【完】好多件令我好後悔嘅事 (20/4/2017修改): 7
離開嗰間酒吧，嗰晚我哋走嘅時候落住毛毛細雨。我哋兩個都無帶遮，於是我哋急急腳行。路過幾條馬路，雨點落喺瀝青路上，整條路跟住黑夜變得深色。
嗰一晚我跟住佢行，默默咁走喺佢嘅後面。佢背影好靚，長髮、佢一條黑色嘅裙、佢嘅手臂、佢隻手，佢著住對著高踭鞋，腳踭有一條帶。佢裙擺跟住風嘅方向，裙擺慢慢就消失，一時間佢喺我眼中竟仿如赤裸。
我十足一隻狗。
阿怡見我好似行慢咗，一直都喺佢後面，佢擰轉身問我「做乜嘢事？」
我覺得佢背影好靚。
「無嘢，」我答：「想行慢少少啫。」
佢臉疑惑咁擰返轉頭繼續向前行。我同佢經過好多條街，馬路側邊泊滿汽車，我哋喺汽車之間穿梭，橫過馬路，穿過好多塊招牌，走過好多度落咗嘅鐵閘，鐵閘上面貼滿「招租」嘅紙。淡黃路燈照住落下嘅雨。
我有時會講兩個笑話，佢聽到就笑。
成條街剩係得返前面一間便利店仲開緊，白色燈光非常起眼，喺好遠處都可以睇得到佢嘅存在。好似喺夜晚嘅廚房打開雪櫃咁。
阿怡佢問我「仲飲唔飲？」
我答佢「好。」
阿怡佢向住光嘅方向行。佢走入去便利店裏面，走到最入，行到去雪櫃面前，揀咗一陣，就拎咗兩罐啤酒出嚟。
我拎咗佢手上嗰兩罐酒，我就去咗銀嗰到畀錢。
佢喺佢個袋裏面不斷咁搵，好似想搵個銀包出嚟。
我同佢講「唔洗。」
佢話「唔好啦。」
我話「少少錢由佢。」
於是佢就放棄咗，放返低個袋。
阿怡佢同我講「多謝。」
「唔洗客氣。」我話。
佢一路行、一路飲，我哋一路開始又講吓啲廢話，可能會講吓Stephanie、講吓西牛，講吓佢哋嘅一啲趣事，我哋係點樣認識...話題諸如此類。阿怡越飲越急，於是我叫佢飲慢啲，唔好飲咁急，佢無理我。
去截的士前，路口有間七仔，於是我哋又買酒，佢繼續飲，我畀錢，佢話唔好，我話唔緊要。我倆醉醺醺，吹過涼風陣陣。喺馬路一邊我揚起手，一架又一架的一駛過，上面都載咗人。
阿怡佢不斷咁飲。然後佢自己一個人行開咗，粒聲唔出。我怕佢有事，所以我跟住佢。佢好小心行出一條直線，勉勉強強腳步都撐得住。我上前將佢扶住。佢向住七仔行。
佢無講啲咩嘢，我都無。
我扶住佢走入去，佢揀完酒一手就塞咗畀我，我就拎去畀錢。我幫佢開埋個啤酒罐，就成罐咁畀咗佢。
順便我買咗包煙。
咔嚓——噹——
呼——
一縷煙就直飄上天。
佢撓住我手臂，佢問我「你係咪食煙？」
我望望我自己手上嗰一枝煙，我諗咗一陣，我答佢「好似係。」
佢話我，「你個樣唔似。」
我話「依啲嘢無得睇樣嫁喎。」
佢挨住我話「唔好食啦。」佢叫我「戒煙啦。」
我同佢講「唔好，唔得。」我話「戒唔到。」
佢話「唔試吓點知。」
佢伸手想搶過我枝煙。
「唔得。」我伸手，拉開。
佢伸隻手過嚟想拎，我擋住佢。
我話「唔畀。」
慢慢佢放棄咗。
佢話：「你好臭啊。」
佢仲話我「好污髒啊你。」嗰時，佢撓住我。
呼——我又吐一口氣。我向馬路嘅遠處望，及目所見一架的士都無。阿怡佢望住嗰堆向上升嘅煙圈。
佢問我，「做咩你要食煙？」
我講笑咁話「型吖嘛，威吖嘛。」
佢唔信我。「我唔先唔信你啊。」
我話「真係咁。」
