好快就到咗水會第一次Gathering既日子。
 
Cammi係上大學果條電梯接我,哎呀可惜唔係殘廁Gathering啦。
 
Cammi留住Mocha色既長直髮,著咗件鬆身黃色Tee恤,露咗好大條黑色Bra帶出黎,加埋條短到就黎見唔到Pat pat既牛仔褲,是為「下衣失蹤Fashion」。雖然唔係好暴露,但係佢既好身材已經遮掩唔到佢既性感,小麥膚色加埋自信既笑容,佢係一個不折不扣既女人。樣子中上,有D Jumbo Tsang既Feel,都話姐姐係正。
 
「組媽,你諗住帶我去邊度買黃色Tee?」
 
「我琴日特登行咗轉u記同埋H&M,有兩款黃色衫我覺得都OK~帶你去睇下啦。」
 


 「組媽你真係好!」而家D組媽咁好服務!

「點解全部都要人著黃色衫?」我問。

「因為我地係奶黃包囉!」

「下?咩奶黃包?」

「我地玩O Camp會分唔同色既House。我地Yellow House名叫奶黃包~」



「點解要叫奶黃包。。」我無奈咗。點解八大學府玩O Camp要改個咁柒既名。

「我示範一次你睇呀。」佢講完就係H&M入面手舞足蹈:「奶奶奶奶奶奶奶,奶奶奶奶奶,奶奶奶奶奶奶奶奶。來吧我地最大,放膽大聲嗌,全宇宙我地玩晒晒晒晒晒~~~」

「OOOO~我地係奶黃包奶黃包奶黃包三次,奶黃包奶黃包奶黃包,再,奶黃包奶黃包奶黃包三次~~OOOO~奶黃包~」

佢好似鬼上身咁好認真咁講Slogan:「你。。做乜係度講Slogan?」

老母Cammi答我:「呢D唔叫係講Slogan,呢D叫Dem Beat。」接著自己點頭。
 


 第一次見到人Live住Dem Beat,我有D文化衝擊,原來係咁嫁?

「我地陣間都會教你Dem,到時你就會識晒我地House既Beat,好好練習,我地入Camp dem足三日嫁!」
 
可唔可以唔Dem,好柒阿。

老母Cammi拎起件黃色衫拼落我身上:「就呢件啦,Fit晒你身型!」

我照一照鏡,見到真係啱Size就拎咗去俾錢。「唔岩可以返黎換。」

買完先至十一點半,仲有成半個鐘。

「我地去行下Log on啦。」Cammi提議。

其實有少少Odd,對佢完全唔認識,都唔知有咩同佢講。





同佢亂行咗陣到搭九就返去圖書館門口集合。

大家都好準時,未夠鐘已經到晒,大約二十個黃色衫人士圍圈係度自我介紹。

「咁遲嫁你地!」組爸Eric話:「罰你兩個自介!」

「Hello我係林書生,你地可以叫我書生,Year 1既E&F。」

「我係你地既組媽Cammi呀,Year 3既Acc嫁。」

「我地Round多次啦,揀你最想認識果個人開始先。」



一時之間我都唔知揀邊個好,就指住咗正對面皮膚白皙幾純幾可愛既女仔:「你啦。」

「Wow~書生係好識揀呀。我地個個都揀佢。又係你啦,快D自介。」

乖乖女好怕醜,「我叫靜宜呀!同書生一樣係Year 1既E&F。」

到佢格離高約175,正常樣個男仔:「我係Parsons,都係Year 1既E&F。」

「乜咁多E&F人既?」我話。好野,第一個Week上堂有伴啦!

「無嫁啦,成House得你三個,同埋你另外一個組爸阿東,可以問佢攞Source。」Eric話。

跟住個個自介啦,組女有靚西(Nancy)、Kayi、Lorraine、Bobo;組仔仲有John同阿南。其他太多人,一次過講已經唔記得。咁大家個樣都唔太毒,第一印象唔錯。