我昏迷到三點先起身。
 
去江柏琪房佢都仲昏迷緊。
 
執下袋咁就天黑,而江柏琪訓到五點鐘於醒咗,我諗佢同我一樣體力透支。
 
「你琴晚幾點返呀?」我問江柏琪。
 
「三點呀。」
 


「做乜咁晏先返?」
 
「我地玩得太開心,意猶未盡想下場,組爸媽帶咗我地去太子酒吧街見識見識~」
 
聽完我個心慶到火屎,已經攰死你身體唔好隨時暈低仲要同班新識既人去飲酒!
 
我自己同鬼王果堆飲過都知無好野!俾人溶咗你都唔知咩事!
 
「你自己返黎?有無人送你返黎?」
 


「我組爸阿Tim住係附近,我地一齊坐的士返黎。」
 
我對江柏琪身邊既男性都好有敵意,以江柏琪既外形,係大學O camp點會無厹埋身。睇下靜宜幾多男仔服侍佢就知。

 「你下次夜返打黎叫我接你啦。」我忍住唔發脾氣。

「唔洗啦我咁大個人。」

「總之下次同我講聲。」包拋頸!好難管治既女人!



我都係轉移話題:「你肚餓未呀?同你落去食好野啦。」

「好呀!」



「你地大O點呀?好無玩?」聽說大O整唔見咗我果日既新生報名表,所以我係一定無得玩,與大O無緣啦。
 
「好好玩呀,D組員都好低能,成日搞爛Gag,笑死我。」

「咁即係玩咗D咩?」

「呢幾日玩過咁多野,好難逐一同你講喎。House Dance、City Hunt、Mass game、Camp fire、房Game。。」江柏琪話。

咁又係,你問我有咩玩,我都好難答你。



「好似去咗個新世界咁,樣樣野都好新奇,原來一班傻更更既聚埋一齊可以咁好玩!組爸媽仲教我好多野,即刻熟習晒Poly!我愛大O!」

「係囉,仲即刻帶埋你去酒吧飲酒幾鬼危險。」

「點會危險,有佢地睇住。我玩酒Game交咗唔少學費嫁。」江柏琪繼續:「我覺得同大學D人岩傾過中學好多。」

「嗯。咁咪好囉,唔洗咁毒。」內心不悅,唔知講乜好:「有無相睇下呀?」

「有呀。」佢拎咗電話俾我睇,又好似真係幾好玩,個個都露齒笑,仲攬埋一舊臉貼臉咁。

「邊個係送你返黎果個組爸呀?」

「呢個呀。」我一睇,染晒金毛gel晒頭勁MK,豪邁爽朗既笑容,左手都搭住人地膊頭,一睇就知係厹格。



「我約咗佢下星期一齊返學,組聚食早餐~」

「哦。。咁你地食得開心D。。」不要再說了。

「你地O Camp又好無玩?」

「超勁爆好玩!我愛死水會!Warm到,我地完Camp做Sharing感動到喊晒,我而家先知咩叫熱血。我仲識到兩個同科既Fm一齊上堂。」我都唔執輸狂吹水話自己個Camp幾好玩。

「我果組都有個女仔同科。好期待。」江柏琪完全沉醉係佢既大學世界入面,根本就無心思聽我講野。