【完】好多件令我好後悔嘅事 (20/4/2017修改): 17
萬聖節嘅酒吧做到我無暇思考。所以生存意義啊出糧之我要點樣做啊諸如此類，我都將佢哋拋諸腦後。我只係做，有客人舉手就行埋去，枱面有嘢就去拎。
酒吧坐滿人，燈光照住佢哋。有啲著住件袍、有啲臉畫滿妝容。嗰時好興小丑女。啲女人化到塊臉好白，著住件T-恤仔、一條牛仔熱褲、一對長襪、一對波鞋，有啲小丑女有胸、有啲無。
我頭頂上面都有兩隻角，一閃一閃。Kelvin話咁樣有氣氛啲，叫我哋都戴返個。有時行過塊鏡，望一望，就算只係望到自己一秒鐘都好我都覺得自己同依個地方好唔協調。因而當四周嘅人舉杯暢飲大聲咁笑嘅時候，更令我覺得自己不屬於此。
好似一個人喺一堆非洲遷徙緊嘅動物中間畫畫。
一直依幾個星期我都保持喺一個咁樣嘅循環裏面度過：瞓到下晝，食下午茶(有時搵埋西牛，有時自己食)，再去上堂，跟住返工，放工之後同SY傾偈，而經過咗漫長嘅一日精疲力盡之後，第二日我就瞓得更晏，然後重覆第一步。
做到咁上下，我鼠咗出去食咗枝煙。就係啲小小嘅空檔，我先可以拎到部電話出嚟禁。玩樂聲喺大街傳嚟，嘈嘈雜雜嘅人聲，交織住唔知邊到傳嚟嘅音樂。後巷好暗，唯一嘅光，係一個綠色嘅「Exit牌」。
大約半個鐘之前，SY佢Facebook搵過我，佢問我「你喺邊到？」
佢之前未試過喺我開緊工嘅時候搵我。
「我返工啊，做咩？」
「以為你今日放假添，哈哈。[大笑]」
「唔係啦，依啲日子邊有得放。」我話，「聽日先係啊。」
「唔好意思囉！[大笑]」
「你記住喇。[錫錫]」
「咁你嗰邊咪好忙囉？」
「係啊，我都係偷偷地走出嚟一陣嫁咋。」
「你邊區啊？尖沙咀？」
我喺酒吧返工，成個世界剩係西牛同SY知道。喺已被遺忘嘅某個夜晚我同SY講過。佢問我點解咁夜先放工，到底係做啲咩嘅呢？我叫佢估。便利店？定抑或係麥當勞？我話唔係。我話，我喺間酒吧做緊個侍應。佢話覺得好型。我話，其實同茶餐廳幫人落單嘅阿叔一樣，無邊一個高級過邊一個，反正都係一個要畀人點嚟點去跟住收錢嘅人。嗰時佢都係咁，佢問我做邊到。
「個人資料我唔答嫁喎。[大笑]」
「得喇知喇！[大笑]」
「你喺尖沙咀？」
「嗯。好好玩啊！你無得玩，真係慘。」佢話我，然後佢Send咗幅相畀我。
佢著住件T恤，一條牛仔褲，手上面拎住一大枝啤酒。啤酒杯上面佈滿水珠，白色嘅泡沬覆蓋上面。仲有佢嘅胸脯，白色T恤隆起嘅部分印咗一串英文。
「點先！係咪好吸引先。」
「係啊，好吸引啊。」我回覆。
我喺手機上面放大咗佢幅相，聚焦住佢嘅胸部，嘗試目測，但因為光影問題，仲有張相變咗2D，我睇唔出。只係知道總體嚟講身材幾好，應該會同我暗瘡肥婆嘅想象相差好遠。
「返工無得飲，呵呵。」然後佢再加一大串大笑Emoji。
「我自己好少飲啦。」我話。
「係唔係啊你？」佢整咗個奸笑樣畀我。
我好誠懇咁樣答咗句「係。」
返返去做嘢之後，時間又開始變得快返。講起做嘢，我鍾意好多嘢做，然後用嗰啲嘢嚟塞爆晒我嘅時間，咁點都好過要我眼光光望住時間流走。我再意會到時間存在係一個鐘頭零七分鐘之後。