佢話：「無你咁好氣。」
我哋沉默一陣。
佢繼續問我「點解？」
我話「我唔想講。」只係同佢講，叫佢記得：「總之記得千祈千祈唔好食煙。」
「嗯。」佢低沉咁答咗我一聲。
我笑笑，跟住我扮農夫唱咗首《偉大航道》畀佢聽：「因為你想像唔到佢有幾戒。」我仲搭單唱咗首「食煙嘅你，真係唔係幾正。」
我哋截車、去買酒、又截車。不斷喺依兩個動作來來回回來來又回回好似跌咗入一個漩渦裏面。佢越飲越醉。我理解唔到點解佢要咁做。
我講笑咁話：「我係一個陌生男人喎。」
佢無理我，又飲咗啖酒。
我問阿怡：「你係咪有咩事？」
佢話「無。」
我再問佢。
佢堅持話無。
然後佢無再喺依個話題繼續講落去。
於是我鬆一口氣，終於都可以放鬆落嚟。
佢挨住我，佢話覺得我「好好人」。
我諗極都唔明「我」、「我手上嘅依一枝煙」、以及「好人」依三樣嘢到底有啲乜嘢關係。
我好坦白咁同阿怡講「我係個大仆街。」
點知阿怡佢話「你都唔似。」
「我無呃你嫁喎。」我答佢。
「無仆街會話自己仆街吖。」佢好有自信咁同我講，佢堅信我係一個好人。佢仲話：「你應該係個好善良嘅人啊。」
「咁快派好人卡畀我？」我臉頰掂住佢頭頂，佢啲頭髮好拮，不過有一刻似乎我感受到佢嘅心跳。我同阿怡講，我叫佢「不如小姐你畀個機會我追下你先吖。」
阿怡佢笑笑，「我識咗你一晚咋喎，咁就追我嫁喇？」
「咦，係喎。」我話：「原來一晚嫁咋喎。」
十月初嘅依場雨好似落咗一百年咁耐，又好似係剎那之間嘅事。嗰一場雨畀我嘅感覺，係無人需要擔遮，都無啲乜嘢真係會畀依場雨揼爛或者揼濕而搞到報廢，但依場雨實實在在咁落着，雨點落喺皮膚會覺得凍，行一小段路都覺得沉重。
我隨口嗡咗句「唔講以為有一百年咁耐啊。」
「我真係覺得你係個善良嘅人嚟。」佢話。我第一次聽過有人會喺日常對話到用上「善良」依兩隻字。佢用力撓實我，合實對眼，好似喺我膊頭上面差唔多要瞓著覺咁，阿怡佢話：「我估。」
「我諗你應該估錯。」我答。
一枝煙，我手一彈就灰飛煙滅。我一口煙圈，我分唔清嗰啲係雨係煙抑或係霧。接落嚟我同阿怡兩個人沉默住。我剩係見到佢撓住我嘅時候，佢慢慢咁合上眼。
明明我第一晚見佢，佢竟然會信我。
我揚起手，就有一架的士喺我哋面前停低。而我打開門扶咗佢上的士再坐好嘅時候，佢已經挨住我膊頭，兩隻手仲揸住嗰個無酒嘅酒罐。
對此我竟不禁心生憐憫。
我：「司機，XX大學宿舍吖。」
佢身上噴咗香水，我好鍾意佢陣味，清淡花香一樣，我唔會知道係咩花、唔會知道香水嘅牌子。但嗰一陣味悄悄留喺我腦海中。
司機：「嗯。」
本來上車嘅時候佢仲瞓喺我膊頭上面，但沿途的經過街燈、經過樹、經過欄杆...佢慢慢咁跌落去，慢慢佢就挨住我心口，我好辛苦先拓得住佢。
阿怡：「格仔。」
車停定嘅時候已經深夜，我畀完錢，打開門，將阿怡扶起身，一步一步咁走入去。阿怡醉醺醺、全身無力。有一刻，我覺得佢喺返嚟宿舍嘅路上，佢好似係有意灌醉自己咁。
阿怡佢挨住我，笑住咁話：「我覺得你係個善良嘅人啊。」
我喺佢耳邊同佢講「我唔係。」我唔知佢聽唔聽到。
總之，嗰一晚我同咗阿怡做愛。
***