【完】好多件令我好後悔嘅事 (20/4/2017修改): 40
用一段好長嘅時間思考我應唔應該敲門。但依種時候敲門，好似好無禮貌，最後我咩都無做。聽住佢嘅呻吟、喘氣、用氣聲喺耳邊傾偈，安靜而深沉。
「啊...」
「細聲啲。」
原來張文靜會有依一把聲，我第一次聽，環繞喺耳邊，揮之不去，好似一條將我勒住嘅繩。
「喂也！」
「噓——」
隔住道房門，依稀聽到一男一女，依偎纒綿，西牛一定好興奮，處女啊、校服，親吻佢雙唇，摟住佢腰，將佢壓喺床上。西牛嘅笑容、嗰一張臉，一剎那間填滿我腦海。當佢發現張文靜係處女，我諗佢一方面又驚又喜，一方面會發癲咁恥笑我，然後分享佢今晚玩得有幾開心。
我一個人喺宿舍嘅走廊上面企喺到。平安夜，要走嘅人都走晒，除咗佢哋兩個人做愛嘅聲，到處都死一般靜。走廊盡頭望向盡頭，空無一人。偶爾傳嚟一兩下張文靜嘅尖叫聲，佢叫住西牛，但聲線慢慢又被西牛壓落去，佢哋都好怕聲線傳到出面。重重覆覆，安靜、叫出一兩聲、又安靜。
好想有一個女人喺身邊，但已經連伸手都無力，想走，卻無處可逃，落入困境之中。
檢查一下銀包，確定自己有買一枝酒嘅錢，最後我決定走。隨便去一間便利店，然後走去一個海邊、或者一個公園，邊到都好。去一個無人嘅地方。
離開嘅時候，可能佢哋發現門底有屬於一對腳嘅影，於是短暫地停咗落嚟，等我走開，又復喃呢。
一定要去一個無人嘅地方。
***
尖沙咀海旁有好多人，不自覺就嚟咗依到。
情侶嘅手撓住手，朋友嘅搭住膊頭，我拎住一枝酒。嗰一晚因為想醉，所以特別快醉。嚟嘅時候，便利店買兩罐會平啲，於是飲咗兩罐，去到尖沙咀嘅時候再買，但好多人，剩係等買酒都排咗好耐。
順住人潮向同一個方向行，都係向住海邊。
無試過「決定」自己要去邊到，只係走咗入人群嘅正中間之後，要改方向就變咗做一件好難嘅事。想去海邊，僅僅想望一望海，但因為太多人，就唔太想行埋去，好怕阻住人影相。於是背住海邊，又順住第二個人潮走。
來來回回，唔知走到幾多點鐘，只係沿途不斷咁飲。飲到嘔，瞓喺街邊，好多人經過、好多人走。如果嚟搞我嘅係一個女人，我當然高興，但如果係男人，我就可以殺人，而且因為無錢，無人可以偷到我嘢，最多只可以打我一身，或者殺死我。以依種狀態瞓喺路邊，比其他狀態嘅我都感到安心。
一合埋眼就瞓得著。
***
瞓咗喺街邊一張長櫈上面。
「先生。」
竟然每個人都會慶祝聖誔節，我諗一定係每個人都相信有神，篤信不已，而對詐騙、欺瞞，絲毫不感恐懼，先可以對聖誕樂此不疲。
「先生。」
若果上帝存在於此，一定會好煩惱，見到一個咁嘅世界，到處都係做愛嘅男女。佢哋脫清光、攬作一團，第朝又好似無事一樣。回想自己曾經都做過一啲咁樣嘅事，就覺得，無論如何我都唔會得到救贖。我係被人丟棄喺到，永遠被丟棄喺到。
大概對天國嚟講，人間就係地獄。要上帝伸手落垃圾筒，未免太為難佢。
我再打開眼，平安夜已經過去，去到第朝清晨。除咗時間改用公元運行，人類無因為聖誕而逆轉過啲乜嘢。我面前只有兩個警察，佢哋一步一步，慢慢咁行近我。
等到佢哋企喺我前面，「先生你咁樣好危險嫁喎。」佢哋將我叫醒咗。
「哦。」我回答，一隻手撐喺地，慢慢咁撐起身。
「先生你ｏｋ吖嘛？」
「無事。」我答。
佢哋問我，「你住邊頭？」
我指向遠處，猛力搖下個頭，我唔肯定我嘅方向係唔係真係嗰個方向，總之我指住馬路盡頭，講咗間大學嘅名。
「先生你小心啲喇吓。」
我一步一步，喺佢哋面前，用晒全身嘅力氣，集中精神，不斷咁提住自己要行出一條直線、一條直線。
「唔該阿sir.」我舉起手，「拜拜。」
等到佢哋走開，再見唔到我，我就坐返喺到。又飲一啖酒，飲到最尾，一滴都無，又走入一間便利店裏面。本來煩惱應該買酒定係買煙，但發覺自己剩係夠錢買酒，煩惱即時一掃而空。
煙盒裏面最後一枝煙，望到覺得好寒酸，但無辦法，唯有點起佢，將煙盒掉走。
一直好羡慕有力量為上帝存在與否依類問題鬧到面紅耳赤嘅人，咁樣嘅人生好積極。
***
「嘔——」
一返到宿舍，一唔小心就嘔到一地都係。嗰時係清晨六點鐘。行都行唔穩，莫講話要自己清理返個地方。想搵人幫手，但係又無人喺到。清晨唔敢叫得太過大聲。
不如走。但留低一大灘嘢自己走咗去，咁樣又未免太唔負責任。進退失據，一坐低，就坐咗喺灘嘔吐物前面，挨喺牆邊。
「吖！！」有個女仔出咗嚟，佢一見到灘嘢就大叫。
佢喺遠處望咗我好耐，一副驚惶失惜嘅表情，引頸對我觀察咗好耐，應該有半分鐘到。佢確家我安全，唔會攻擊佢之後，佢先走去部掛牆嘅電話前面，打咗個電話。
坐喺地下仰視住佢，佢一路望下我，一路就對住個電話講。佢貼近牆邊，對我嘅距離有咁遠得咁遠。
「看更啊？」
「係..係啊...依到有人嘔啊。」
「嗯...」
「__樓，lift口啊。」
「唔該晒。」
佢收線，將電話掛返起。我同佢保持住一個幾米嘅距離。因為有一大灘嘔吐物喺我哋中間，周圍都好臭，佢亦都唔敢行近半步。
佢問我，「你無咩吖嘛...？」
「唔關你事！」我答。撥手，趕走佢，「走啊！」
佢對我鄙視一眼，眼光裏面充滿嫌惡。
「行遠啲！」我指住佢鬧，「唔好痴埋嚟！」
之後，佢頭也不回，直接走。無幾耐看更就上咗嚟，仲有個清潔姐姐。
我望住少女離開嘅背影，見到佢離開我，而且確定佢離開咗我，我就放心，鬆一口氣，兩眼泛起一泡感恩嘅淚。
***
眨眨眼。
我攤咗喺自己間房張床上面。西牛一嘢拍我個頭，佢鬧我，「你醒喇仆街？！」
西牛好似平時一樣。
「嗯。」我向住天花板。
我都好似平時一樣。