夜已漸深，因為第二朝仲係閒日要返工，好多人已經走咗，同我想象中萬聖節嘅夜晚好唔一樣。依到唔再好似剛才咁人頭湧湧。有咗對比，反而覺得落泊冷清。阿軒佢話佢出去食枝煙，叫我頂佢一陣。
係就係咁講，不過佢行出去食煙嘅時候我都只不過係一碌木咁企喺到，郁都唔洗郁。
阿軒佢話，「嘩，做死人啊真係。」
我笑笑，我話「係啊，今日好多人。」
阿軒佢笑笑口咁話我：「聽日你就好啦有假放喇。」
「哈哈，OK啦。」
阿軒佢問我「聽日去邊玩？」
我話「無啦。」我笑笑，我話「毒撚無乜邊到好去。」
「唉你偽毒就收皮啦。」阿軒笑笑口，一邊講一邊就行開咗。
「無女，偽咩毒。」
我笑笑口再答返佢嘅時候，佢已經變成咗一隻背影。
「唔該...」
我都去咗抺枱，收返啲杯。有兩個新入嚟嘅客人，我帶咗佢哋去近牆嘅一個卡位坐低。
「唔該。」
依個時候，我先聽到店裏面有一把女聲叫我。
「係！」我擰轉頭。
佢哋一枱四個女仔，圍埋張枱就喺到傾偈。舉手嘅係一個個頭漂成灰藍色頭髮，載住一頂CAP帽嘅女仔，佢紥住條辮。嗰日係萬聖節，我諗咗一陣，到底嗰個係唔係假髮呢？於是我視線就定咗喺佢臉上，停咗喺佢對眼到。
「我哋想要呢...」佢話。
「係。」依個時候，我先醒起原來佢係想落單。
嗰個女仔，著住一件白色T恤，著住一條牛仔熱褲。白色T恤上面有一串英文，係一隻我唔識嘅字。依半個月間我每日放工都係同依個女仔傾偈，而到我真係見到佢嘅時候感覺陌生又熟悉。
佢胸部有C，挨近D，唔算好高，熱褲、著住對波鞋，佢對腳好靚。
我問佢「你想飲咩？」
佢哋話想話Draught啤，佢哋問我「有咩Draught？」
我話「咁不如試吓隻手工啤」，「特別啲」，「我覺得幾好飲。」
「手工啤？」SY問我，「即係用手造嫁？」
我覺得依個問題幾有佢嘅風格，所以我同佢傾咗落去。
我話「唔係啊，其實係用腳踩出嚟，好似紅酒咁。」
佢哋拉長咗個「哦——」字嚟答我。
然後我驚佢哋真係信，「唔係，」我即刻解釋，「係多數都係用返純麥，Fresh啲啊，唔會落咁多化學嘢咁樣囉。」
講完好似無講過咁，總之好飲少少，但實際上有咩分別又好難去切切實實咁講到出嚟。
佢哋一齊「妖」咗我一聲。
「哈哈講吓啫，唔好咁。」我試試打個圓場，好彩佢哋有笑，咁我都無咁尷尬。
SY話：「咁好吖，我想試吓。」
我幫佢哋寫低佢哋要飲嘅嘢。
我問SY，「你食唔食薯條？」
SY望望佢啲朋友，佢哋有啲猶疑。我加多咗一句「唔洗錢嫁喎。」跟住佢哋就不斷點頭，「好啊好啊」咁樣答。
SY佢瞇起眼，佢對我笑一笑，佢同我講「多謝。」
我答佢「唔洗客氣。」
佢問我「點解？」
我問返佢「咩嘢點解？」
「點解有薯條嘅？」
「係啊，」我話「今日係萬聖節吖嘛，」我鬆鬆肩，「咁咪一齊開心吓。」
「多謝。」佢哋一齊同我講。
我話，「多謝我老細啦。」搭多咗句「哈哈。」跟住我行去入單。
幫佢哋落單嗰時我同吧枱講咗聲，就加咗個薯條佢哋。我話「入我數，收工畀。」吧枱哥哥望望周圍，Kelvin啱啱走咗出去，唔喺到，吧枱哥哥佢鬧我，「傻閪嚟嘅，」然後佢同我講「唔撚洗啦屌。」咁我就真係唔撚洗，走咗去，走到去酒吧嘅角落。吧枱哥哥問我，「你啲朋友啊？」我勉勉強強答咗一句「算係啦，」跟住我行開咗，扮有其他嘢要做。依個時間人開始少，有幾張吉枱，外面偶而會經過幾個人、經過幾架車，係一個咁樣嘅深夜。
