一個書生既Player故事: 三三七

「我想返房攞蚊怕水但唔認得路。」林敏兒話。

「書生你陪Janice返去啦，呢度有我睇住得啦。」Stephanie話。

「你自己一個得唔得嫁？一係你陪Janice去？」我話。

「唔洗啦，我都唔認得路。Camp site又收唔到電話，盪失路仲麻煩。」Camp site既路迂回曲折，度度都一式一樣，又的確幾難記得。

「咁好啦。你留喺呢度，唔好行開。」我話：「我地好快返。」



講完，我就同林敏兒行返去OC房。

「同Freshman玩真係好開心，覺得自己成個人Fresh咗。」

「超，講到你同Felix一齊好唔開心咁。」

「開心，不過同你一齊果陣仲開心。」講出口眼都唔眨，仲表現出一副誠懇既樣子，你唔好咁假啦。

「咁你同Felix分手，轉會返黎我度囉。」我串佢。



「你仲等緊我？」

「等一生都等～」我唱阿牛既歌詞：「你唔係真係以為我會等你阿嘛？」

「咁認真做咩，都唔似你。」

「唔好講到你好瞭解我啦。」我話。

我同林敏兒行到去OC房，裡面竟然無人喺度蛇王休息。



林敏兒周圍都搵唔到蚊怕水：「可能俾其他人攞咗。」

「你去隔離物資房搵下。」琴晚操勞咗成日，仲訓得果個零鐘，我其實真係超眼訓，忍唔住訓咗喺床度。

林敏兒過咗去隔離房，過咗唔知幾耐先返黎，但我已經秒速恰著咗。

「起身啦。」林敏兒坐喺我隔離，一路摷我個頭。

「咪搞啦屌。」我側身。

「你唔起身，我都一齊訓嫁。」林敏兒講完就撻喺床度，霸咗我張床一半既位置，仲要同我爭被，都唔知搏咩。

嚇到我即刻彈起身。

林敏兒起身騎住我，雙手環抱我既頸部。



「小姐，你到底想點？」

「阿。我就黎跌啦。」林敏兒重心不穩，我伸手攬住佢條腰，費時佢跌倒。

林敏兒笑話：「我好後悔細個咁對你，走晒寶。如果有機會可以同你一齊，我一定唔會再咁對你。」

我有零點幾秒既心動，林敏兒對我講啲咁既野，好似發夢一樣。

但轉眼我就知道，呢件事並唔係真實，因為佢係一個夢。

如果你仲願意欺騙自己，大可以相信佢既說話。

但我唔係果種人，我知道佢只係口裡講下，無任何責任，好似警訊騙案一樣，連叫人胡思亂想既餘地都無。



「我知你同Felix無扑過，都唔洗咁餓。」

「男人，你一定要有啲野唔俾佢，先會珍惜你。」

「你唔亂搞咁多野，佢仲珍惜你。」

我推開林敏兒：「我當你今次貪玩。你再夠膽試多次，我一定會同Felix講。」

「竟然推開我，Felix仲話你係Player！」

「你當我係咩？就算我係Player，都未至於要食兄弟條女咁仆街。」

我諗佢餓到病入膏肓，肯定唔止一次約人去開房。

綠帽唔怕戴，最緊要除得快。



好彩一早分咗手，無再同咁既女仔再認真發展落去。

自從識咗Maisy同Stephanie，我對於乖乖女外表既人又扣咗分。

人生既經驗話俾我知，單靠外表去猜測一個人既性格，實在太膚淺。

我落床，望出窗外，好似有個人影行過，應該係Freshman。

就一個人行返去Hold task既地方，由得林敏兒一個人跟住我。



O camp同我最格格不入既環節就係Camp fire。



玩完Changing partner，組爸媽都尋找自己Dorm既組仔女，Dem住自己既組Beat；Parsons喊到失聲，對每個莊員、組爸媽、OC致上最深既謝意，全莊圍埋一齊喊；連Felix都攬住林敏兒。

明明應該係最好玩，最感動既環節，我卻毫無熱血既感覺。

因為我無喺呢個Camp入面投入心機落去，而且身邊都無真正屬於我既一個人。

我同Stephanie企起離火圈最遙遠既位置，用旁邊者既角度去感受呢個場面。

望住熊熊既火焰，內心卻是一絲哀愁。


最後一日，林敏兒唔敢再亂黎。佢去搵Felix瞓覺。出Camp果陣亦癡實Felix，睇住佢搬野，同佢搭車。

我諗，我同林敏兒既緣份真係完結，從此唔會再相干。

有時候，再俾一次機會你去遇見，但Timing已經唔同，經歷對自己既抉擇已經改變咗太多太多。

就係咁樣完結咗我地既三日兩夜O Camp。