因為Mandy頹底Hea交功課既關係,拍攝既過程好簡單,只得Mandy揸機拍片、導演、Carmen幫佢手打燈補光,仲有小貓三四隻送下野食,食下花生。

取好景,講幾句對白,忍住笑NG幾十次,一日就拍晒所有Shot。

「由第一眼見到你,我就已經知道你係我命中注定既另一半。我真係好鐘意你,我好想每日每晚都同你一齊。你可唔可以做我女朋友?」夜晚喺公園,我用最真誠認真既樣子去講呢句對白。

幾歲呀,仲會咁樣表白?喺咁既氣氛底下,又明知人地冧你,直接拖佢手或者錫佢咪得米。

「我都鐘意咗你好耐。」陽光既Hailey點頭,然後我地就拖住手,滿臉桃花,送Hailey返屋企,到咗樓下遲遲都唔捨得離開。



拍拖既生活就係一齊上堂,食飯。我地去咗食M記,成場戲都要發晒姣咁望實對方,互餵薯條,彷彿整個世界都與我無關。

到最後,Carmen覺得套微電影做返純愛既風格比較一致。Mandy反複諗過,同意加入性既元素有啲格格不入,所以將劇本本來寫既親密場面都Cut晒。

親密既事,都係留返無人見到既時候先啦,我唔係動物園既動物。長期受到眾人既目光注視,會感到好大壓力。

如果你問我拍攝最深刻既野,我會答你唔係同外表姣好既Hailey拍對手戲,而係一班人嘻嘻哈哈喺度玩。

點解?因為拍完Mandy既功課片,仲要好Chur好青春直落同Felix拍Hall既宣傳片,凌晨返Hall人多好熱鬧,開心既感覺大過扑野。





「住Hall既生活。。」Felix Check in空無一人既房間。

轉眼之間,鏡頭變咗一大班男男女女圍埋係間房度夜話講鬼故,仲有一班戰友一齊溫書討論功課。(當然收起晒唔見得光既酒樽、賭錢既麻雀枱)、我地成班人做咗好假既肥仔,扮到笑得好陽光燦爛。

Felix貢獻咗佢塊滑板,我地輪流喺陝窄既走廊玩花式滑板。

又有我彈結他同大家一齊Jam歌唱歌。



又有Hailey同大家一齊做8 Minute Abs Exercise虐待腹部。

同一班痴線佬一齊,咩都可以玩一餐。

「3、2、1」

「生日快樂。」

我地將道具生日蛋糕既Cream抹落Felix塊臉度。

「喂,你地做咩呀?」Felix被我地突如其來既舉動嚇親。

「同你預祝生日!」呢個咁邪惡既提議係由佢Roomate即係Wade提出。

「但係我半年後先生日喎。。」Felix好無奈。



「所以咪叫預祝!」Wade話。

「你班人好無賴呀。」

到最後我地每個人身上都沾滿Cream,仲一齊Dem hall beat,凌晨四點滴酒不沾都玩到痴咗線,已經唔記得本來係拍緊Hall既健康宣傳片,正宗擾民。

好彩我地既Hall Tutor即係Hailey同我地同流合污,換轉其他人應該投訴咗我地好耐。

一個晚上經歷咗一年既住Hall生活,比起扑野重複既淫亂,顯得格外珍貴。