信咩!

「你就算死溫爛溫都唔會夠朕鬥嫁啦。晒氣啦。」我講笑。

「收皮啦林書生。」



考試日常對話。

能夠同一班好朋友企係操場等考試真係一件好值得感恩既事,我好珍惜呢一刻。


正當我放空諗野既時候,我望到一個熟悉既身影係我面前經過,佢就係溫梓柔。

我同佢眼神交流咗一下,我對住佢做口型:「加油!」

佢都用口型答返我:「你都係。」



我地兩個交換以一個曖昧又自信既笑容作結。

呢一秒既笑容充斥著力量,令到本來唔夠訓既我,好似打咗支強心針咁,當堂精神咗,好似魔法咁。

我知道班房入面既你為我打緊氣,我地都為同一個目標而努力,成件事變得好有動力。。。

我同佢考試唔係一齊坐。佢坐係我前面斜角既位置,偶爾,我會望到佢好困惑咁托頭,又或者搖頭。今次考試比測驗難得多,半桶水既我都唔係識好肯定。




放學,我會特登去問溫梓柔一句:「考成點呀?」

佢通常都會好簡單咁答我一句:「Ok啦。」「唔係好識。」佢對自己既表現都無乜信心。


我地各自放學,返到屋企專心溫習。

諗起佢,想同佢打氣,所以係呢幾日,係無傾開計既情況下,每晚一點我都會準時sms溫梓柔同佢講早抖。

我:【我訓啦。早抖 聽日考試加油】

而佢都會回我一句

溫梓柔:【嗯 我都係 一齊加油】



我同溫梓柔實質既交流其實少到手指都數得出。

但唔知點解咁已經覺得好滿足。

同佢一齊,總有一陣淡淡的幸福感。