一個書生既Player故事: 六十二

繼抄功課大會之後，暑假完結前最後一個活動，就係我、肥傑、羅嘉樂、陳詩詩、王家欣一行五個人去海洋公園玩。

溫梓柔比較靜，一向不屬於我地既團體入面，所以佢唔會出現係度。

經歷完淫亂暑假終於有D陽光少少既活動做下。哈哈，年青純潔既我應該要做多d正氣活動。

一大早，我地坐車入OP既時候，我收到溫梓柔既SMS。

係喎，今日係出編班既大日子！



溫梓柔：【出左編班啦。。我入左2A班，你入左2C班。。】

我即刻好緊張打電話俾佢，問：「梓柔，你可唔可以睇埋羅嘉樂佢地升咩班？」

「你地全部都係2C班。」溫梓柔不悅。

「喂屌，我地全部升左2C喎！」我無視溫梓柔既不快，好開心咁同羅嘉樂佢地大叫。

「正啦，我同肥傑仲要升左班！」1D既王家欣話。



「唔該你呀～再傾啦。拜拜。」我草草同電話入面既溫梓柔講完就收線。

『Yes！分得手！無手尾！』

同溫梓柔唔同班，我內心有一下狂喜。我真係好仆街，第一件事係諗可以甩難。岩晒啦，咁勤力既佢入返2A既圈子最合適不過，好過俾我呢啲衰人糟蹋。

「你同你個溫梓柔唔同班喎。」王家欣話。

「都話我地無野囉！同唔同班都係咁啦！」



「你話係就係啦。」羅嘉樂一副奸笑。


Btw，今日俾我發現咗啲好微妙既野。

就係肥傑特別照顧某個女仔。

其實羅嘉樂份人都好照顧女仔既，例如對住陳詩詩，排隊會讓佢先、玩game一定一齊坐、會用好溫柔既語氣同陳詩詩講野、主動撩佢、拍佢個頭等等。

「你睇下你食野個樣，幾論盡。」講完就遞左張紙巾俾陳詩詩抹嘴。你唔會覺得咁做好突兀，因為佢個人係咁。所以都唔一定話佢想追陳詩詩既。

但肥傑就唔同啦，佢真係特別照顧王家欣，似隻兵，對巴渣王家欣言聽計從，王家欣都毫不客氣，大咧咧坐底叫肥傑幫佢買野食，仲無諗住俾錢咁既款。

「好難飲呀D百事，走晒氣。」王家欣港女Mode話。



「我呢個有氣，同你換啦。」肥傑換左佢個七喜俾王家欣。

『原來肥傑想追果個係王家欣。』我心諗。

我對兩位女仔退避三尺，避嫌費時俾巴打們覺得我同佢地爭食啦。


奇怪既事係，王家欣好鐘意痴住我。

「唔洗啦，我飲書生果D咪得囉。」

「喂，唔好扮熟喎你。」我話。明明我都係飲百事。

我唔知王家欣係想避開肥傑，定鐘意我先會咁。



我唔敢想像落去事情會發展到一個點既地步。

媽呀，你唔好搞鳩我啦好嗎，我無辜嫁。

好彩肥傑都估到我同溫梓柔D野，唔會誤會我。


本身諗住做毒撚單丁完場，但玩Game果陣大家會輪流坐單丁位，咁我不致於咁慘。

單數去主題樂園真係好尷尬既數字。

我以後都唔會做D咁蠢既事。

更蠢既係我而家先留意到發生係我朋友圈內既事。。。。。





到夜晚完場返屋企，我地係地鐵站分道揚鑣。

王家欣同我行同一個方向，而肥傑佢地則行另一個方向，都好難再搵理由送王家欣。

我無打算送王家欣。

我同佢行到街口，準備同揮手同佢講Bye bye。

「乜你唔送我既？」王家欣問。我個心打左個突。

「下？我點解要送你？」

「我係女仔嘛。」



「你係一個男人好唔好？」我話：「再講，香港治安好好，十點鐘一個女仔係街係好安全既事。」

「林書生，你係咪好唔鐘意我？」佢問我。

「唔係呀。。你做咩無啦啦咁講？」？？？？問號問號問號？？

「你全日都好似避緊我咁。」

「無呀，係你諗多左。」我露出一個滴汗表情。你明知我避你，仲要問我？

「我知我唔夠林敏兒靚女，又唔夠溫梓柔溫柔，又成個男人咁。。。」

佢繼續：「但係我有顆真誠既心，我好鐘意你嫁。」

句野看似講笑，但我感覺唔係。

但我一D幸福既感覺都無，因為我好驚俾肥傑知道會嬲鳩我。

「我咩都無做過。。你鐘意我D乜柒呀？」我串串地，O撚曬嘴咁答佢。

「唔通你Feel唔到咩？」我Feel你老味呀。。。

「Feel乜鬼啊。。你都知我同溫梓柔有野嫁。。你咁仲同我講呢D係想點？」呢個時候，女朋友個朵就好有用，用黎驅桃花。

「我無想點，只係想你知姐。我唔想你避我。。」

都明知我同第二個人有路仲要表白，100%失敗，你講完我咪仲避多兩錢重囉，女人可唔可以用下腦去諗野？

「你唔好咁啦。我好難做。」我好無奈話。王家欣欲哭無淚咁既樣。

「我當你咩都無講過啦。走先，你小心啦，拜拜。」我講完就極速閃人，真係無風度到一個點。

媽呀，點解要搞鳩我呀。。。