而我就一個人喺角落處望住佢飲酒、望住佢笑。SY係一個好鍾意笑嘅女仔，佢笑得好甜，膚色好白，塊臉好尖。我明知道佢唔會做運動，但望到佢我覺得佢會打網球，有依種好奇怪嘅感覺。正如望到某個人我會聯想到佢係屬於某一隻色，無意義嘅想象。
我拎咗塊布，走咗去佢哋隔離枱到抺枱。
「啱啱無喺出面玩咩？」我問佢哋。佢哋無化妝，又無扮依扮路。
「諗住出嚟湊吓熱鬧之嘛。」SY佢話。
佢嘅朋友就開始高談闊論。可能係因為一盤薯條，佢哋都好興奮。我同SY凝眼對望。佢眨眨眼，我耷低頭，抺枱。
「幾好玩吖嘛？」我問。
「嗯。」SY答。
「出面有咩玩？」
「你無出去？」
「無啦，做嘢吖嘛，邊有得行開。」
「哦......」
佢視線無離開過我，我諗，應該係我頭頂隻角太過奇怪？
「係咪我頭頂隻角好奇怪？」我問佢。
「唔係吖。」SY佢答我，「幾好睇吖，佢得意。」
我鬆一口氣，「咁就好喇。」
我繼續續講，「畀個你玩吓。」
「哈，唔洗喇。」佢對我笑笑，「聽日都唔係萬聖節。」
「唔係萬聖節都戴得嫁喎。」我隨口講，「送埋電芯畀你。」
「哈！咁多謝？！」
「唔洗同我客氣。」
我哋停頓咗一陣。佢嗰三個朋友一齊望住我哋。佢換住個話題，我哋繼續傾。
「啱啱喺出面畫咗Henna。」佢伸咗佢隻手出嚟畀我睇，白色嘅手臂上面畫滿黑色花紋。
「好靚喎。」我話。
「係啊！」佢聽我讚佢靚，佢就好興奮，佢側頭，笑住咁望住我，「上次我畫第二到呢，超核突囉！」
然後佢講起佢上次去畫Henna嘅經歷，佢覺得自己好似畀人呃咗錢咁，於是佢好唔份氣。「上次我諗住以後都唔畫依啲嘢嫁喇！」佢不斷、不斷咁講。我哋之間一來一回嘅廢話，來回咗好耐。
「喂！你溝仔唔好溝到咁揚好喎！」佢啲朋友叫住SY，打斷咗我哋嘅對話，「你依家有異性無人性嫁啦！」
SY佢灑手擰頭啦，佢話「唔係。」「一時講起之嘛！」佢不斷咁解釋。
我同佢哋道個歉，「唔好意思啊，哈哈，」跟住我就走遠，去抺下一張枱，直到有人要落單，我同SY講咗聲「我做嘢先。」然後走。
一瞬間阿嬋佢就將依枱叫嘅嘢拎到過嚟。有杯手工啤、兩杯64、有杯Stella。有一盤薯條，佢哋一班人見到薯條就好開心。
「吖！」SY佢叫住我。
佢眼角好似突然閃過一道光咁問我——
「你係咪羊格？」
我停低腳步，我轉身，我問返佢。
我問佢「邊個係羊格？」
我哋對住眼望，佢避開我。
「噢...咁...」佢耷低頭，佢話，「咁由佢啦。」
我微笑，退開。
跟住佢嘅朋友同佢繼續笑、繼續飲又繼續笑。感覺到好似一直望住我嘅背影。我行咗出後巷，點咗枝煙，開返我嘅Facebook，打開咗我同SY嘅對話框。一吸，一呼，長長一口氣，一個煙圈。
「你哋會飲到幾點？」
嗰個時候，我滿腦子都係佢嘅胸部。
「等我一陣，我早走少少同你一齊行好無？」我話。
「真係你嚟嫁？！」
「應承我一件事。」
「咩事？」
「唔可以同任何人講你識得我。」
煙點咗一半，一半化成了灰，跌落地上，一星火光搖搖擺擺咁向下墜。煙灰跌落嘅速度異常地慢，我就望實嗰一點光，等到SY佢回覆我。
佢話「好。」
「我應承你。」佢句子後面，仲加咗個OK手勢畀我。