溫梓柔:【聽日開學啦。以後無得同你同班了
我:【同唔同班都係咁啦ha】我開始Hea佢了。想俾D心理準備佢。

我無將王家欣既事講俾溫梓柔知。

我咁仆街唔安慰佢,仲勁開心咁同frd玩, 溫梓柔依然係隻眼開、隻眼閉,乜都接受晒,亦無表現出任何不滿。

點解我咁對你,你都可以唔講分手既?

同一個對你咁差既人一齊,為左果一點所謂既幸福而付出千辛萬苦,真係值得咩?




經歷左千辛萬苦終於黎到中二既開學日。。。

無咩特別,一班本身熟既朋友仲要同班晒,仲唔洗理溫梓柔,同學都係果堆,點會唔習慣。

日日仲玩得close左親密左,更加熟絡。

我同王家欣共存係呢個圈子入面,我Keep住輕輕咁迴避佢,例如正係會主動同其他人講野,唔同佢作太多既交流,務求唔俾機會佢對我抱有有一絲幻想。



肥傑眼中只有王家欣,都唔會發現到我故意疏遠王家欣。

羅嘉樂又成日痴住陳詩詩,唔通真係想追?

如果同一個圈子佢地拍晒拖我都幾慘。

屌,點解我好似個局外人咁毒既。


「開學又係預備班際既時候啦!你地邊個會參加呀?」新班主任話。



「林書生、張俊傑、羅嘉樂佢地啦!成日都打籃球!」王家欣話。

「同學A、同學B,你地都去啦?搵多個同學D做後備?」班主任話。

「實好嫁!」我求之不得啦。

班上會打籃球既選擇唔多,就係咁,我地參加左班際。

我最鐘意都係落堂練波,咁先係真正屬於我地男子組既麻甩時光~



家陣班女仲會留係學校既走廊,一路J我地打波,一路等我地走。



我地閒閒地都打到六七點。

五點,係空曠既操場,羅嘉樂向住陳詩詩揮手,大叫:「喂,你兩個等緊我地放學呀?」

「係呀。你地幾時走呀?」陳詩詩又對住羅嘉樂大叫。

羅嘉樂望一望我同肥傑,問:「幾時走呀?」

「而家囉?」肥傑緊係唔捨得王家欣等佢啦,不過王家欣其實係等緊我?

「我仲想打多陣。你地走先啦。」比起被閃,我寧願自己一個多一陣。

有女都幾煩,想打多陣波都唔得。

「好啦,咁我地走先啦。」佢地同埋同學A、B都走左。




我自己繼續打到七點,個天都變暗晒。

我係度偷練花式入籃Pose,心諗,如果我可以有Kobe一成咁都好呀。。。。

大佬,班際係正學校中心、Lunch時段,全校都會睇到喎,點可以柒嫁。(雖然低Form場係無乜人睇)



操場被係Meeting room離開既學生們打破寧靜。

我坐係地下飲水休息。

突然聲,有把女聲係我背後出現:「喂。做乜咁夜自己係度打波?」



「係呀。」我一轉頭,原來係呀婷:「你又咁夜呀?」

「岩岩上Prefect training呀。」係喎。飯長係Prefect。突然醒起,我中二,呢位姐姐已經中四了。。

「好口渴。請我飲啖水。」阿婷話。

我遞左樽水俾佢,佢好有型咁離口飲我枝水。睇佢依個動作,唔講仲以為佢係籃球隊。

阿婷份人真係好爽朗但又不失女人味,好charm,偷偷丁咗佢。

「我正話見到你係度偷練花式,跨下傳波轉身小跳步Jump shot穿針,動作幾靚呀。」

「識貨喎。」其實都未練成,做得勁差。俾佢讚一讚即刻飄飄然,即刻有動力練好。



「練多排變James啦你。」

「Sor,我鐘意Kobe多D。」

「Kobe邊忽正呀?」

「收啦,總之正過你個James。」其實鐘意一個球星,同鐘意一個人一樣,都無理由。你問我林敏兒有咩好正,其實大把女仔正過佢啦,點解都仲要鐘意佢一個呢?

「一齊返去?」阿婷問我。

「好呀。」於是我就同佢一齊搭巴士。

「下星期一個Lunch係初賽,記得黎睇呀。」

「笑。。你果班打到入決賽我先睇啦。我落車先啦,拜拜。」呢句係阿婷最後一句同我講既說話。

溫梓柔(3:05pm):【書生,你今日諗住幾點走呀?一齊放學?】
溫梓柔(6:00pm):【我..走先啦..】

唉。

折墮呀你林書生!