「7點啦,快D起身Hold game呀呀呀呀~~~」Parsons入房叫醒一眾OC。

打個呵欠,我、Stephanie同林敏兒即刻彈起身刷牙食早餐,要喺Freshman開始玩Running man遊戲之前,去Check Point Stand by。

今次玩O Camp玩得比較摺,我地三個都被OC王編咗做一組,無乜機會同其他OC一齊玩。

無聊既我地,可以做既野就係企埋一邊等Freshman黎做Task,觀看人生百態,同埋得閒撩下Fm或者組爸媽玩。

做OC要學識搵野做,同埋周圍R水吹,如果唔係會好無聊,覺得好浪費。



「我都好想玩埋一份,乜玩O Camp咁青春既。」Stephanie指Freshman可以玩情侶戰,用個紙圈圈住兩個人隻手。

「媽呀,你咁講好毒。」我話:「有一半以上既Freshman都係肥矮毒,完全唔想拖。」

「我太怕醜,平時唔會主動撩人講野,咁先傾到計。」


「拖住好似安全D,無咁易俾人撕爛個圈圈。」等Hold task既時候,聽到個靚仔同靚女講。

「好呀。我唔想咁快死呀。」靚女回答。




「不如。。我地拖手?」滿面暗瘡既毒男有樣學樣,邀請一個身型微胖既女仔。

「下,唔好啦,男女授受不親呀。」即使個女仔質素欠佳,佢對自己都好有要求,果斷放棄毒男。


「See?咩叫Your face your fate?」我話。

琴日做跟組OC無乜傾計交流既機會,加上林敏兒令到我心神彷彿,無辨法好好享受呢個O Camp。



今朝一齊Hold task需要一點Team Work,我對林敏兒好似放低咗少許警戒心,由一班人去到得返我地三個,多咗同佢對話,可以一齊玩既機會。

我離開咗Hold task既位置,追住Hea底停喺度既Freshman:「喂喂喂,唔好停喺度!我會攞枝筆黎畫花你塊面嫁!」

林敏兒並唔好似Stephanie咁怕醜被動,佢同我一齊跑過去,想整爛Freshman既紙手帶,我忍唔住叫咗出聲:「你仲狼死過我。」

「上帝係會懲罰懶惰既人們。」

「上帝喺邊度?」Freshman邊走邊們大叫:「救命,唔好捉我地吖。」

「我就係上帝,你大獲啦!」林敏兒拉住兩個Freshman:「仲唔捉到你地。」

我喺男仔臉上盡情繪畫:「你想點畫?不如我幫你畫個韓式最潮既一字眉。」



我將兩眉中間既位置填滿,是謂「林書生一字眉」也。

「哈哈哈,靚仔晒!」我將枝筆遞俾林敏兒:「到你畫。」

「呢位客人,你想點畫?我幫你加一粒性感美人痣。」講完,林敏兒就畫咗粒墨喺女仔既人中位置,好似家燕媽媽咁。

「再畫大粒D啦,睇唔清楚。」男Freshman叫林敏兒再重手D。

「喂呀!好賤呀~」女Freshman笑住發嬲,樂也融融。

「咦,琴日Red house班Fm過緊黎。」林敏兒指住佢地。我同林敏兒立即跑返去本來Hold task既位置,會合返留守喺原地既Stephanie。 



「Hello~快D過黎啦。」我揮手叫對面Red House既Fm過黎,林敏兒同我一齊好大動作咁叫佢過黎,埸面搞笑。Stephanie則好怕醜,望住我地唔出聲。



「OC~呢度係咪有Task?」我認得琴日玩房Game見過呢個組仔,成個愛回家十仔咁,好Active又多野講,身高大約175度,瘦瘦地,單眼皮,帶住個黑框眼鏡,有細佬既感覺。

「係呀。」Stephanie一本正經地介紹呢個遊戲:「依個係一個情侶Task,你地兩個要跟住資料圖片做返同樣既動作。根據難度可以獲得相應既金錢,分別係20蚊、40蚊、同100蚊。」

挑戰20蚊、40蚊task都輕易而舉,佢地就想做100蚊個task。

本來果條題目實在太易太無聊,所以我即場爆肚:「抬起個女仔10秒,隻腳凌空開始計。」

「太簡單啦OC!有冇難D,我做完你俾多D錢我啦~」果個好似十仔既組仔望住Stephanie話:「不如我抱起靚女OC你。」

「靚女係你抱嫁咩?邊個都唔抱得。」

免得Stephanie受到眾人既目光注視感到不便,我提出另一個Counter Offer:「你同我鬥耐啦!嬴左我就俾200蚊你。」



目測身型較細粒既林敏兒係全場偏瘦,所以我都幾有信心可以嬴到呢班身型瘦削既Freshman。

「唔好蝦細路啦。」Stephanie反對我呢個提議。

「點算蝦,一睇就知Janice好有內涵唔簡單。」

「好!就咁話啦!」成班Red house人圍觀起哄。

我一下抱起林敏兒,佢摟住我條頸,個頭挨咗落我度。

十仔除下紙圈,抱起佢身旁同林敏兒差不多身型既組女。

「Wow~~~」其他Red house既人喺度歡呼。

抱起咗唔知幾耐,最後我忍唔住笑,輸咗俾十仔,係開心既。



Stephanie派錢俾十仔。

「多謝靚女OC。」說罷,十仔又戴返紙圈,拖住女Freshman離開。

睇落,十仔係性格幾Charm,會係幾多女仔鐘意既類型。

「Blue house果度有四個人,我地去圍毆佢地!」Red house某組仔話,佢地採取人多恰人少既策略。

Blue house果四個人見到成堆Red house既人衝埋黎,趕忙跑走,情景青春搞笑。